ਆਕਲੈਂਡ ਦੀ ਇੱਕ ਕੰਪਨੀ ਨੂੰ $300,000 ਦਾ ਜੁਰਮਾਨਾ ਲਗਾਇਆ ਗਿਆ ਹੈ। ਕਿਉਂਕਿ ਇੱਕ ਧਮਾਕੇ ਵਿੱਚ ਇੱਕ ਫੋਰਕਲਿਫਟ ਡਰਾਈਵਰ ਬੁਰੀ ਤਰਾਂ ਸੜ ਗਿਆ ਸੀ ਜਿਸ ਕਾਰਨ ਕਰਮਚਾਰੀ ਨੂੰ ਹਸਪਤਾਲ ਵਿੱਚ ਦਾਖਲ ਕਰਵਾਉਣਾ ਪਿਆ ਸੀ। ਇਹ ਘਟਨਾ ਮਾਰਚ 2024 ਵਿੱਚ ਪਾਪਾਟੋਏਟੋਏ ਵਿੱਚ ਇੱਕ ਟੈਂਕ ਟੈਸਟ ਸਹੂਲਤ ਵਿੱਚ ਵਾਪਰੀ ਸੀ, ਜਦੋਂ ਇੱਕ ਫੋਰਕਲਿਫਟ ਨੂੰ ਅੱਗ ਲੱਗ ਗਈ ਸੀ, ਜਿਸ ਨਾਲ ਸਿਲੰਡਰਾਂ ਤੋਂ ਨਿਕਲਣ ਵਾਲੀ ਤਰਲ ਪੈਟਰੋਲੀਅਮ ਗੈਸ (LPG) ਕਾਰਨ ਅੱਗ ਫੈਲ ਗਈ ਸੀ। ਦੱਸ ਦੇਈਏ ਅੱਗ ਕਾਰਨ ਕਈ 9 ਕਿਲੋਗ੍ਰਾਮ ਗੈਸ ਦੀਆਂ ਬੋਤਲਾਂ ਫਟ ਗਈਆਂ ਸਨ। ਡਰਾਈਵਰ ਨੂੰ ਨੌਂ ਹਫ਼ਤਿਆਂ ਤੱਕ ਕੰਮ ਤੋਂ ਛੁੱਟੀ ਲੈਣੀ ਪਈ ਸੀ।
ਮੈਨੂਕਾਊ ਜ਼ਿਲ੍ਹਾ ਅਦਾਲਤ ‘ਚ ਸਜ਼ਾ ਸੁਣਾਉਂਦੇ ਹੋਏ, ਜੱਜ ਗੁਸ ਐਂਡਰੀ ਵਿਲਟਨਸ ਨੇ ਕਿਹਾ ਕਿ ਖ਼ਤਰਾ “ਸਾਫ਼ ਅਤੇ ਸਪੱਸ਼ਟ” ਸੀ। ਉਨ੍ਹਾਂ ਕਿਹਾ ਕਿ ਕੰਪਨੀ ਫੋਰਕਲਿਫਟ ਅਤੇ ਡੀਗੈਸਿੰਗ ਓਪਰੇਸ਼ਨ ਇੱਕੋ ਸਮੇਂ ਕਦੇ ਨਾ ਹੋਣ ਨੂੰ ਯਕੀਨੀ ਬਣਾ ਕੇ “ਬਿਨਾਂ ਕਿਸੇ ਕੀਮਤ” ਦੇ ਜੋਖਮ ਨੂੰ ਖਤਮ ਕਰ ਸਕਦੀ ਸੀ। ਵਰਕਸੇਫ ਪ੍ਰਿੰਸੀਪਲ ਇੰਸਪੈਕਟਰ ਡੇਵਿਡ ਵਰਸਫੋਲਡ ਨੇ ਕਿਹਾ: “ਇਹ ਮਾਮਲਾ ਸਿਰਫ਼ ਜਲਣਸ਼ੀਲ ਗੈਸਾਂ ਬਾਰੇ ਨਹੀਂ ਹੈ। ਇਹ ਇੱਕ ਪੈਟਰਨ ਬਾਰੇ ਹੈ ਜੋ ਅਸੀਂ ਉਦਯੋਗਾਂ ਵਿੱਚ ਦੇਖਦੇ ਹਾਂ। ਕੰਪਨੀ ਨੂੰ $300,000 ਦਾ ਜੁਰਮਾਨਾ ਲਗਾਇਆ ਗਿਆ ਅਤੇ $5000 ਦਾ ਮੁਆਵਜ਼ਾ ਦੇਣ ਦਾ ਹੁਕਮ ਦਿੱਤਾ ਗਿਆ ਹੈ। ਵਰਸਫੋਲਡ ਨੇ ਕਿਹਾ ਕਿ ਇਸ ਮਾਮਲੇ ਨੇ ਕੰਪਨੀਆਂ ਲਈ ਸਬਕ ਉਜਾਗਰ ਕੀਤੇ ਹਨ।