Air New Zealand ਦੀ ਇੱਕ ਉਡਾਣ ਦੀ ਅੱਜ ਸਵੇਰੇ ਪਾਇਲਟਾਂ ਦੀ ਸਮਝਦਾਰੀ ਨਾਲ ਸੁਰੱਖਿਅਤ ਢੰਗ ਨਾਲ Auckland ਹਵਾਈ ਅੱਡੇ ‘ਤੇ ਲੈਂਡਿੰਗ ਕਾਰਵਾਈ ਗਈ ਹੈ। ਪਾਇਲਟਾਂ ਨੇ ਜਹਾਜ਼ ਦੇ ਅਗਲੇ ਸ਼ੀਸ਼ੇ (ਵਿੰਡਸਕ੍ਰੀਨ) ਵਿੱਚ ਦਰਾਰ ਦੇਖੀ ਸੀ। ਏਅਰ ਨਿਊਜ਼ੀਲੈਂਡ ਦੇ ਮੁੱਖ ਓਪਰੇਸ਼ਨਲ ਸੁਰੱਖਿਆ ਅਤੇ ਖਤਰਾ ਪ੍ਰਬੰਧਨ ਅਧਿਕਾਰੀ ਨੇ ਦੱਸਿਆ ਕਿ ਫਲਾਈਟ NZ5036 New Plymouth ਤੋਂ ਆਕਲੈਂਡ ਵੱਲ ਜਾ ਰਹੀ ਸੀ, ਜਦੋਂ ਉਡਾਣ ਦੌਰਾਨ ਪਾਇਲਟਾਂ ਨੂੰ ਵਿੰਡਸਕ੍ਰੀਨ ਵਿੱਚ ਦਰਾਰ ਨਜ਼ਰ ਆਈ। ਉਨ੍ਹਾਂ ਕਿਹਾ ਕਿ ਪਾਇਲਟਾਂ ਨੇ ਤੁਰੰਤ ਮਿਆਰੀ ਕਾਰਜ ਪ੍ਰਕਿਰਿਆ ਅਨੁਸਾਰ ਸਾਵਧਾਨੀ ਵਜੋਂ ਜਹਾਜ਼ ਦੀ ਉਚਾਈ ਘਟਾ ਦਿੱਤੀ।
ਜਹਾਜ਼ ਦੇ ਆਕਲੈਂਡ ਪਹੁੰਚਣ ‘ਤੇ ਸਵੇਰੇ ਕਰੀਬ 10:15 ਵਜੇ ਹਵਾਈ ਅੱਡੇ ਦੀ ਐਮਰਜੈਂਸੀ ਸੇਵਾਵਾਂ ਨੂੰ ਇਸ ਤਕਨੀਕੀ ਖਾਮੀ ਬਾਰੇ ਸੂਚਿਤ ਕੀਤਾ ਗਿਆ। ਜਹਾਜ਼ ਬਿਨਾਂ ਕਿਸੇ ਘਟਨਾ ਦੇ ਸੁਰੱਖਿਅਤ ਤਰੀਕੇ ਨਾਲ ਉਤਰ ਗਿਆ ਅਤੇ ਹੋਰ ਆਉਣ ਜਾਂ ਜਾਣ ਵਾਲੀਆਂ ਉਡਾਣਾਂ ‘ਤੇ ਕੋਈ ਅਸਰ ਨਹੀਂ ਪਿਆ। ਇਸ ਘਟਨਾ ਦੌਰਾਨ ਕਿਸੇ ਵੀ ਯਾਤਰੀ ਜਾਂ ਕਰਮਚਾਰੀ ਦੇ ਜ਼ਖਮੀ ਹੋਣ ਦੀ ਕੋਈ ਰਿਪੋਰਟ ਨਹੀਂ ਹੈ। ਅਧਿਕਾਰੀ ਨੇ ਇਹ ਵੀ ਦੱਸਿਆ ਕਿ ਜਹਾਜ਼ ਦੀ ਵਿੰਡਸਕ੍ਰੀਨ ਕਈ ਪਰਤਾਂ ਵਾਲੇ ਕੱਚ ਨਾਲ ਬਣੀ ਹੁੰਦੀ ਹੈ, ਜਿਸ ਕਾਰਨ ਇੱਕ ਪਰਤ ਵਿੱਚ ਦਰਾਰ ਆ ਜਾਣ ਨਾਲ ਪੂਰੇ ਸ਼ੀਸ਼ੇ ਦੀ ਮਜ਼ਬੂਤੀ ‘ਤੇ ਵੱਡਾ ਅਸਰ ਨਹੀਂ ਪੈਂਦਾ।