Fire and Emergency New Zealand ਦੇ ਅਨੁਸਾਰ Auckland ਦੇ ਪੋਨਸਨਬੀ ਇਲਾਕੇ ‘ਚ ਪੈਟਰੋਲ ਪੰਪ ਦੇ ਨੇੜੇ ਲੱਗੀ ਭਿਆਨਕ ਅੱਗ ‘ਤੇ ਕਾਬੂ ਪਾ ਲਿਆ ਗਿਆ ਹੈ, ਹਾਲਾਂਕਿ ਅਜੇ ਤੱਕ ਅੱਗ ਨੂੰ ਪੂਰੀ ਤਰ੍ਹਾਂ ਬੁਝਾਇਆ ਨਹੀਂ ਜਾ ਸਕਿਆ। ਇਸ ਤੋਂ ਪਹਿਲਾਂ Ponsonby ਦੇ ਵਿਲੀਅਮਸਨ ਐਵੇਨਿਊ ‘ਤੇ ਸਥਿਤ Z ਪੈਟਰੋਲ ਸਟੇਸ਼ਨ ਦੇ ਨੇੜੇ ਇਲਾਕੇ ‘ਚੋਂ ਕਾਲਾ ਧੂੰਆਂ ਅਸਮਾਨ ਵੱਲ ਉੱਪਰ ਚੜ੍ਹਦਾ ਹੋਇਆ ਦਿਖਾਈ ਦਿੱਤਾ, ਜੋ ਦੂਰੋਂ ਵੀ ਨਜ਼ਰ ਆ ਰਿਹਾ ਸੀ। ਜਾਣਕਾਰੀ ਮੁਤਾਬਿਕ ਅੱਗ ਪੈਟਰੋਲ ਪੰਪ ਦੇ ਬਿਲਕੁਲ ਨਾਲ ਲੱਗਦੇ ਇੱਕ ਵਰਕਸ਼ਾਪ ਵਿੱਚ ਲੱਗੀ ਸੀ। FENZ ਨੂੰ ਇਸ ਘਟਨਾ ਬਾਰੇ ਦੁਪਹਿਰ 1:50 ਵਜੇ ਕਈ 111 ਕਾਲਾਂ ਰਾਹੀਂ ਸੂਚਨਾ ਮਿਲੀ।
ਮੌਕੇ ‘ਤੇ ਅੱਠ ਫਾਇਰ ਬ੍ਰਿਗੇਡ ਦੀਆਂ ਗੱਡੀਆਂ ਭੇਜੀਆਂ ਗਈਆਂ, ਜਿਨ੍ਹਾਂ ਵਿੱਚ ਦੋ ਆਮ ਪੌੜੀ ਵਾਲੇ ਅਤੇ ਇੱਕ ਲੰਬੀ ਪਹੁੰਚ ਵਾਲਾ ਲੈੱਡਰ ਟਰੱਕ ਵੀ ਸ਼ਾਮਿਲ ਸੀ। ਟੀਮਾਂ ਸਿਰਫ਼ ਛੇ ਮਿੰਟ ਵਿੱਚ ਮੌਕੇ ‘ਤੇ ਪਹੁੰਚ ਗਈਆਂ ਅਤੇ ਇਮਾਰਤ ਦੇ ਅੰਦਰੋਂ ਅੱਗ ‘ਤੇ ਕਾਬੂ ਪਾਉਣ ਦੀ ਕਾਰਵਾਈ ਸ਼ੁਰੂ ਕੀਤੀ। FENZ ਨੇ ਦੱਸਿਆ ਕਿ ਇਸ ਤਰ੍ਹਾਂ ਦੀ ਕਾਰਵਾਈ ਨਾਲ ਅੱਗ ਨੂੰ ਲਗਭਗ 30 ਮਿੰਟਾਂ ਵਿੱਚ ਫੈਲਣ ਤੋਂ ਰੋਕ ਲਿਆ ਗਿਆ ਸੀ। ਕਿਉਂਕਿ ਅੱਗ ਇੱਕ ਆਟੋਮੋਟਿਵ ਵਰਕਸ਼ਾਪ ਵਿੱਚ ਲੱਗੀ ਸੀ, ਇਸ ਲਈ ਫੋਮ ਟੈਂਡਰ ਵੀ ਭੇਜਿਆ ਗਿਆ।
ਸ਼ਹਿਰ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਅੱਗ ਬੁਝਾਉਣ ਵਾਲੀਆਂ ਟੀਮਾਂ ਮੌਕੇ ‘ਤੇ ਪਹੁੰਚੀਆਂ ਅਤੇ ਫਾਇਰ ਇਨਵੈਸਟੀਗੇਟਰ ਵੀ ਜਾਂਚ ਲਈ ਮੌਜੂਦ ਸਨ। ਅਧਿਕਾਰੀਆਂ ਦੇ ਅਨੁਸਾਰ ਜਦੋਂ ਰਾਹਤ ਟੀਮਾਂ ਮੌਕੇ ‘ਤੇ ਪਹੁੰਚੀਆਂ, ਤਾਂ ਇਮਾਰਤ ਵਿੱਚ ਕੋਈ ਵੀ ਮੌਜੂਦ ਨਹੀਂ ਸੀ ਅਤੇ ਨਾ ਹੀ ਕਿਸੇ ਦੇ ਜ਼ਖ਼ਮੀ ਹੋਣ ਦੀ ਕੋਈ ਖ਼ਬਰ ਹੈ।
ਇੱਕ ਗਵਾਹ ਨੇ ਕਿਹਾ, “ਮੈਨੂੰ ਨਹੀਂ ਪਤਾ ਕਿ ਅੱਗ ਵਿੱਚ ਕੀ ਸੜ ਰਿਹਾ ਹੈ, ਪਰ ਪੋਨਸਨਬੀ ਰੋਡ ਤੋਂ ਇਹ ਦ੍ਰਿਸ਼ ਬਹੁਤ ਹੀ ਭਿਆਨਕ ਦਿਖਾਈ ਦੇ ਰਿਹਾ ਸੀ। ਉਮੀਦ ਹੈ ਕਿ ਕੋਈ ਜ਼ਖ਼ਮੀ ਨਾ ਹੋਇਆ ਹੋਵੇ।” ਕਾਲੇ ਧੂੰਏਂ ਦਾ ਵੱਡਾ ਗੁੱਛਾ ਪੂਰੇ ਆਕਲੈਂਡ ਦੇ ਕਈ ਹਿੱਸਿਆਂ ਤੋਂ ਸਪੱਸ਼ਟ ਤੌਰ ‘ਤੇ ਦਿਖਾਈ ਦੇ ਰਿਹਾ ਸੀ।