Cook Strait ਵਿੱਚ ਤੇਜ਼ ਲਹਿਰਾਂ ਅਤੇ ਤੇਜ਼ ਰਫ਼ਤਾਰ ਦੱਖਣੀ ਹਵਾਵਾਂ ਕਾਰਨ ਅੱਜ ਫੈਰੀ ਸੇਵਾਵਾਂ ਵਿੱਚ ਦੇਰੀ ਹੋ ਰਹੀ ਹੈ। MetService ਦੇ ਮੌਸਮ ਵਿਗਿਆਨੀ Lewis Ferris ਨੇ ਕਿਹਾ ਕਿ ਵੇਲਿੰਗਟਨ ਖੇਤਰ ਵਿੱਚ ਠੰਡੀਆਂ ਹਵਾਵਾਂ ਮੌਸਮੀ ਤਬਦੀਲੀ ਦਾ ਸਪੱਸ਼ਟ ਸੰਕੇਤ ਹਨ ਅਤੇ ਮੌਸਮੀ ਪਤਝੜ ਦੀ ਸ਼ੁਰੂਆਤ ਹੋ ਚੁੱਕੀ ਹੈ। Wellington ਅਤੇ ਨੀਵੇਂ ਉੱਤਰੀ ਟਾਪੂ ਦੇ ਕਈ ਹਿੱਸਿਆਂ ਵਿੱਚ ਅੱਜ ਹਫ਼ਤੇ ਦੀ ਸ਼ੁਰੂਆਤ ਠੰਡੀ ਦੱਖਣ-ਪੂਰਬੀ ਤੇਜ਼ ਹਵਾਵਾਂ, ਮੀਂਹ ਅਤੇ ਗੜਿਆ ਨਾਲ ਹੋਈ ਹੈ।
ਫੈਰਿਸ ਨੇ ਕਿਹਾ ਕਿ ਮੌਜੂਦਾ ਮੌਸਮ ਇਹ ਦਰਸਾਉਂਦਾ ਹੈ ਕਿ ਸਰਦੀ ਹੁਣ ਜ਼ਿਆਦਾ ਦੂਰ ਨਹੀਂ। ਉਨ੍ਹਾਂ ਮੁਤਾਬਿਕ ਦੇਸ਼ ਦੇ ਵੱਧਤਰ ਹਿੱਸਿਆਂ ਵਿੱਚ ਅੱਜ ਅਤੇ ਬੁੱਧਵਾਰ ਸਵੇਰੇ ਤਾਪਮਾਨ ਆਮ ਤੋਂ ਘੱਟ ਰਹਿਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਕਿਹਾ, “ਕੁਝ ਥਾਵਾਂ ‘ਤੇ ਕੱਲ੍ਹ ਸਵੇਰੇ ਤਾਪਮਾਨ ਕੁਝ ਵੱਧ ਸਕਦਾ ਹੈ। ਖ਼ਾਸ ਕਰਕੇ Central Otago ਅਤੇ Southland ਵਿੱਚ ਗਰਮੀ ਵਧਣੀ ਸ਼ੁਰੂ ਹੋਵੇਗੀ, ਜੋ ਕੰਮਕਾਜੀ ਹਫ਼ਤੇ ਦੇ ਬਾਕੀ ਦਿਨਾਂ ਲਈ ਰੁਝਾਨ ਦਰਸਾਉਂਦੀ ਹੈ। ਵੀਰਵਾਰ ਅਤੇ ਸ਼ੁੱਕਰਵਾਰ ਤੱਕ ਤਾਪਮਾਨ ਦੁਬਾਰਾ ਆਮ ਤੋਂ ਉੱਪਰ ਜਾਣ ਦੀ ਉਮੀਦ ਹੈ।”
ਹਵਾਈ ਯਾਤਰਾ ‘ਚ ਵੀ ਮੌਸਮੀ ਹਾਲਾਤਾਂ ਦਾ ਅਸਰ ਵੇਖਣ ਨੂੰ ਮਿਲਿਆ। ਅੱਜ ਸਵੇਰੇ Jetstar ਦੀ ਆਕਲੈਂਡ ਤੋਂ ਵੇਲਿੰਗਟਨ ਜਾਣ ਵਾਲੀ ਉਡਾਣ ਨੂੰ ਤੇਜ਼ ਹਵਾਵਾਂ ਕਾਰਨ Christchurch ਵੱਲ ਮੋੜਨਾ ਪਿਆ।