ਨਿਊਜ਼ੀਲੈਂਡ ਦੇ Associate Energy Minister Shane Jones ਨੇ ਕਿਹਾ ਹੈ ਕਿ ਦੇਸ਼ ਵਿੱਚ ਫਿਊਲ ਦੀ ਸਪਲਾਈ ਲੈ ਕੇ ਘਬਰਾਉਣ ਦੀ ਕੋਈ ਲੋੜ ਨਹੀਂ, ਕਿਉਂਕਿ ਇਸ ਵੇਲੇ ਕਰੀਬ 50 ਦਿਨਾਂ ਲਈ ਫਿਊਲ ਮੌਜੂਦ ਹੈ ਜਾਂ ਦੇਸ਼ ਵੱਲ ਆ ਰਿਹਾ ਹੈ। Radio New Zealand ਨਾਲ ਗੱਲਬਾਤ ਕਰਦਿਆਂ ਜੋਨਜ਼ ਨੇ ਦੱਸਿਆ ਕਿ ਇਸ ਵਿੱਚ ਉਹ ਫਿਊਲ ਵੀ ਸ਼ਾਮਲ ਹੈ ਜੋ ਨਿਊਜ਼ੀਲੈਂਡ ਵਿੱਚ ਪਹਿਲਾਂ ਹੀ ਸਟੋਰ ਕੀਤਾ ਗਿਆ ਹੈ ਅਤੇ ਉਹ ਵੀ ਜੋ ਸ਼ਿਪਮੈਂਟ ਰਾਹੀਂ ਦੇਸ਼ ਵੱਲ ਭੇਜਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਨਿਊਜ਼ੀਲੈਂਡ ਦੇ ਲੋਕਾਂ ਨੂੰ ਇਹ ਸੋਚ ਕੇ ਚਿੰਤਾ ਕਰਨ ਦੀ ਲੋੜ ਨਹੀਂ ਕਿ ਦੇਸ਼ ਵਿੱਚ ਫਿਊਲ ਦੀ ਉਪਲਬਧਤਾ ਘਟ ਰਹੀ ਹੈ।
ਹਾਲਾਂਕਿ ਕੁਝ ਥਾਵਾਂ ‘ਤੇ ਪੈਟਰੋਲ ਸਟੇਸ਼ਨਾਂ ‘ਤੇ ਫਿਊਲ ਖਤਮ ਹੋਣ ਦੀਆਂ ਖ਼ਬਰਾਂ ਸਾਹਮਣੇ ਆਈਆਂ ਹਨ। ਇਸ ਬਾਰੇ ਜੋਨਜ਼ ਨੇ ਕਿਹਾ ਕਿ ਇਹ ਪੂਰੇ ਦੇਸ਼ ਵਿੱਚ ਫਿਊਲ ਦੀ ਘਾਟ ਨਹੀਂ, ਸਗੋਂ ਸਪਲਾਈ ਦੇ ਸਮੇਂ ‘ਤੇ ਨਾ ਪਹੁੰਚਣ ਕਾਰਨ ਹੋਇਆ ਹੈ।
ਉਨ੍ਹਾਂ ਮੁਤਾਬਕ ਕੁਝ ਕੰਪਨੀਆਂ ਕੋਲ ਫਿਊਲ ਟੈਂਕਰ ਚਲਾਉਣ ਵਾਲੇ ਡਰਾਈਵਰਾਂ ਦੀ ਘਾਟ ਹੈ, ਜਿਸ ਕਰਕੇ ਟਰੱਕ ਸਮੇਂ ‘ਤੇ ਪੈਟਰੋਲ ਪੰਪਾਂ ਤੱਕ ਫਿਊਲ ਨਹੀਂ ਪਹੁੰਚਾ ਸਕੇ। ਇਸ ਕਾਰਨ ਕੁਝ ਸਟੇਸ਼ਨਾਂ ‘ਤੇ ਅਸਥਾਈ ਤੌਰ ‘ਤੇ ਫਿਊਲ ਖਤਮ ਹੋ ਗਿਆ।
ਮੰਤਰੀ ਨੇ ਖਾਸ ਤੌਰ ‘ਤੇ ਫਿਊਲ ਕੰਪਨੀ Gull New Zealand ‘ਤੇ ਨਾਰਾਜ਼ਗੀ ਜ਼ਾਹਿਰ ਕਰਦਿਆਂ ਕਿਹਾ ਕਿ ਕੁਝ ਸਟੇਸ਼ਨਾਂ ‘ਤੇ ਫਿਊਲ ਨਾ ਹੋਣ ਦੀ ਸਥਿਤੀ ਨੂੰ ਦੇਸ਼-ਪੱਧਰੀ ਸੰਕਟ ਵਜੋਂ ਪੇਸ਼ ਨਹੀਂ ਕੀਤਾ ਜਾਣਾ ਚਾਹੀਦਾ।
ਉਨ੍ਹਾਂ ਇਹ ਵੀ ਦੱਸਿਆ ਕਿ ਇਸ ਸਮੇਂ ਸਰਕਾਰ ਅਤੇ ਫਿਊਲ ਕੰਪਨੀਆਂ ਦੇਸ਼ ਦੇ ਫਿਊਲ ਸੁਰੱਖਿਆ ਫਰੇਮਵਰਕ ਦੇ ਸਭ ਤੋਂ ਨੀਵੇਂ ਚੇਤਾਵਨੀ ਪੱਧਰ ‘ਤੇ ਕੰਮ ਕਰ ਰਹੀਆਂ ਹਨ, ਜਿਸਦਾ ਮਤਲਬ ਹੈ ਕਿ ਫਿਊਲ ਸਪਲਾਈ ਦੀ ਸਥਿਤੀ ਹਾਲੇ ਵੀ ਸਥਿਰ ਅਤੇ ਕੰਟਰੋਲ ਵਿੱਚ ਹੈ।