ਇਮੀਗ੍ਰੇਸ਼ਨ ਸਕੈਮ ਨਾਲ ਜੁੜੀ ਇੱਕ ਵੱਡੀ ਖ਼ਬਰ ਸਾਹਮਣੇ ਆਈ ਹੈ। ਦਰਅਸਲ Immigration New Zealand (INZ) ਨੇ ਆਮ ਲੋਕਾਂ ਨੂੰ ਚਿਤਾਵਨੀ ਜਾਰੀ ਕੀਤੀ ਹੈ ਕਿ ਹਾਲ ਹੀ ‘ਚ ਇਮੀਗ੍ਰੇਸ਼ਨ ਨਾਲ ਜੁੜੀਆਂ ਨਕਲੀ ਫ਼ੋਨ ਕਾਲਾਂ ਤੇਜ਼ੀ ਨਾਲ ਵਧ ਰਹੀਆਂ ਹਨ। ਇਹ ਕਾਲਾਂ ਕਰਨ ਵਾਲੇ ਆਪਣੇ ਆਪ ਨੂੰ INZ ਦਾ ਕਰਮਚਾਰੀ ਦੱਸਦੇ ਹਨ ਅਤੇ ਨਿਊਜ਼ੀਲੈਂਡ ਦੇ ਮੋਬਾਈਲ ਨੰਬਰ ਵਰਤ ਕੇ ਲੋਕਾਂ ਨੂੰ ਭਰਮਾਉਂਦੇ ਹਨ, ਪਰ ਇਹ ਕਾਲਾਂ ਫੇਕ ਹਨ ਅਤੇ ਇਹਨਾਂ ਜ਼ਰੀਏ ਲੋਕਾਂ ਨੂੰ ਸ਼ਿਕਾਰ ਬਣਾਇਆ ਜਾ ਰਿਹਾ ਹੈ। INZ ਨੇ ਚਿਤਾਵਨੀ ਜਾਰੀ ਕਰਦਿਆਂ ਸਪਸ਼ਟ ਕੀਤਾ ਕਿ ਉਹ ਕਦੇ ਵੀ ਫ਼ੋਨ ‘ਤੇ ਭੁਗਤਾਨ ਕਰਨ ਲਈ ਨਹੀਂ ਕਹਿੰਦੇ। ਠੱਗ ਅਕਸਰ ਕਹਿੰਦੇ ਹਨ ਕਿ ਤੁਹਾਡੇ ਵੀਜ਼ੇ ਨਾਲ ਤੁਰੰਤ ਕੋਈ ਸਮੱਸਿਆ ਹੈ, ਡਰ ਅਤੇ ਦਬਾਅ ਬਣਾਉਣ ਲਈ “press 1” ਕਰਨ ਜਾਂ ਕਿਸੇ ਆਪਰੇਟਰ ਨਾਲ ਗੱਲ ਕਰਨ ਨੂੰ ਕਹਿੰਦੇ ਹਨ। ਕੁਝ ਮਾਮਲਿਆਂ ਵਿੱਚ ਉਹ ਪੈਸੇ ਦੀ ਮੰਗ ਕਰਦੇ, ਪਾਸਪੋਰਟ ਜਾਂ ਬੈਂਕ ਡੀਟੇਲਾਂ ਵਰਗੀ ਨਿੱਜੀ ਜਾਣਕਾਰੀ ਲੈਣ ਦੀ ਕੋਸ਼ਿਸ਼ ਕਰਦੇ ਹਨ, ਜਾਂ ਕਾਨੂੰਨੀ ਕਾਰਵਾਈ ਦੀ ਧਮਕੀ ਦਿੰਦੇ ਹਨ। ਅਧਿਕਾਰੀਆਂ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਅਜਿਹੀਆਂ ਕਾਲਾਂ ‘ਤੇ ਕੋਈ ਵੀ ਜਾਣਕਾਰੀ ਸਾਂਝੀ ਨਾ ਕੀਤੀ ਜਾਵੇ। ਜੇ ਕਿਸੇ ਵੀਜ਼ਾ ਧਾਰਕ ਨੂੰ ਅਜਿਹੀ ਕਾਲ ਤੋਂ ਬਾਅਦ ਆਪਣੇ ਵੀਜ਼ੇ ਦੀ ਸਥਿਤੀ ਬਾਰੇ ਸ਼ੱਕ ਹੋਵੇ, ਤਾਂ ਉਹ ਸਿੱਧਾ INZ Service Centre ਨਾਲ ਸੰਪਰਕ ਕਰ ਸਕਦੇ ਹਨ। ਉੱਥੇ ਸਟਾਫ਼ ਤੁਹਾਡੀ ਜਾਣਕਾਰੀ ਦੀ ਪੁਸ਼ਟੀ ਕਰਕੇ ਵੀਜ਼ੇ ਨਾਲ ਜੁੜੇ ਸਾਰੇ ਸਵਾਲਾਂ ਦੇ ਜਵਾਬ ਦੇਵੇਗਾ।
