ਇੱਕ ਰਿਪੋਰਟ ਵਿੱਚ ਖੁਲਾਸਾ ਹੋਇਆ ਹੈ ਕਿ ਹਾਰਮੋਨਲ ਜਨਮ ਨਿਯੰਤਰਣ ਗੋਲੀਆਂ, ਖਾਸ ਕਰਕੇ ਐਸਟ੍ਰੋਜਨ ਅਤੇ ਪ੍ਰੋਜੈਸਟਿਨ ਵਾਲੀਆਂ ਮਿਸ਼ਰਨ ਗੋਲੀਆਂ ਦੀ ਵਰਤੋਂ ਕਰਨ ਵਾਲੀਆਂ ਨੌਜਵਾਨ ਔਰਤਾਂ ਵਿੱਚ ਕ੍ਰਿਪਟੋਜੈਨਿਕ ਸਟ੍ਰੋਕ ਦਾ ਖ਼ਤਰਾ ਤਿੰਨ ਗੁਣਾ ਵੱਧ ਹੋ ਸਕਦਾ ਹੈ। ਇੱਕ ਕ੍ਰਿਪਟੋਜੈਨਿਕ ਸਟ੍ਰੋਕ ਉਹ ਹੁੰਦਾ ਹੈ ਜਿਸਦਾ ਕੋਈ ਸਪੱਸ਼ਟ ਕਾਰਨ ਨਹੀਂ ਹੁੰਦਾ ਅਤੇ ਨੌਜਵਾਨ ਬਾਲਗਾਂ ਵਿੱਚ ਇਸਕੇਮਿਕ ਸਟ੍ਰੋਕ ਦੇ 40% ਕੇਸਾਂ ਲਈ ਜ਼ਿੰਮੇਵਾਰ ਹੁੰਦਾ ਹੈ।
ਇਸ ਵਧਦੇ ਸਿਹਤ ਜੋਖਮ ਦੇ ਬਾਵਜੂਦ, ਗਰਭ ਨਿਰੋਧਕ ਦਵਾਈਆਂ ਨਾਲ ਜੁੜੇ ਸਟ੍ਰੋਕ ਦੇ ਜੋਖਮਾਂ ਵੱਲ ਹੁਣ ਤੱਕ ਧਿਆਨ ਨਹੀਂ ਦਿੱਤਾ ਗਿਆ ਹੈ। ਇਹ ਅਧਿਐਨ ਇਸਤਾਂਬੁਲ ਯੂਨੀਵਰਸਿਟੀ ਦੇ ਡਾ. ਮਾਈਨ ਸੇਜ਼ਗਿਨ ਅਤੇ ਉਨ੍ਹਾਂ ਦੀ ਟੀਮ ਦੁਆਰਾ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਇਹ ਖੋਜ ਦਰਸਾਉਂਦੀ ਹੈ ਕਿ ਗਰਭ ਨਿਰੋਧਕ ਗੋਲੀਆਂ ਸਟ੍ਰੋਕ ਦੇ ਜੋਖਮ ਨੂੰ ਵਧਾ ਸਕਦੀਆਂ ਹਨ, ਅਤੇ ਇਹ ਜੋਖਮ ਉਦੋਂ ਵੀ ਬਣਿਆ ਰਹਿੰਦਾ ਹੈ ਜਦੋਂ ਹੋਰ ਜੋਖਮਾਂ ਨੂੰ ਵੀ ਧਿਆਨ ਵਿੱਚ ਰੱਖਿਆ ਜਾਂਦਾ ਹੈ। ਇਸ ਤੋਂ ਪਤਾ ਚੱਲਦਾ ਹੈ ਕਿ ਇਸਦੇ ਜੈਨੇਟਿਕ (ਵਿਰਾਸਤੀ) ਜਾਂ ਕੁਝ ਹੋਰ ਅੰਦਰੂਨੀ ਕਾਰਨ ਹੋ ਸਕਦੇ ਹਨ।
