ਵੈਲਿੰਗਟਨ ਦੀ ਪਬਲਿਕ ਟ੍ਰਾਂਸਪੋਰਟ ਸੇਵਾ ਮੈਟਲਿੰਕ ਨੂੰ ਆਪਣੀਆਂ 11 ਮਟਾਂਗੀ (Matangi) ਟ੍ਰੇਨਾਂ ਨੂੰ ਅਸਥਾਈ ਤੌਰ ‘ਤੇ ਸੇਵਾ ਤੋਂ ਬਾਹਰ ਕਰਨਾ ਪਿਆ ਹੈ। ਇਹ ਫੈਸਲਾ ਇੱਕ ਆਸਟ੍ਰੇਲੀਆਈ ਪਾਰਟਸ ਸਪਲਾਇਰ ਕੰਪਨੀ ਦੇ ਬੰਦ ਹੋਣ ਕਾਰਨ ਲਿਆ ਗਿਆ ਹੈ। ਅਧਿਕਾਰੀਆਂ ਮੁਤਾਬਿਕ ਇਸ ਦੇ ਬਾਵਜੂਦ ਮੌਜੂਦਾ ਟ੍ਰੇਨ ਸੇਵਾਵਾਂ ਜਾਂ ਟਾਈਮਟੇਬਲ ‘ਤੇ ਕੋਈ ਅਸਰ ਨਹੀਂ ਪਵੇਗਾ।
ਸਪਲਾਇਰ ਕੰਪਨੀ ਦੇ ਬੰਦ ਹੋਣ ਦਾ ਮਾਮਲਾ
ਰੇਲ ਮੈਨਟੇਨੈਂਸ ਕੰਪਨੀ ਟਰੋਵੋਨ ਆਸਟ੍ਰੇਲੀਆ (Trovon Australia) ਮਟਾਂਗੀ ਟ੍ਰੇਨਾਂ ਲਈ HVAC ਏਅਰ ਕੰਡੀਸ਼ਨਿੰਗ ਸਿਸਟਮ, ਏਅਰ ਕੰਪ੍ਰੈਸਰ ਅਤੇ ਬਰੇਕ ਯੂਨਿਟਾਂ ਦੇ ਪੁਰਜ਼ੇ ਮੁਹੱਈਆ ਕਰਦੀ ਸੀ। ਕੰਪਨੀ ਪਿਛਲੇ ਸਾਲ ਵੋਲੰਟਰੀ ਐਡਮਿਨਿਸਟ੍ਰੇਸ਼ਨ ਵਿੱਚ ਚਲੀ ਗਈ ਸੀ ਅਤੇ ਇਸ ਸਾਲ ਜਨਵਰੀ ਵਿੱਚ ਲਿਕਵਿਡੇਸ਼ਨ ਵਿੱਚ ਦਾਖਲ ਹੋ ਗਈ, ਜਿਸਦੀ ਪੁਸ਼ਟੀ ਆਸਟ੍ਰੇਲੀਆਈ ਸਿਕਿਊਰਿਟੀਜ਼ ਐਂਡ ਇਨਵੈਸਟਮੈਂਟਸ ਕਮਿਸ਼ਨ ਵਿੱਚ ਦਰਜ ਨੋਟਿਸ ਰਾਹੀਂ ਹੋਈ।
ਮੈਨਟੇਨੈਂਸ ‘ਤੇ ਅਸਰ
ਗ੍ਰੇਟਰ ਵੈਲਿੰਗਟਨ ਰੀਜਨਲ ਕੌਂਸਲ ਦੀ ਪਬਲਿਕ ਟ੍ਰਾਂਸਪੋਰਟ ਕਮੇਟੀ ਦੀ ਮੀਟਿੰਗ ਦੌਰਾਨ ਦੱਸਿਆ ਗਿਆ ਕਿ: ਜਨਵਰੀ ਦੇ ਮੱਧ ਤੋਂ 7 ਟ੍ਰੇਨ ਯੂਨਿਟ ਪਹਿਲਾਂ ਹੀ ਸੇਵਾ ਤੋਂ ਬਾਹਰ ਹਨ, ਹੋਰ 4 ਯੂਨਿਟ ਵੀ ਅਸਥਾਈ ਤੌਰ ‘ਤੇ ਬੰਦ ਕੀਤੇ ਜਾਣਗੇ ਕੁੱਲ ਮਿਲਾ ਕੇ ਮੈਟਲਿੰਕ ਕੋਲ 83 ਟ੍ਰੇਨ ਯੂਨਿਟ ਹਨ। ਹਾਲਾਂਕਿ ਯਾਤਰੀ ਸੇਵਾ ‘ਤੇ ਪ੍ਰਭਾਵ ਨਹੀਂ ਪਏਗਾ। ਮੈਟਲਿੰਕ ਦੇ ਸੀਨੀਅਰ ਓਪਰੇਸ਼ਨ ਮੈਨੇਜਰ ਪੌਲ ਤਾਵਹਾਰੂ ਨੇ ਕਿਹਾ: “ਸਾਡੇ ਸ਼ਡਿਊਲ ਟਾਈਮਟੇਬਲ ‘ਚ ਕੋਈ ਸਮੱਸਿਆ ਨਹੀਂ ਆ ਰਹੀ।”