ਕੁਝ ਮਰੀਜ਼ਾਂ ਦੇ ਰਿਕਾਰਡਾਂ ‘ਚ ਤਬਦੀਲੀਆਂ ਹੋਣ ਤੋਂ ਬਾਅਦ ਇੱਕ ਡਿਜੀਟਲ ਮੈਡੀਕਲ ਰਿਕਾਰਡ ਡੇਟਾ ਕੰਪਨੀ ਨੂੰ ਔਫਲਾਈਨ ਕਰ ਦਿੱਤਾ ਗਿਆ ਹੈ। ਰਿਪੋਰਟਾਂ ਮੁਤਾਬਿਕ ਕੁਝ ਉਪਭੋਗਤਾਵਾਂ (ਮਰੀਜ਼ਾਂ ) ਦੀ ਜਾਣਕਾਰੀ ਬਦਲੀ ਗਈ ਸੀ ਜਿਸ ਵਿੱਚ ਕਈਆਂ ਬਾਰੇ ਅਪਡੇਟ ਕੀਤਾ ਗਿਆ ਸੀ ਕਿ ਉਹ ਮਰ ਚੁੱਕੇ ਹਨ। MediMap ਦੀ ਵਰਤੋਂ ਕੁਝ ਸਿਹਤ ਪ੍ਰਦਾਤਾਵਾਂ ਵੱਲੋਂ ਬਜ਼ੁਰਗਾਂ ਦੀ ਦੇਖਭਾਲ, ਅਪੰਗਤਾ ਸੇਵਾਵਾਂ, ਹਾਸਪਾਈਸ ਅਤੇ ਕਮਿਊਨਿਟੀ ਸੈਟਿੰਗਜ਼ ਵਿੱਚ ਦਵਾਈਆਂ ਦੀ ਖੁਰਾਕ ਨੂੰ ਸਹੀ ਢੰਗ ਨਾਲ ਦਰਜ ਕਰਨ ਲਈ ਕੀਤੀ ਜਾਂਦੀ ਹੈ। ਇਹ ਪ੍ਰਣਾਲੀ ਕਲੀਨਿਕਾਂ ਜਾਂ ਬਜ਼ੁਰਗਾਂ ਦੀ ਦੇਖਭਾਲ ਸੇਵਾਵਾਂ ਨੂੰ ਮਰੀਜ਼ਾਂ ਅਤੇ ਫਾਰਮੇਸੀਆਂ ਨਾਲ ਤਾਲਮੇਲ ਬਣਾਉਣ ਦੀ ਸਹੂਲਤ ਦਿੰਦੀ ਹੈ। ਇਸਨੂੰ ਈ-ਨੁਸਖ਼ਿਆਂ ਲਈ ਵੀ ਵਰਤਿਆ ਜਾ ਸਕਦਾ ਹੈ ਅਤੇ ਇਸ ਵਿੱਚ ਮਰੀਜ਼ਾਂ ਦੇ ਦਵਾਈ ਇਤਿਹਾਸ ਦੀ ਜਾਣਕਾਰੀ ਸ਼ਾਮਿਲ ਹੁੰਦੀ ਹੈ।
ਕੰਪਨੀ ਵੱਲੋਂ ਕਲੀਨਿਕਾਂ ਨੂੰ ਭੇਜੀ ਗਈ ਜਾਣਕਾਰੀ ਵਿੱਚ ਦੱਸਿਆ ਗਿਆ ਕਿ ਸਮੱਸਿਆ ਐਤਵਾਰ ਦੁਪਹਿਰ ਲਗਭਗ 1.30 ਵਜੇ ਸ਼ੁਰੂ ਹੋਈ ਸੀ। ਕੰਪਨੀ ਦੀ ਵੈੱਬਸਾਈਟ ‘ਤੇ ਜਾਰੀ ਸੂਚਨਾ ਅਨੁਸਾਰ, ਪ੍ਰਭਾਵ ਦੇ ਪੱਧਰ ਦੀ ਜਾਂਚ ਕੀਤੀ ਜਾ ਰਹੀ ਹੈ ਅਤੇ ਜਾਂਚ ਦੌਰਾਨ ਸਿਸਟਮ ਔਫਲਾਈਨ ਰਹੇਗਾ। MediMap ਨੇ ਇੱਕ ਜਵਾਬ ਜਾਰੀ ਕੀਤਾ ਜਿਸ ਵਿੱਚ ਕਿਹਾ ਗਿਆ ਕਿ ਉਨ੍ਹਾਂ ਨੇ “ਅਣਅਧਿਕਾਰਤ ਪ੍ਰਵੇਸ਼” ਦੀ ਪਛਾਣ ਕੀਤੀ ਹੈ ਅਤੇ ਇਸ ਵਿੱਚ ਨਾਮ, ਜਨਮ ਮਿਤੀਆਂ, ਡਾਕਟਰ, ਦੇਖਭਾਲ ਦਾ ਸਥਾਨ ਅਤੇ ਨਿਵਾਸੀ ਸਥਿਤੀ ਸ਼ਾਮਿਲ ਹੈ। ਬਿਆਨ ਵਿੱਚ ਕਿਹਾ ਗਿਆ ਹੈ ਕਿ ਪਲੇਟਫਾਰਮ ਦੀ ਮਦਦ ਸਿਹਤ ਮੰਤਰਾਲੇ ਦੁਆਰਾ ਕੀਤੀ ਜਾ ਰਹੀ ਹੈ।