ਨਿਊਜ਼ੀਲੈਂਡ ਦੇ ਦੂਰਦਰਾਜ਼ ਖੇਤਰ Chatham Islands ਵਿੱਚ ਤੇਲ ਦੀਆਂ ਵਧ ਰਹੀਆਂ ਕੀਮਤਾਂ ਕਾਰਨ ਸਥਾਨਕ ਵਸਨੀਕ ਚਿੰਤਤ ਹਨ। ਟਾਪੂ ‘ਤੇ ਪੈਟਰੋਲ ਦੀ ਕੀਮਤ ਲਗਭਗ $4.50 ਪ੍ਰਤੀ ਲੀਟਰ ਤੱਕ ਪਹੁੰਚ ਗਈ ਹੈ ਅਤੇ ਅੰਦਾਜ਼ਾ ਹੈ ਕਿ ਆਉਣ ਵਾਲੇ ਸਮੇਂ ਵਿੱਚ ਇਹ ਹੋਰ ਵੀ ਵੱਧ ਸਕਦੀ ਹੈ। ਇਹ ਟਾਪੂ ਮੁੱਖ ਤੌਰ ‘ਤੇ ਡੀਜ਼ਲ ‘ਤੇ ਨਿਰਭਰ ਹੈ, ਜਿਸ ਨਾਲ ਬਿਜਲੀ ਉਤਪਾਦਨ ਤੋਂ ਲੈ ਕੇ ਆਵਾਜਾਈ ਅਤੇ ਹੋਰ ਜ਼ਰੂਰੀ ਸੇਵਾਵਾਂ ਚੱਲਦੀਆਂ ਹਨ। ਹਾਲਾਂਕਿ ਨਵੰਬਰ ਵਿੱਚ ਸ਼ੁਰੂ ਹੋਇਆ Point Durham Wind Farm ਹੁਣ ਕੁਝ ਹੱਦ ਤੱਕ ਬਿਜਲੀ ਦੀ ਲੋੜ ਪੂਰੀ ਕਰ ਰਿਹਾ ਹੈ, ਪਰ ਫਿਰ ਵੀ ਇੰਧਨ ‘ਤੇ ਨਿਰਭਰਤਾ ਕਾਫ਼ੀ ਹੈ।
ਟਾਪੂ, ਜੋ ਨਿਊਜ਼ੀਲੈਂਡ ਦੇ ਮੈਨਲੈਂਡ ਤੋਂ ਕਰੀਬ 800 ਕਿਲੋਮੀਟਰ ਦੂਰ ਹੈ, ਉੱਥੇ ਇੰਧਨ ਜਹਾਜ਼ਾਂ ਰਾਹੀਂ ਪਹੁੰਚਾਇਆ ਜਾਂਦਾ ਹੈ। ਇੱਕ ਵਾਰ ਵਿੱਚ ਲਗਭਗ 1,20,000 ਲੀਟਰ ਇੰਧਨ ਟਾਪੂ ‘ਤੇ ਲਿਆਇਆ ਜਾਂਦਾ ਹੈ। Chatham Islands Enterprise Trust ਦੇ ਮੁਖੀ ਬੌਬ ਪੈਂਟਰ ਨੇ ਕਿਹਾ ਕਿ ਮੱਧ ਪੂਰਬ ਵਿੱਚ ਚੱਲ ਰਹੇ ਤਣਾਅ ਕਾਰਨ ਕੱਚੇ ਤੇਲ ਦੀ ਕੀਮਤ ਵਿੱਚ ਉਤਾਰ-ਚੜ੍ਹਾਅ ਆ ਰਿਹਾ ਹੈ ਅਤੇ ਇਸਦਾ ਪ੍ਰਭਾਵ ਚਾਥਮ ਟਾਪੂਆਂ ‘ਤੇ ਵੀ ਦਿਖਾਈ ਦੇ ਰਿਹਾ ਹੈ।
