ਨਿਊਜ਼ੀਲੈਂਡ ਦੇ ਵਿਵਾਦਤ ਆਗੂ ਅਤੇ ਡੈਸਟਿਨੀ ਚਰਚ ਦੇ ਮੁਖੀ ਬ੍ਰਾਇਨ ਤਾਮਾਕੀ ਨੇ ਪਿਛਲੇ ਦਿਨੀ ਫਿਰ ਇੱਕ ਮਾਰਚ ਦਾ ਸੱਦਾ ਦਿੱਤਾ ਸੀ। ਤਾਮਾਕੀ ਨੇ ਕਿਹਾ ਸੀ ਕਿ ਉਸਦੀ ਸੰਸਥਾ 31 ਜਨਵਰੀ ਨੂੰ ਆਕਲੈਂਡ ਦੇ ਹਾਰਬਰ ਬ੍ਰਿਜ਼ ’ਤੇ “Bridge to Better” ਨਾਮ ਦਾ ਰੋਸ ਮਾਰਚ ਜ਼ਰੂਰ ਕਰੇਗੀ, ਭਾਵੇਂ ਅਧਿਕਾਰੀਆਂ ਨੇ ਇਸ ਲਈ ਮਨਜ਼ੂਰੀ ਦੇਣ ਤੋਂ ਇਨਕਾਰ ਕਰ ਦਿੱਤਾ ਹੈ।
ਉੱਥੇ ਹੀ ਹੁਣ ਨਿਊਜ਼ੀਲੈਂਡ ਪੁਲਿਸ ਨੇ ਸਪਸ਼ਟ ਕੀਤਾ ਹੈ ਕਿ ਉਹ ਡੈਸਟਿਨੀ ਚਰਚ ਵੱਲੋਂ ਆਕਲੈਂਡ ਹਾਰਬਰ ਬ੍ਰਿਜ਼ ’ਤੇ ਕੱਢੀ ਜਾਣ ਵਾਲੀ ਰੋਸ ਮਾਰਚ ਨੂੰ ਰੋਕਣਗੇ ਅਤੇ ਪੁਲ ’ਤੇ ਪੈਦਲ ਜਾਣ ਦੀ ਹਰ ਕੋਸ਼ਿਸ਼ ਨੂੰ ਗੈਰਕਾਨੂੰਨੀ ਮੰਨਿਆ ਜਾਵੇਗਾ। ਉੱਚ ਅਧਿਕਾਰੀ ਨੇ ਦੱਸਿਆ ਕਿ ਇਸ ਮਾਮਲੇ ਲਈ ਦੇਸ਼ ਭਰ ਤੋਂ ਵੱਡੀ ਗਿਣਤੀ ਵਿੱਚ ਪੁਲਿਸ ਕਰਮਚਾਰੀ ਤਾਇਨਾਤ ਕੀਤੇ ਗਏ ਹਨ। ਪਿਛਲੇ ਦਿਨੀ ਨਿਊਜ਼ੀਲੈਂਡ ਟਰਾਂਸਪੋਰਟ ਏਜੰਸੀ ਵਾਕਾ ਕੋਟਾਹੀ (NZTA) ਨੇ ਸੁਰੱਖਿਆ ਕਾਰਨਾਂ ਕਰਕੇ Freedom and Rights Coalition (ਜੋ ਡੈਸਟਿਨੀ ਚਰਚ ਨਾਲ ਜੁੜੀ ਹੈ) ਦੀ ਅਰਜ਼ੀ ਰੱਦ ਕਰ ਦਿੱਤੀ ਸੀ।
ਵਾਈਟਮਾਟਾ ਜ਼ਿਲ੍ਹੇ ਦੀ ਪੁਲਿਸ ਕਮਾਂਡਰ ਸੁਪਰਿੰਟੈਂਡੈਂਟ ਨੈਲਾ ਹਸਨ ਨੇ ਕਿਹਾ, “ਕੋਈ ਵੀ ਵਿਅਕਤੀ ਜੇ ਮੋਟਰਵੇ ਜਾਂ ਹਾਰਬਰ ਬ੍ਰਿਜ਼ ’ਤੇ ਪੈਦਲ ਜਾਣ ਦੀ ਕੋਸ਼ਿਸ਼ ਕਰੇਗਾ, ਉਸਨੂੰ ਰੋਕਿਆ ਜਾਵੇਗਾ। ਇਹ ਗੈਰਕਾਨੂੰਨੀ ਕਿਰਿਆ ਹੈ ਅਤੇ ਇਸ ਦੇ ਨਤੀਜੇ ਭੁਗਤਣੇ ਪੈਣਗੇ।” ਆਕਲੈਂਡ ਦੀ ਡਿਪਟੀ ਮੇਅਰ ਡੈਸਲੀ ਸਿੰਪਸਨ ਨੇ ਵੀ ਇਸ ਯੋਜਨਾ ਦਾ ਵਿਰੋਧ ਕਰਦਿਆਂ ਕਿਹਾ ਕਿ ਇਸ ਨਾਲ ਹਜ਼ਾਰਾਂ ਲੋਕਾਂ ਦੀ ਵੀਕਐਂਡ ਯਾਤਰਾ ਪ੍ਰਭਾਵਿਤ ਹੋ ਸਕਦੀ ਹੈ। ਉਨ੍ਹਾਂ ਸਰਕਾਰ ਨੂੰ ਅਪੀਲ ਕੀਤੀ ਕਿ ਇਸ ਮਾਮਲੇ ’ਚ ਸਖ਼ਤ ਰੁਖ ਅਪਣਾਇਆ ਜਾਵੇ।