ਨਿਊਜ਼ੀਲੈਂਡ ਦੀ ਦੂਰਸੰਚਾਰ ਕੰਪਨੀ One NZ ਨੂੰ ਇੱਕ ਵੱਡਾ ਝਟਕਾ ਲੱਗਿਆ ਹੈ। ਕਾਮਰਸ ਕਮਿਸ਼ਨ ਵੱਲੋਂ One NZ ਨੂੰ $1.1 ਮਿਲੀਅਨ ਦਾ ਜੁਰਮਾਨਾ ਕੀਤਾ ਗਿਆ ਹੈ। ਕੰਪਨੀ ਨੂੰ 111 ਕਾਂਟੈਕਟ ਕੋਡ ਦੀਆਂ 10 ਉਲੰਘਣਾ ਮਨਜ਼ੂਰ ਕਰਨ ਤੋਂ ਬਾਅਦ $1.1 ਮਿਲੀਅਨ ਦਾ ਜੁਰਮਾਨਾ ਭਰਨ ਦਾ ਹੁਕਮ ਹੋਇਆ ਹੈ। ਐਮਰਜੈਂਸੀ ਕਾਲ ਨਿਯਮ ਤੋੜਨ ਦੀਆਂ ਇਹ ਉਲੰਘਣਾਵਾਂ 2021 ਤੋਂ 2023 ਦੇ ਦਰਮਿਆਨ ਜਾਣਕਾਰੀ ਦੇਣ, ਰਿਕਾਰਡ ਰੱਖਣ, ਅਤੇ ਸੰਵੇਦਨਸ਼ੀਲ ਗਾਹਕਾਂ ਨਾਲ ਨਿਯਮਿਤ ਸੰਪਰਕ ਵਰਗੀਆਂ ਲੋੜੀਂਦੀਆਂ ਜ਼ਿੰਮੇਵਾਰੀਆਂ ’ਚ ਕਮੀ ਨਾਲ ਜੁੜੀਆਂ ਸਨ।
ਕੰਪਨੀ ਦੇ ਕਾਰਪੋਰੇਟ ਅਫੇਅਰਜ਼ ਲੀਡ ਮੈਥਿਊ ਫ਼ਲੱਡ ਨੇ ਕਿਹਾ ਕਿ ਕੰਪਨੀ 111 ਕੋਡ ਨੂੰ ਗੰਭੀਰਤਾ ਨਾਲ ਲੈਂਦੀ ਹੈ। ਫ਼ਲੱਡ ਨੇ ਕਿਹਾ ਕਿ One NZ ਨੇ ਕਾਮਰਸ ਕਮਿਸ਼ਨ ਨਾਲ ਮਿਲਕੇ ਸਾਰੀਆਂ ਗਲਤੀਆਂ ਦੁਰੁਸਤ ਕਰ ਲਈਆਂ ਹਨ। ਟੈਲੀਸੰਚਾਰ ਕਮਿਸ਼ਨਰ ਟ੍ਰਿਸਟਨ ਗਿਲਬਰਟਸਨ ਨੇ ਕਿਹਾ ਕਿ ਉਹ ਕੋਡ ਦੀ ਪਾਲਣਾ ’ਤੇ ਨਿਗਰਾਨੀ ਜਾਰੀ ਰੱਖਣਗੇ ਅਤੇ ਜਿੱਥੇ ਲੋੜ ਹੋਵੇਗੀ ਕਾਰਵਾਈ ਕਰਨਗੇ। ਇਸ ਤੋਂ ਇਲਾਵਾ, One NZ ਨੂੰ ਕਾਮਰਸ ਕਮਿਸ਼ਨ ਦੇ ਖ਼ਰਚੇ ਵਾਸਤੇ ਵਾਧੂ $100,000 ਵੀ ਭਰਨੇ ਪੈਣਗੇ। One NZ ਨੇ ਕਿਹਾ ਕਿ ਜੋ ਗਾਹਕ 111 ਕੋਡ ਅਧੀਨ ਨਾਜ਼ੁਕ ਮੰਨੇ ਜਾ ਸਕਦੇ ਹਨ, ਉਹ one.nz/vulnerable ’ਤੇ ਦਿੱਤੇ ਇਸਦੇ ਚੈਨਲਾਂ ਰਾਹੀਂ ਸੰਪਰਕ ਕਰ ਸਕਦੇ ਹਨ।