New Zealand ਵਿੱਚ ਤਿੰਨ ਪ੍ਰਵਾਸੀਆਂ ਨਾਲ ਨੌਕਰੀ ਦੇ ਨਾਂ ‘ਤੇ ਧੋਖਾਧੜੀ ਦਾ ਗੰਭੀਰ ਮਾਮਲਾ ਸਾਹਮਣੇ ਆਇਆ ਹੈ। ਸਾਬਕਾ ਲਾਇਸੰਸ ਪ੍ਰਾਪਤ ਇਮੀਗ੍ਰੇਸ਼ਨ ਸਲਾਹਕਾਰ Tzu Tong Ma (ਜੋ Jane Ma ਅਤੇ Zi Tong Ma ਨਾਮਾਂ ਨਾਲ ਵੀ ਜਾਣੀ ਜਾਂਦੀ ਹੈ) ਨੂੰ Immigration Act 2009 ਹੇਠ ਤਿੰਨ ਦੋਸ਼ਾਂ ਵਿੱਚ 10 ਮਹੀਨੇ ਦੀ ਹੋਮ ਡਿਟੇਨਸ਼ਨ ਦੀ ਸਜ਼ਾ ਸੁਣਾਈ ਗਈ ਹੈ। ਮਾਮਲੇ ਅਨੁਸਾਰ, ਦੋਸ਼ੀ ਨੇ ਤਿੰਨ ਚੀਨੀ ਨਾਗਰਿਕਾਂ ਨੂੰ ਇਹ ਯਕੀਨ ਦਿਵਾਇਆ ਕਿ ਉਨ੍ਹਾਂ ਲਈ ਨਿਊਜ਼ੀਲੈਂਡ ਵਿੱਚ ਕਨਸਟਰਕਸ਼ਨ ਖੇਤਰ ਵਿੱਚ ਪੱਕੀਆਂ ਨੌਕਰੀਆਂ ਤਿਆਰ ਹਨ। ਇਸ ਲਈ ਫਰਜ਼ੀ ਜਾਬ ਆਫਰ ਲੇਟਰ ਅਤੇ ਸਮਝੌਤੇ ਤਿਆਰ ਕਰਕੇ ਵੀਜ਼ਾ ਅਰਜ਼ੀਆਂ ਦਾਇਰ ਕੀਤੀਆਂ ਗਈਆਂ। ਫਰਵਰੀ 2023 ਵਿੱਚ ਤਿੰਨ Accredited Employer Work Visa ਅਰਜ਼ੀਆਂ ਵਿੱਚ ਝੂਠੀ ਰੋਜ਼ਗਾਰ ਜਾਣਕਾਰੀ ਸ਼ਾਮਿਲ ਕੀਤੀ ਗਈ।
Immigration New Zealand (INZ) ਦੇ ਅਨੁਸਾਰ, ਪ੍ਰਵਾਸੀਆਂ ਨੇ ਵੱਡੀ ਰਕਮ ਅਦਾ ਕੀਤੀ ਸੀ, ਪਰ ਜਦੋਂ ਉਹ ਦੇਸ਼ ਪਹੁੰਚੇ ਤਾਂ ਉਨ੍ਹਾਂ ਲਈ ਕੋਈ ਅਸਲੀ ਨੌਕਰੀ ਮੌਜੂਦ ਨਹੀਂ ਸੀ। INZ ਦੇ ਇਮੀਗ੍ਰੇਸ਼ਨ ਕਾਂਪਲਾਇੰਸ ਅਤੇ ਜਾਂਚ ਵਿਭਾਗ ਦੇ ਜਨਰਲ ਮੈਨੇਜਰ ਸਟੀਵ ਵਾਟਸਨ ਨੇ ਕਿਹਾ ਕਿ ਇਹ ਮਾਮਲਾ ਦਰਸਾਉਂਦਾ ਹੈ ਕਿ ਕੁਝ ਲੋਕ ਆਪਣੇ ਪੇਸ਼ਾਵਰ ਦਰਜੇ ਦਾ ਗਲਤ ਫਾਇਦਾ ਚੁੱਕ ਕੇ ਪ੍ਰਵਾਸੀਆਂ ਦਾ ਸ਼ੋਸ਼ਣ ਕਰਦੇ ਹਨ। ਉਨ੍ਹਾਂ ਨੇ ਚਿਤਾਵਨੀ ਦਿੱਤੀ ਕਿ ਝੂਠੇ ਜਾਬ ਆਫਰਾਂ ਜਾਂ ਵੀਜ਼ਾ ਸਹਾਇਤਾ ਦੇ ਨਾਂ ‘ਤੇ ਧੋਖਾਧੜੀ ਕਰਨ ਵਾਲਿਆਂ ਖ਼ਿਲਾਫ਼ ਸਖ਼ਤ ਕਾਰਵਾਈ ਜਾਰੀ ਰਹੇਗੀ।
ਅਧਿਕਾਰੀਆਂ ਨੇ ਅਪੀਲ ਕੀਤੀ ਹੈ ਕਿ ਜੇ ਕਿਸੇ ਨੂੰ ਵੀ ਜਾਬ ਆਫਰ ਜਾਂ ਵੀਜ਼ਾ ਸਬੰਧੀ ਕੋਈ ਸ਼ੱਕ ਹੋਵੇ ਜਾਂ ਉਹ ਆਪਣੇ ਆਪ ਨੂੰ ਠੱਗਿਆ ਗਿਆ ਮਹਿਸੂਸ ਕਰੇ, ਤਾਂ ਤੁਰੰਤ ਸਬੰਧਿਤ ਅਧਿਕਾਰੀਆਂ ਨੂੰ ਸੂਚਿਤ ਕੀਤਾ ਜਾਵੇ ਤਾਂ ਜੋ ਹੋਰ ਲੋਕਾਂ ਨੂੰ ਇਸ ਤਰ੍ਹਾਂ ਦੀ ਠੱਗੀ ਤੋਂ ਬਚਾਇਆ ਜਾ ਸਕੇ।