ਨਿਊਜ਼ੀਲੈਂਡ ‘ਚ ਡਾਕਟਰਾਂ ਅਤੇ ਸਿਹਤ ਸਟਾਫ਼ ਮੈਂਬਰਾਂ ਦੀ ਘਾਟ ਤੱਕ ਪਹੁੰਚ ਚੁੱਕੀ ਹੈ ਕਿ ਐਮਰਜੈਂਸੀ ‘ਚ ਹਸਪਤਾਲ ਪਹੁੰਚੇ ਮਰੀਜ਼ਾਂ ਨੂੰ ਵੀ ਇਲਾਜ਼ ਲਈ ਕਈ-ਕਈ ਦਿਨ ਦੀ ਉਡੀਕ ਕਰਨੀ ਪੈ ਰਹੀ ਹੈ। ਤਾਜ਼ਾ ਮਾਮਲਾ ਟੌਰੰਗਾ ਤੋਂ ਸਾਹਮਣੇ ਆਇਆ ਹੈ। ਦਰਅਸਲ ਇੱਕ ਰਿਪੋਰਟ ਅਨੁਸਾਰ ਇੱਕ 44 ਸਾਲਾ ਮਰੀਜ਼ ਵੈਨ ਮੂਲੋ ਨੇ ਨਿਊਜ਼ੀਲੈਂਡ ਦੀ ਸਰਕਾਰੀ ਸਿਹਤ ਪ੍ਰਣਾਲੀ ਨੂੰ “ਸ਼ਰਮਨਾਕ” ਕਰਾਰ ਦਿੰਦਿਆਂ ਦੱਸਿਆ ਕਿ ਉਸ ਨੂੰ ਦਰਦ ‘ਚ ਹੋਣ ਦੇ ਬਾਵਜੂਦ ਗੈਲਬਲੇਡਰ ਦੀ ਤੁਰੰਤ ਸਰਜਰੀ ਲਈ 10 ਦਿਨ ਉਡੀਕ ਕਰਨੀ ਪਈ ਸੀ।
ਰਿਪੋਰਟ ਮੁਤਾਬਿਕ ਉਸ ਨੂੰ 9 ਦਿਨ ਨਿਲ-ਬਾਇ-ਮਾਊਥ (ਖਾਣ-ਪੀਣ ਤੋਂ ਰੋਕ) ਰੱਖਿਆ ਗਿਆ। ਮੂਲੋ 10 ਜਨਵਰੀ ਨੂੰ ਭਿਆਨਕ ਪੇਟ ਦਰਦ ਨਾਲ ਐਂਬੂਲੈਂਸ ਰਾਹੀਂ Tauranga ਦੇ ਹਸਪਤਾਲ ਪਹੁੰਚਿਆ ਸੀ। ਡਾਕਟਰਾਂ ਨੇ ਕਿਹਾ ਕਿ ਉਸ ਦੀ ਗੈਲਬਲੇਡਰ ਤੁਰੰਤ ਕੱਢਣੀ ਪਏਗੀ। ਉਸ ਨੂੰ ਦਾਖ਼ਲ ਕਰਕੇ ਅਗਲੇ ਦਿਨ ਲਈ ਸਰਜਰੀ ਤੈਅ ਕੀਤੀ ਗਈ ਅਤੇ ਖਾਣ-ਪੀਣ ’ਤੇ ਪਾਬੰਦੀ ਲਗਾ ਦਿੱਤੀ ਗਈ। ਪਰ ਹਰ ਦਿਨ ਸ਼ਾਮ 5 ਵਜੇ ਦੇ ਕਰੀਬ ਇਹ ਕਹਿ ਕੇ ਸਰਜਰੀ ਟਾਲ ਦਿੱਤੀ ਜਾਂਦੀ ਰਹੀ ਕਿ ਥੀਏਟਰ ਵਿੱਚ ਜਗ੍ਹਾ ਨਹੀਂ। ਰਾਤ ਨੂੰ ਥੋੜ੍ਹਾ ਜਿਹਾ ਖਾਣਾ ਤੇ ਪਾਣੀ ਮਿਲਦਾ ਸੀ। ਮਰੀਜ਼ ਨੇ ਕਿਹਾ: ਉਸ ਦਾ ਵਜ਼ਨ ਕਾਫ਼ੀ ਘਟ ਗਿਆ, ਕੱਪੜੇ ਢਿੱਲੇ ਹੋ ਗਏ। ਦਰਦ ਬਰਦਾਸ਼ਤ ਤੋਂ ਬਾਹਰ ਸੀ, ਹਾਲਾਂਕਿ ਮੋਰਫ਼ੀਨ ਡ੍ਰਿਪ ਲੱਗੀ ਹੋਈ ਸੀ ਤੇ ਇਹ ਸਭ ਉਸਨੇ ਮਾੜੀ ਸਿਹਤ ਪ੍ਰਣਾਲੀ ਦਾ ਨਤੀਜਾ ਦੱਸਿਆ ਹੈ।