ਮੱਧ-ਪੂਰਬ ਵਿੱਚ ਤਣਾਅ ਸ਼ੁਰੂ ਹੋਣ ਤੋਂ ਬਾਅਦ ਦੁਬਈ ਤੋਂ ਚੱਲੀ ਪਹਿਲੀ ਕਮਰਸ਼ੀਅਲ ਉਡਾਣ ਅੱਜ ਆਕਲੈਂਡ ਹਵਾਈ ਅੱਡੇ ’ਤੇ ਉਤਰ ਗਈ। ਐਮੀਰੇਟਸ ਏਅਰਲਾਈਨ ਨੇ ਮੱਧ-ਪੂਰਬ ਵਿੱਚ ਹਵਾਈ ਖੇਤਰ ਹੌਲੀ-ਹੌਲੀ ਖੁਲ੍ਹਣ ਤੋਂ ਬਾਅਦ ਨਿਊਜ਼ੀਲੈਂਡ ਲਈ ਆਪਣੀਆਂ ਸਾਰੀਆਂ ਉਡਾਣਾਂ ਮੁੜ ਸ਼ੁਰੂ ਕਰ ਦਿੱਤੀਆਂ ਹਨ। ਇਹ ਹਵਾਈ ਖੇਤਰ ਉਸ ਵੇਲੇ ਬੰਦ ਕਰ ਦਿੱਤੇ ਗਏ ਸਨ ਜਦੋਂ 28 ਫਰਵਰੀ ਨੂੰ ਅਮਰੀਕਾ ਅਤੇ ਇਸਰਾਈਲ ਵੱਲੋਂ ਇਰਾਨ ’ਤੇ ਹਮਲਾ ਕੀਤਾ ਗਿਆ ਸੀ। ਐਮੀਰੇਟਸ ਦੀ ਫਲਾਈਟ EK448 ਸ਼ਨੀਵਾਰ ਸਵੇਰੇ ਲਗਭਗ 11:30 ਵਜੇ ਆਕਲੈਂਡ ਪਹੁੰਚੀ, ਜਦਕਿ ਦੂਜੀ ਉਡਾਣ ਦੁਪਹਿਰ ਬਾਅਦ ਕਰਾਇਸਚਰਚ ਪਹੁੰਚਣ ਦੀ ਉਮੀਦ ਸੀ।
ਆਕਲੈਂਡ ਹਵਾਈ ਅੱਡੇ ’ਤੇ ਉਤਰਦੇ ਸਮੇਂ ਯਾਤਰੀਆਂ ਦਾ ਉਨ੍ਹਾਂ ਦੇ ਪਰਿਵਾਰਕ ਮੈਂਬਰਾਂ ਵੱਲੋਂ ਸਵਾਗਤ ਕੀਤਾ ਗਿਆ। ਲੇਓਨੀ ਰੈਮਜ਼ੇ ਨੇ ਕਿਹਾ ਕਿ ਘਰ ਵਾਪਸ ਆਉਣਾ ਬਹੁਤ ਵਧੀਆ ਮਹਿਸੂਸ ਹੋ ਰਿਹਾ ਹੈ, ਜਦਕਿ ਉਨ੍ਹਾਂ ਦੇ ਪਤੀ ਡੇਵਿਡ ਨੇ ਵੀ ਇਸੇ ਤਰ੍ਹਾਂ ਦੀ ਭਾਵਨਾ ਜ਼ਾਹਿਰ ਕੀਤੀ। ਉਨ੍ਹਾਂ ਨੇ ਕਿਹਾ, “ਉੱਥੇ ਮਾਹੌਲ ਕੁਝ ਤਣਾਅ ਭਰਿਆ ਸੀ।” ਰੈਮਜ਼ੇ ਨੇ ਦੱਸਿਆ ਕਿ ਜਹਾਜ਼ ਵਿੱਚ ਲਗਭਗ 35 ਯਾਤਰੀ ਹੀ ਸਨ, ਕਿਉਂਕਿ ਉਡਾਣ ਦੀ ਪੁਸ਼ਟੀ ਉਡਾਣ ਤੋਂ ਸਿਰਫ ਕੁਝ ਘੰਟੇ ਪਹਿਲਾਂ ਹੀ ਹੋਈ ਸੀ।
