ਨਿਊਜ਼ੀਲੈਂਡ ਦੇ ਮਸ਼ਹੂਰ ਕਾਰੋਬਾਰੀ Sid Sahrawat ਅਤੇ Chand Sahrawat ਦੁਬਈ ਵਿੱਚ ਹਵਾਈ ਖੇਤਰ ਬੰਦ ਹੋਣ ਅਤੇ ਸ਼ਹਿਰ ਵਿੱਚ ਹਮਲਿਆਂ ਦੀਆਂ ਖ਼ਬਰਾਂ ਦਰਮਿਆਨ ਫਸ ਗਏ ਹਨ। ਆਕਲੈਂਡ ਦਾ ਇਹ ਪ੍ਰਸਿੱਧ ਜੋੜਾ ਕਾਰੋਬਾਰੀ ਦੌਰੇ ‘ਤੇ ਦੁਬਈ ਗਿਆ ਹੋਇਆ ਸੀ ਅਤੇ ਸੋਮਵਾਰ ਨੂੰ ਭਾਰਤ ਵਿੱਚ ਕੂਲਿਨਰੀ ਟੂਰ ਸ਼ੁਰੂ ਕਰਨ ਲਈ ਉਡਾਣ ਭਰਨੀ ਸੀ। ਚਾਂਦ ਸਾਹਰਾਵਤ ਨੇ ਦੱਸਿਆ ਕਿ ਅੱਧੀ ਰਾਤ ਤੋਂ ਥੋੜ੍ਹੀ ਦੇਰ ਬਾਅਦ ਉਨ੍ਹਾਂ ਨੂੰ ਐਲਰਟ ਮੈਸੇਜ ਮਿਲਿਆ ਅਤੇ ਉਸ ਤੋਂ ਬਾਅਦ ਧਮਾਕਿਆਂ ਦੀਆਂ ਆਵਾਜ਼ਾਂ ਸੁਣੀਆਂ ਗਈਆਂ। ਉਨ੍ਹਾਂ ਕਿਹਾ ਕਿ, “ਅਸੀਂ ਦੋ-ਤਿੰਨ ਧਮਾਕੇ ਸੁਣੇ ਅਤੇ ਸਵੇਰੇ ਉੱਠ ਕੇ ਪਤਾ ਲੱਗਿਆ ਕਿ ਹਵਾਈ ਅੱਡੇ ਨੂੰ ਨਿਸ਼ਾਨਾ ਬਣਾਇਆ ਗਿਆ ਹੈ ਅਤੇ ਬੁਰਜ ਅਲ ਅਰਬ ‘ਤੇ ਵੀ ਹਮਲੇ ਦੀ ਖ਼ਬਰ ਹੈ।”
Burj Al Arab ਸ਼ਹਿਰ ਦੀ ਇੱਕ ਪ੍ਰਸਿੱਧ ਇਮਾਰਤ ਹੈ। ਸਿਡ ਸਾਹਰਾਵਤ ਨੇ ਕਿਹਾ ਕਿ ਸ਼ਹਿਰ ਦੇ ਇੱਕ ਹੋਟਲ ‘ਤੇ ਵੀ ਪਹਿਲਾਂ ਹਮਲੇ ਦੀ ਰਿਪੋਰਟ ਆਈ ਸੀ, ਜਿਸਨੂੰ ਉਨ੍ਹਾਂ ਨੇ “ਡਰਾਉਣਾ” ਕਰਾਰ ਦਿੱਤਾ। ਐਲਰਟ ਜਾਰੀ ਹੋਣ ਤੋਂ ਬਾਅਦ ਸੜਕਾਂ ਕਾਫ਼ੀ ਸੁਨੀਆਂ ਦਿਖਾਈ ਦਿੱਤੀਆਂ ਅਤੇ ਬਹੁਤ ਸਾਰੇ ਲੋਕ ਸੁਰੱਖਿਆ ਵਜੋਂ ਘਰਾਂ ਅੰਦਰ ਹੀ ਰਹੇ। ਚਾਂਦ ਸਾਹਰਾਵਤ ਨੇ ਕਿਹਾ, “ਇਹ ਸਾਰਾ ਮਾਹੌਲ ਬਿਲਕੁਲ ਅਜੀਬ ਅਤੇ ਅਸਲੀਅਤ ਤੋਂ ਪਰੇ ਲੱਗ ਰਿਹਾ ਹੈ। ਅਸੀਂ ਕਦੇ ਵੀ ਐਸੀ ਸਥਿਤੀ ਵਿੱਚ ਨਹੀਂ ਰਹੇ ਜਿੱਥੇ ਜੰਗ ਕਾਰਨ ਕਿਸੇ ਦੇਸ਼ ਨੂੰ ਲੌਕਡਾਊਨ ਕਰਨਾ ਪਵੇ।”
ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਨੇ ਨਿਊਜ਼ੀਲੈਂਡ ਸਰਕਾਰ ਦੀ ਸੇਫਟ੍ਰੈਵਲ ਵੈੱਬਸਾਈਟ ‘ਤੇ ਆਪਣੀ ਜਾਣਕਾਰੀ ਦਰਜ ਕਰਵਾ ਦਿੱਤੀ ਹੈ, ਪਰ ਅਜੇ ਤੱਕ ਅਧਿਕਾਰੀਆਂ ਵੱਲੋਂ ਕੋਈ ਸਿੱਧਾ ਸੰਪਰਕ ਨਹੀਂ ਹੋਇਆ। ਅੰਗਰੇਜ਼ੀ ਭਾਸ਼ਾ ਵਿੱਚ ਸਥਾਨਕ ਖ਼ਬਰਾਂ ਦੀ ਕਵਰੇਜ ਸੀਮਿਤ ਹੋਣ ਕਰਕੇ ਭਰੋਸੇਯੋਗ ਜਾਣਕਾਰੀ ਹਾਸਿਲ ਕਰਨੀ ਮੁਸ਼ਕਿਲ ਹੋ ਰਹੀ ਹੈ ਅਤੇ ਉਹ ਅੰਤਰਰਾਸ਼ਟਰੀ ਮੀਡੀਆ ਅਤੇ ਆਨਲਾਈਨ ਰਿਪੋਰਟਾਂ ‘ਤੇ ਨਿਰਭਰ ਹਨ। ਖੇਤਰ ਵਿੱਚ ਵਧ ਰਹੇ ਤਣਾਅ ਦੇ ਮੱਦੇਨਜ਼ਰ ਮੱਧ ਪੂਰਬ ਦੇ ਕਈ ਹਿੱਸਿਆਂ ਵਿੱਚ ਹਵਾਈ ਆਵਾਜਾਈ ਪ੍ਰਭਾਵਿਤ ਹੋਈ ਹੈ।
ਚਾਂਦ ਸਾਹਰਾਵਤ ਨੇ ਕਿਹਾ ਕਿ ਦੁਬਈ ਏਅਰਪੋਰਟ ਦੀ ਬੰਦਸ਼ ਸਭ ਤੋਂ ਵੱਧ ਚਿੰਤਾਜਨਕ ਹੈ। ਉਨ੍ਹਾਂ ਕਿਹਾ ਕਿ, “ਸੁਰੱਖਿਆ ਲਈ ਹਵਾਈ ਖੇਤਰ ਬੰਦ ਕਰਨਾ ਇੱਕ ਗੱਲ ਹੈ,” “ਪਰ ਜੇ ਹਵਾਈ ਅੱਡੇ ਨੂੰ ਹੀ ਨਿਸ਼ਾਨਾ ਬਣਾਇਆ ਜਾਵੇ ਤਾਂ ਇਹ ਡਰਾਉਣਾ ਹੈ। ਸਾਨੂੰ ਨਹੀਂ ਪਤਾ ਕਿ ਅਸੀਂ ਕਦੋਂ ਇੱਥੋਂ ਨਿਕਲ ਸਕਾਂਗੇ।” ਜੋੜੇ ਦੇ ਬੱਚੇ ਇਸ ਸਮੇਂ ਨਿਊਜ਼ੀਲੈਂਡ ਵਿੱਚ ਹਨ। ਚਾਂਦ ਸਾਹਰਾਵਤ ਨੇ ਕਿਹਾ ਕਿ ਉਨ੍ਹਾਂ ਨੂੰ ਹਾਲਾਤ ਸਮਝਾਉਣਾ ਕਾਫ਼ੀ ਮੁਸ਼ਕਿਲ ਸੀ।
ਫਿਲਹਾਲ ਉਹ ਉਡਾਣਾਂ ਮੁੜ ਸ਼ੁਰੂ ਹੋਣ ਤੱਕ ਦੁਬਈ ਵਿੱਚ ਹੀ ਰਹਿਣ ਦਾ ਫੈਸਲਾ ਕਰ ਰਹੇ ਹਨ, ਕਿਉਂਕਿ ਗੁਆਂਢੀ ਦੇਸ਼ਾਂ ਦੇ ਹਵਾਈ ਖੇਤਰ ਵੀ ਪ੍ਰਭਾਵਿਤ ਹਨ। ਉਨ੍ਹਾਂ ਕਿਹਾ ਕਿ, “ਇਹ ਸਾਰਾ ਮਾਹੌਲ ਇੱਕ ਬਿਲਕੁਲ ਵੱਖਰੀ ਦੁਨੀਆ ਵਰਗਾ ਲੱਗ ਰਿਹਾ ਹੈ।”