ਆਪਣੇ ਹੀ ਘਰ ਦੀ ਛੱਤ ‘ਚੋਂ ਮਿਲੇ ਡਾਲਰਾਂ ਨੂੰ ਵਰਤਣ ਦੇ ਲਈ ਇੱਕ ਜੋੜੇ ਨੂੰ ਅਦਾਲਤ ਦਾ ਰੁੱਖ ਕਰਨਾ ਪਿਆ ਹੈ। ਇਹ ਮਾਮਲਾ ਸਾਹਮਣੇ ਆਇਆ ਹੈ ਕ੍ਰਾਈਸਟਚਰਚ ਤੋਂ ਜਿੱਥੇ ਇੱਕ ਜੋੜੇ ਨੂੰ ਆਪਣੇ ਘਰ ਦੀ ਛੱਤ ਵਿੱਚ $200,000 ਤੋਂ ਵੱਧ ਦੀ ਰਕਮ ਮਿਲੀ ਹੈ। ਇਸ ਜੋੜੇ, ਜਿਨ੍ਹਾਂ ਦੇ ਨਾਮ ਲੁਕਾਏ ਗਏ ਹਨ, ਨੂੰ 2021 ਵਿੱਚ ਆਪਣੀ ਜਾਇਦਾਦ ਵਿੱਚ ਪਲਾਸਟਿਕ ਦੀਆਂ ਇੱਟਾਂ ਵਿੱਚ ਸੀਲ ਕੀਤਾ ਹੋਇਆ ਰਹੱਸਮਈ ਪੈਸਾ ਮਿਲਿਆ ਸੀ। ਉਨ੍ਹਾਂ ਨੇ ਪੁਲਿਸ ਨੂੰ ਘਰ ‘ਚ ਮਿਲੀ ਨਕਦੀ ਦੀ ਰਿਪੋਰਟ ਕੀਤੀ ਜਿਸ ਮਗਰੋਂ ਪੁਲਿਸ ਨੇ ਕਿਹਾ ਕਿ ਪੈਸੇ ਜ਼ਬਤ ਕਰ ਲਏ ਜਾਣੇ ਚਾਹੀਦੇ ਹਨ ਕਿਉਂਕਿ ਇਹ ਅਪਰਾਧ ਦੀ ਕਮਾਈ ਸੀ, ਸ਼ਾਇਦ ਨਸ਼ੀਲੇ ਪਦਾਰਥਾਂ ਰਾਹੀਂ ਕਮਾਈ ਹੋਈ।
ਸੋਮਵਾਰ ਨੂੰ ਹਾਈ ਕੋਰਟ ਵਿੱਚ ਸੁਣਵਾਈ ਦੌਰਾਨ, ਜੋੜੇ ਦੇ ਵਕੀਲ ਮਾਈਕ ਲੇਨਾਰਡ ਨੇ ਕਿਹਾ ਕਿ ਉਨ੍ਹਾਂ ਨੂੰ ਪੈਸੇ ਮਿਲਣੇ ਚਾਹੀਦੇ ਹਨ ਕਿਉਂਕਿ ਉਨ੍ਹਾਂ ਦਾ ਕਿਸੇ ਅਪਰਾਧਿਕ ਗਤੀਵਿਧੀ ਵਿੱਚ ਕੋਈ ਹਿੱਸਾ ਨਹੀਂ ਸੀ ਅਤੇ ਨਕਦੀ ਨੂੰ ਪੁਲਿਸ ਵੱਲੋਂ ਜ਼ਬਤ ਕਰਨ ਨਾਲ ਹੋਰ ਲੋਕ ਪੁਲਿਸ ਨੂੰ ਇਸ ਤਰ੍ਹਾਂ ਦੇ ਮਾਮਲਿਆਂ ਦੀ ਰਿਪੋਰਟ ਕਰਨ ਤੋਂ ਪਰਹੇਜ ਕਰਨਗੇ। ਵਕੀਲ ਨੇ ਕਿਹਾ ਕਿ, “ਇਹ ਮੇਰੇ ਮੁਵੱਕਿਲ ਦੀ ਸਥਿਤੀ ਵਿੱਚ ਲੋਕਾਂ ਨੂੰ ਇੱਕ ਸੁਨੇਹਾ ਭੇਜੇਗਾ, ਪੁਲਿਸ ਨਾਲ ਸਹਿਯੋਗ ਨਾ ਕਰੋ, ਪੁਲਿਸ ਨੂੰ ਨਾ ਦੱਸੋ, ਬਸ ਮਿਲੇ ਪੈਸੇ ਖਰਚ ਕਰੋ।” ਫਿਲਹਾਲ ਦੋਵਾਂ ਧਿਰਾਂ ਦੀਆਂ ਦਲੀਲਾਂ ਸੁਣਨ ਮਗਰੋਂ ਜਸਟਿਸ ਓਸਬੋਰਨ ਨੇ ਆਪਣਾ ਫੈਸਲਾ ਰਾਖਵਾਂ ਰੱਖ ਲਿਆ ਹੈ।