ਪਾਪਾਕੂਰਾ ਵਿੱਚ ਇੱਕ ਕਿਰਾਏਦਾਰ ਨੂੰ ਘਰ ਨੂੰ ਭਾਰੀ ਨੁਕਸਾਨ ਪਹੁੰਚਾਉਣਾ ਮਹਿੰਗਾ ਪੈ ਗਿਆ ਹੈ। ਇਸ ਮਾਮਲੇ ਦੀ ਸੁਣਵਾਈ ਕਰਦਿਆ Tenancy Tribunal ਨੇ ਕਿਰਾਏਦਾਰ ਨੂੰ ਮਾਲਕ ਨੂੰ 73 ਹਜ਼ਾਰ ਡਾਲਰ ਤੋਂ ਵੱਧ ਦੀ ਰਕਮ ਅਦਾ ਕਰਨ ਦਾ ਨਿਰਦੇਸ਼ ਦਿੱਤਾ ਹੈ। Tenancy Tribunal ਨੇ ਨੁਕਸਾਨ ਲਈ ਕਿਰਾਏਦਾਰ ਨੂੰ ਜ਼ਿੰਮੇਵਾਰ ਦੱਸਿਆ ਹੈ, ਭਾਵੇਂ ਉਸ ਦਾ ਦਾਅਵਾ ਸੀ ਕਿ ਇਹ ਨੁਕਸਾਨ ਉਸ ਦੀ ਗੈਰਹਾਜ਼ਰੀ ਵਿੱਚ ਉਸਦੇ “ਸਾਥੀਆਂ” ਵੱਲੋਂ ਕੀਤਾ ਗਿਆ ਸੀ, ਜੋ ਨਸ਼ੇ ਨਾਲ ਧੁੱਤ ਸਨ। ਟ੍ਰਿਬਿਊਨਲ ਅੱਗੇ ਪੇਸ਼ ਸਬੂਤਾਂ ਅਨੁਸਾਰ ਘਰ ਦੀ ਹਾਲਤ ਬਹੁਤ ਹੀ ਖ਼ਰਾਬ ਸੀ—ਹਰ ਥਾਂ ਕੂੜਾ-ਕਰਕਟ, ਸੜਦਾ ਹੋਇਆ ਖਾਣਾ, ਕੰਧਾਂ ਵਿੱਚ ਛੇਕ, ਹਰ ਸਤ੍ਹਾ ‘ਤੇ ਮਨੁੱਖੀ ਗੰਦਗੀ, ਗੈਰਾਜ ਵਿੱਚ ਅੱਗ ਲਗਣ ਦੇ ਨਿਸ਼ਾਨ ਅਤੇ ਮੈਥਐਮਫੇਟਾਮੀਨ ਬਣਾਉਣ ਦੇ ਸਬੂਤ ਮਿਲੇ। ਕਿਰਾਏਦਾਰ ਨੇ ਕਿਹਾ ਕਿ ਉਸ ਨੇ ਪਹਿਲਾਂ ਕੁਝ ਲੋਕਾਂ ਨੂੰ ਗੈਰਾਜ ਵਿੱਚ ਰਹਿਣ ਦੀ ਇਜਾਜ਼ਤ ਦਿੱਤੀ ਸੀ, ਪਰ ਬਾਅਦ ਵਿੱਚ ਉਨ੍ਹਾਂ ਨੂੰ ਕੱਢ ਦਿੱਤਾ ਸੀ। ਪਰ ਰਿਪੋਰਟ ਮੁਤਬਿਕ ਬਾਅਦ ‘ਚ ਉਨ੍ਹਾਂ ਦੇ ਸਾਥੀ ਆ ਕੇ ਨੁਕਸਾਨ ਕਰਦੇ ਰਹੇ, ਹਾਲਾਂਕਿ ਟ੍ਰਿਬਿਊਨਲ ਨੇ ਮੰਨਿਆ ਕਿ ਕਿਰਾਏਦਾਰ ਨੇ ਲੰਬੇ ਸਮੇਂ ਤੱਕ ਨਾ ਤਾਂ ਮਾਲਕ ਨੂੰ ਇਸ ਬਾਰੇ ਸਪਸ਼ਟ ਜਾਣਕਾਰੀ ਦਿੱਤੀ, ਨਾ ਹੀ ਪੁਲਿਸ ਜਾਂ ਤਾਲਿਆਂ ਦੀ ਤਬਦੀਲੀ ਵਰਗੇ ਵਾਜਬ ਕਦਮ ਚੁੱਕੇ ਸਨ। ਇਸ ਲਈ ਜੋ ਨੁਕਸਾਨ ਹੋਇਆ ਉਸ ਦਾ ਹਰਜਾਨਾ ਕਿਰਾਏਦਾਰ ਨੂੰ ਹੀ ਭਰਨਾ ਪਏਗਾ।
