ਬਰਮਿੰਘਮ ਟੈਸਟ ਦੇ ਦੂਜੇ ਦਿਨ ਦੇ ਅੰਤ ਤੱਕ, ਇੰਗਲੈਂਡ ਨੇ 3 ਵਿਕਟਾਂ ਦੇ ਨੁਕਸਾਨ ‘ਤੇ 77 ਦੌੜਾਂ ਬਣਾ ਲਈਆਂ ਹਨ। ਇੰਗਲੈਂਡ ਦੀ ਟੀਮ ਅਜੇ ਵੀ ਪਹਿਲੀ ਪਾਰੀ ਵਿੱਚ 510 ਦੌੜਾਂ ਨਾਲ ਪਿੱਛੇ ਹੈ। ਭਾਰਤੀ ਟੀਮ ਨੇ ਸ਼ੁਭਮਨ ਗਿੱਲ ਦੇ ਦੋਹਰੇ ਸੈਂਕੜੇ ਦੀ ਬਦੌਲਤ ਪਹਿਲੀ ਪਾਰੀ ਵਿੱਚ 587 ਦੌੜਾਂ ਦਾ ਵੱਡਾ ਸਕੋਰ ਬਣਾਇਆ ਹੈ। ਜੋ ਰੂਟ ਅਤੇ ਹੈਰੀ ਬਰੂਕ ਨੇ ਇੰਗਲੈਂਡ ਲਈ ਕਮਾਨ ਸੰਭਾਲੀ ਹੋਈ ਹੈ।
ਦੂਜੇ ਦਿਨ, ਭਾਰਤੀ ਟੀਮ ਨੇ ਆਪਣਾ ਸਕੋਰ 310/5 ਤੋਂ ਸ਼ੁਰੂ ਕੀਤਾ ਸੀ। ਕਪਤਾਨ ਗਿੱਲ ਨੇ ਪਹਿਲੇ ਦਿਨ ਹੀ ਆਪਣਾ ਸੈਂਕੜਾ ਪੂਰਾ ਕਰ ਲਿਆ ਸੀ। ਗਿੱਲ ਅਤੇ ਜਡੇਜਾ ਵਿਚਕਾਰ 203 ਦੌੜਾਂ ਦੀ ਸਾਂਝੇਦਾਰੀ ਹੋਈ, ਪਰ ਜਡੇਜਾ ਜੋਸ਼ ਟੰਗ ਦੇ ਤੇਜ਼ ਬਾਊਂਸਰ ‘ਤੇ ਫਸ ਗਿਆ ਅਤੇ 89 ਦੇ ਸਕੋਰ ‘ਤੇ ਆਪਣੀ ਵਿਕਟ ਗੁਆ ਬੈਠਾ। ਵਾਸ਼ਿੰਗਟਨ ਸੁੰਦਰ ਭਾਰਤੀ ਹੇਠਲੇ ਕ੍ਰਮ ਦੀ ਬੱਲੇਬਾਜ਼ੀ ਨੂੰ ਮਜ਼ਬੂਤ ਕਰਨ ਲਈ ਟੀਮ ਵਿੱਚ ਆਇਆ ਸੀ, ਉਸਨੇ ਵੀ ਅਜਿਹਾ ਹੀ ਕੀਤਾ ਅਤੇ ਗਿੱਲ ਨਾਲ 42 ਦੌੜਾਂ ਬਣਾ ਕੇ 144 ਦੌੜਾਂ ਦੀ ਸਾਂਝੇਦਾਰੀ ਕੀਤੀ।
ਸ਼ੁਭਮਨ ਗਿੱਲ ਨੇ 269 ਦੌੜਾਂ ਦੀ ਪਾਰੀ ਖੇਡਦੇ ਹੋਏ ਕਈ ਇਤਿਹਾਸਕ ਰਿਕਾਰਡ ਤੋੜ ਦਿੱਤੇ। ਉਹ ਇੰਗਲੈਂਡ ਵਿੱਚ ਕਿਸੇ ਭਾਰਤੀ ਬੱਲੇਬਾਜ਼ ਵੱਲੋਂ ਸਭ ਤੋਂ ਵੱਧ ਸਕੋਰ ਬਣਾਉਣ ਵਾਲਾ ਖਿਡਾਰੀ ਬਣ ਗਿਆ ਹੈ। ਉਸਨੇ ਸੁਨੀਲ ਗਾਵਸਕਰ ਦਾ 221 ਦੌੜਾਂ ਦਾ ਰਿਕਾਰਡ ਤੋੜਿਆ ਹੈ। ਗਿੱਲ ਟੈਸਟ ਕ੍ਰਿਕਟ ਵਿੱਚ 250+ ਦੌੜਾਂ ਬਣਾਉਣ ਵਾਲਾ ਸਿਰਫ਼ ਛੇਵਾਂ ਭਾਰਤੀ ਬੱਲੇਬਾਜ਼ ਵੀ ਬਣ ਗਿਆ ਹੈ। ਗਿੱਲ ਨੇ ਆਪਣੀ ਇਤਿਹਾਸਕ ਪਾਰੀ ਵਿੱਚ 30 ਚੌਕੇ ਅਤੇ 3 ਛੱਕੇ ਲਗਾਏ। ਇਸ ਮਗਰੋਂ ਭਾਰਤੀ ਗੇਂਦਬਾਜ਼ਾਂ ਨੇ ਸ਼ੁਰੂ ਤੋਂ ਹੀ ਗੇਂਦਬਾਜ਼ੀ ‘ਚ ਅਟੈਕ ਕਰਨਾ ਸ਼ੁਰੂ ਕਰ ਦਿੱਤਾ, ਨਤੀਜੇ ਵੱਜੋਂ ਆਕਾਸ਼ਦੀਪ ਨੇ ਡਕੇਟ ਅਤੇ ਫਿਰ ਅਗਲੀ ਹੀ ਗੇਂਦ ‘ਤੇ ਓਲੀ ਪੋਪ ਨੂੰ ਆਊਟ ਕਰ ਦਿੱਤਾ।