ਉਨ੍ਹਾਂ ਮੁਤਾਬਕ ਪਿਛਲੇ ਤਿੰਨ ਹਫ਼ਤਿਆਂ ਨਾਲ ਤੁਲਨਾ ਕਰਦੇ ਹੋਏ ਇੰਧਨ ਦੀ ਕੀਮਤ ਵਿੱਚ ਲਗਭਗ 73 ਸੈਂਟ ਜਾਂ 57 ਫੀਸਦੀ ਤੱਕ ਵਾਧਾ ਹੋਇਆ ਹੈ। ਇਸ ਵੇਲੇ ਡੀਜ਼ਲ ਦੀ ਕੀਮਤ ਕਰੀਬ $2.29 ਪ੍ਰਤੀ ਲੀਟਰ ਹੈ।
ਟਾਪੂ ‘ਤੇ ਲਗਭਗ 6.5 ਲੱਖ ਲੀਟਰ ਸਮਰੱਥਾ ਵਾਲਾ ਸਟੋਰੇਜ ਪ੍ਰਬੰਧ ਹੈ, ਜਿਸ ਨਾਲ ਕੁਝ ਸਮੇਂ ਲਈ ਸਹੂਲਤ ਮਿਲਦੀ ਹੈ, ਪਰ ਜੇਕਰ ਮੱਧ ਪੂਰਬ ਦੀ ਸਥਿਤੀ ਜਾਰੀ ਰਹਿੰਦੀ ਹੈ ਤਾਂ ਕੀਮਤਾਂ ਹੋਰ ਵਧ ਸਕਦੀਆਂ ਹਨ।
ਇਸ ਦੇ ਨਾਲ ਹੀ ਸਥਾਨਕ ਏਅਰਲਾਈਨ Air Chathams ਨੇ ਵੀ ਕਿਹਾ ਹੈ ਕਿ ਇੰਧਨ ਮਹਿੰਗਾ ਹੋਣ ਕਾਰਨ ਉਸਦੇ ਖਰਚੇ ਵਿੱਚ ਹਰ ਮਹੀਨੇ ਲਗਭਗ $140,000 ਦਾ ਵਾਧਾ ਹੋ ਰਿਹਾ ਹੈ। ਕੰਪਨੀ ਦੇ ਸੀਈਓ ਡੁਏਨ ਇਮਨੀ ਨੇ ਕਿਹਾ ਕਿ ਜੇ ਜੈੱਟ ਫਿਊਲ ਦੀਆਂ ਕੀਮਤਾਂ ਇੰਝ ਹੀ ਉੱਚੀਆਂ ਰਹੀਆਂ ਤਾਂ ਉਨ੍ਹਾਂ ਨੂੰ ਉਡਾਣਾਂ ਦੀ ਗਿਣਤੀ ਘਟਾਉਣ ਬਾਰੇ ਵੀ ਸੋਚਣਾ ਪੈ ਸਕਦਾ ਹੈ।
ਸਥਾਨਕ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਟਾਪੂ ਦੀ ਜ਼ਿੰਦਗੀ ਲਗਭਗ ਹਰ ਕੰਮ ਲਈ ਇੰਧਨ ‘ਤੇ ਨਿਰਭਰ ਕਰਦੀ ਹੈ—ਚਾਹੇ ਉਹ ਉਡਾਣਾਂ ਹੋਣ, ਜਹਾਜ਼ੀ ਆਵਾਜਾਈ, ਬਿਜਲੀ ਉਤਪਾਦਨ ਜਾਂ ਖਾਣ-ਪੀਣ ਦੀਆਂ ਵਸਤਾਂ ਦੀ ਸਪਲਾਈ। ਇਸ ਲਈ ਇੰਧਨ ਦੀਆਂ ਵਧਦੀਆਂ ਕੀਮਤਾਂ ਨਾਲ ਜੀਵਨ ਯਾਪਨ ਦੀ ਲਾਗਤ ‘ਤੇ ਵੱਡਾ ਅਸਰ ਪੈ ਸਕਦਾ ਹੈ।