ਉਨ੍ਹਾਂ ਨੇ ਕਿਹਾ, “ਮੈਂ ਉਠੀ ਤੇ ਫੋਨ ’ਤੇ ਸੁਨੇਹਾ ਆਇਆ ਕਿ ਆਪਣੀ ਸੀਟ ਚੁਣੋ, ਤਾਂ ਮੈਂ ਤੁਰੰਤ ਬੁਕ ਕਰ ਲਈ।” ਰੈਬੇਕਾ ਫਲੇਮਿੰਗ ਅਤੇ ਉਸਦੇ ਬੱਚਿਆਂ ਲਈ ਘਰ ਵਾਪਸੀ ਮਿਲੀ-ਜੁਲੀ ਭਾਵਨਾਵਾਂ ਵਾਲੀ ਰਹੀ, ਕਿਉਂਕਿ ਉਸਨੂੰ ਆਪਣਾ ਪਤੀ ਦੁਬਈ ਵਿੱਚ ਹੀ ਛੱਡ ਕੇ ਆਉਣਾ ਪਿਆ। ਉਹ ਪਿਛਲੇ 14 ਸਾਲਾਂ ਤੋਂ ਮੱਧ-ਪੂਰਬ ਵਿੱਚ ਰਹਿ ਰਹੀ ਸੀ। ਉਨ੍ਹਾਂ ਨੇ ਦੱਸਿਆ, “ਸਾਡੇ ਘਰ ਦੇ ਉੱਪਰ ਮਿਸਾਈਲਾਂ ਨੂੰ ਰੋਕਿਆ ਗਿਆ ਸੀ। ਇਹ ਬਹੁਤ ਡਰਾਉਣਾ ਸੀ ਅਤੇ ਬੱਚਿਆਂ ਨੂੰ ਹਾਲਾਤ ਸਮਝਾਉਣਾ ਵੀ ਮੁਸ਼ਕਿਲ ਸੀ।”
ਹਾਲਾਂਕਿ ਫਲੇਮਿੰਗ ਅਤੇ ਹੋਰ ਕਈ ਯਾਤਰੀਆਂ ਨੇ ਕਿਹਾ ਕਿ ਦੁਬਈ ਵਿੱਚ ਕੋਈ ਜਿਆਦਾ ਘਬਰਾਹਟ ਨਹੀਂ ਸੀ। ਉਨ੍ਹਾਂ ਨੇ ਕਿਹਾ, “ਭਾਵੇਂ ਡਰ ਸੀ, ਪਰ ਉਨ੍ਹਾਂ ਨੇ ਹਾਲਾਤ ਬਹੁਤ ਚੰਗੀ ਤਰ੍ਹਾਂ ਸੰਭਾਲੇ। ਕੋਈ ਅਫ਼ਰਾਤਫ਼ਰੀ ਨਹੀਂ ਸੀ।” ਲੂਈਜ਼ ਯੂਲ, ਜੋ ਐਡਿਨਬਰਗ ਤੋਂ ਯਾਤਰਾ ਕਰਦੇ ਸਮੇਂ ਕੁਝ ਦਿਨਾਂ ਲਈ ਦੁਬਈ ਵਿੱਚ ਫਸ ਗਈ ਸੀ, ਗੱਲਬਾਤ ਕਰਦਿਆਂ ਉਨ੍ਹਾਂ ਕਿਹਾ ਕਿ ਕੁਝ ਲੋਕ ਮਿਸਾਈਲ ਅਲਾਰਮਾਂ ਨੂੰ ਵੀ ਜ਼ਿਆਦਾ ਗੰਭੀਰਤਾ ਨਾਲ ਨਹੀਂ ਲੈ ਰਹੇ ਸਨ। ਉਸਨੇ ਕਿਹਾ, “ਲਗਭਗ ਹਰ ਘੰਟੇ ਅਲਾਰਮ ਵੱਜਦੇ ਸਨ, ਪਰ ਜਦੋਂ ਮੈਂ ਖਿੜਕੀ ਤੋਂ ਬਾਹਰ ਵੇਖਿਆ ਤਾਂ ਹੇਠਾਂ ਸਮੁੰਦਰ ਕਿਨਾਰੇ ਲੋਕ ਆਰਾਮ ਨਾਲ ਧੁੱਪ ਸੇਕ ਰਹੇ ਸਨ।” ਐਮੀਰੇਟਸ ਦੀ ਫਲਾਈਟ EK412 ਸਿਡਨੀ ਰਾਹੀਂ ਕਰਾਇਸਟਚਰਚ ਪਹੁੰਚਣ ਲਈ ਤਕਰੀਬਨ ਦੁਪਹਿਰ 2 ਵਜੇ ਤੋਂ ਬਾਅਦ ਆਉਣੀ ਸੀ।