ਇਸ ਖੋਜ ਵਿੱਚ 18 ਤੋਂ 49 ਸਾਲ ਦੀ ਉਮਰ ਦੀਆਂ 268 ਔਰਤਾਂ ਸ਼ਾਮਿਲ ਸਨ ਜਿਨ੍ਹਾਂ ਨੂੰ ਕ੍ਰਿਪਟੋਜੈਨਿਕ ਸਟ੍ਰੋਕ ਹੋਇਆ ਸੀ। ਉਨ੍ਹਾਂ ਦੀ ਤੁਲਨਾ 268 ਔਰਤਾਂ ਨਾਲ ਕੀਤੀ ਗਈ ਜਿਨ੍ਹਾਂ ਨੂੰ ਕਦੇ ਸਟ੍ਰੋਕ ਨਹੀਂ ਹੋਇਆ ਸੀ। ਇਹ ਖੋਜ ਯੂਰਪ ਦੇ 14 ਮੈਡੀਕਲ ਸੈਂਟਰਾਂ ਵਿੱਚ ਕੀਤੀ ਗਈ ਸੀ। ਡਾਕਟਰਾਂ ਦਾ ਕਹਿਣਾ ਹੈ ਕਿ ਜੋ ਔਰਤਾਂ ਪਹਿਲਾਂ ਹੀ ਦਿਲ ਜਾਂ ਨਸਾਂ ਨਾਲ ਸਬੰਧਤ ਕਿਸੇ ਵੀ ਬਿਮਾਰੀ ਤੋਂ ਪੀੜਤ ਹਨ ਜਾਂ ਜਿਨ੍ਹਾਂ ਨੂੰ ਸਟ੍ਰੋਕ ਦਾ ਇਤਿਹਾਸ ਹੈ, ਉਨ੍ਹਾਂ ਨੂੰ ਗਰਭ ਨਿਰੋਧਕ ਗੋਲੀਆਂ ਲੈਣ ਤੋਂ ਪਹਿਲਾਂ ਡਾਕਟਰ ਦੀ ਸਲਾਹ ਜ਼ਰੂਰ ਲੈਣੀ ਚਾਹੀਦੀ ਹੈ।
ਡਾ. ਸੇਜ਼ਗਿਨ ਨੇ ਕਿਹਾ ਕਿ ਇਹ ਖੋਜ ਡਾਕਟਰਾਂ ਅਤੇ ਔਰਤਾਂ ਦੋਵਾਂ ਨੂੰ ਗਰਭ ਨਿਰੋਧਕ ਗੋਲੀਆਂ ਦੀ ਵਰਤੋਂ ਬਾਰੇ ਸੂਚਿਤ ਫੈਸਲੇ ਲੈਣ ਲਈ ਉਤਸ਼ਾਹਿਤ ਕਰੇਗੀ, ਖਾਸ ਕਰਕੇ ਜੇਕਰ ਔਰਤ ਨੂੰ ਪਹਿਲਾਂ ਤੋਂ ਕੋਈ ਸਿਹਤ ਸਮੱਸਿਆ ਹੈ। ਖੋਜਕਰਤਾ ਹੁਣ ਇਹ ਪਤਾ ਲਗਾਉਣ ਦੀ ਕੋਸ਼ਿਸ਼ ਕਰਨਗੇ ਕਿ ਹਾਰਮੋਨਲ ਗਰਭ ਨਿਰੋਧਕ ਗੋਲੀਆਂ ਸਟ੍ਰੋਕ ਦੇ ਜੋਖਮ ਨੂੰ ਕਿਉਂ ਵਧਾਉਂਦੀਆਂ ਹਨ, ਤਾਂ ਜੋ ਇਸਦੇ ਪਿੱਛੇ ਅੰਦਰੂਨੀ ਸਰੀਰ ਅਤੇ ਖ਼ਾਨਦਾਨੀ (ਜੈਨੇਟਿਕ) ਕਾਰਨਾਂ ਨੂੰ ਬਿਹਤਰ ਢੰਗ ਨਾਲ ਸਮਝਿਆ ਜਾ ਸਕੇ। ਇਹ ਰਿਪੋਰਟ ਹਾਲ ਹੀ ਵਿੱਚ ਫਿਨਲੈਂਡ ਦੇ ਹੇਲਸਿੰਕੀ ਵਿੱਚ ਯੂਰਪੀਅਨ ਸਟ੍ਰੋਕ ਸੰਗਠਨ ਕਾਨਫਰੰਸ 2025 ਵਿੱਚ ਪੇਸ਼ ਕੀਤੀ ਗਈ ਸੀ।