ਵਾਈਕਾਟੋ ਦੇ ਓਟੋਰੋਹਾਂਗਾ ਵਿੱਚ ਭਾਰੀ ਮੀਂਹ ਪੈਣ ਤੋਂ ਬਾਅਦ ਸਥਾਨਕ ਐਮਰਜੈਂਸੀ ਦੀ ਸਥਿਤੀ ਐਲਾਨ ਦਿੱਤੀ ਗਈ ਹੈ। ਇਹ ਐਲਾਨ ਸ਼ਨੀਵਾਰ ਨੂੰ ਸਵੇਰੇ 12:57 ਵਜੇ ਕੀਤਾ ਗਿਆ ਹੈ ਅਤੇ ਇਹ ਸੱਤ ਦਿਨਾਂ ਤੱਕ ਲਾਗੂ ਰਹੇਗੀ। ਮੇਅਰ ਰੋਡਨੀ ਡਾਓ ਨੇ ਕਿਹਾ ਕਿ ਜ਼ਿਲ੍ਹੇ ਵਿੱਚ ਵਿਆਪਕ ਹੜ੍ਹ, ਫਿਸਲਣ ਅਤੇ ਪਾਣੀ ਭਰਨ ਕਾਰਨ ਇਹ ਫੈਸਲਾ ਲਿਆ ਗਿਆ ਹੈ। ਉਨ੍ਹਾਂ ਕਿਹਾ ਕਿ, “ਓਟੋਰੋਹਾਂਗਾ ਵਿੱਚ ਸਥਿਤੀ ਗੰਭੀਰ ਹੈ … ਇਹ ਮਹੱਤਵਪੂਰਨ ਹੈ ਕਿ ਅਸੀਂ ਤਿਆਰ ਰਹੀਏ ਅਤੇ ਮਦਦ ਅਤੇ ਸਹਾਇਤਾ ਪ੍ਰਦਾਨ ਕਰਨ ਲਈ ਸਹੀ ਨਿਯੰਤਰਣ ਰੱਖੀਏ, ਜਿਸ ਵਿੱਚ ਲੋੜ ਪੈਣ ‘ਤੇ ਲੋੜੀਂਦੀ ਨਿਕਾਸੀ ਵੀ ਸ਼ਾਮਿਲ ਹੈ।” ਲਾਈਨਜ਼ ਕੰਪਨੀ ਦੀ ਵੈੱਬਸਾਈਟ ਮੁਤਾਬਿਕ ਕੁਝ ਘਰ ਰਾਤ ਭਰ ਬਿਜਲੀ ਤੋਂ ਬਿਨਾਂ ਰਹੇ ਹਨ, ਸ਼ਨੀਵਾਰ ਸਵੇਰੇ ਤੜਕੇ ਹੋਰ ਆਊਟੇਜ ਦੀ ਰਿਪੋਰਟ ਸਾਂਝੀ ਕੀਤੀ ਗਈ ਹੈ।
