ਪਿਛਲੇ ਮਹੀਨੇ ਵੈਲਿੰਗਟਨ ‘ਚ ਇੱਕ ਪਾਰਟੀ ਵਿੱਚ “ਬਿਨਾਂ ਕਿਸੇ ਕਾਰਨ ਦੇ ਹਮਲੇ” ਵਿੱਚ ਸੱਤ ਨੌਜਵਾਨਾਂ ਦੀ ਕੁੱਟਮਾਰ ਤੋਂ ਬਾਅਦ ਪੁਲਿਸ ਨੇ ਉਨ੍ਹਾਂ ਲੋਕਾਂ ਦੀਆਂ ਤਸਵੀਰਾਂ ਜਾਰੀ ਕੀਤੀਆਂ ਹਨ ਜਿਨ੍ਹਾਂ ਤੋਂ ਉਹ ਪੁੱਛਗਿੱਛ ਕਰਨਾ ਚਾਹੁੰਦੇ ਹਨ। ਦਰਅਸਲ 13 ਦਸੰਬਰ ਨੂੰ ਲਗਭਗ 90 ਨੌਜਵਾਨ ਜੌਨਸਨਵਿਲ ਦੇ ਚੁਰਟਨ ਪਾਰਕ ਵਿੱਚ ਇੱਕ ਕੰਪਲੈਕਸ ਵਿੱਚ ਇੱਕ ਇਕੱਠ ਵਿੱਚ ਸ਼ਾਮਿਲ ਹੋਏ ਸਨ, ਜਦੋਂ ਚਾਰ ਲੋਕ ਰਾਤ 10.30 ਵਜੇ ਦੇ ਕਰੀਬ ਬਿਨਾਂ ਬੁਲਾਏ ਇਸ ਪਾਰਟੀ ‘ਚ ਪਹੁੰਚੇ। ਕਾਰਜਕਾਰੀ ਡਿਟੈਕਟਿਵ ਸਾਰਜੈਂਟ ਲੌਰਾ ਮਰਡੋਕ ਨੇ ਕਿਹਾ ਕਿ ਸਮੂਹ ਨੇ ਮਾਸਕ ਪਾਏ ਹੋਏ ਸਨ ਅਤੇ ਹਥਿਆਰਾਂ ਨਾਲ ਲੈਸ ਸਨ।
ਉਨ੍ਹਾਂ ਕਿਹਾ ਕਿ, “ਕਥਿਤ ਅਪਰਾਧੀਆਂ ਨੇ ਫਿਰ ਇਲਾਕੇ ਤੋਂ ਭੱਜਣ ਤੋਂ ਪਹਿਲਾਂ ਇਕੱਠ ਵਿੱਚ ਹਾਜ਼ਰ ਸੱਤ ਨੌਜਵਾਨਾਂ ‘ਤੇ ਇੱਕ ਯੋਜਨਾਬੱਧ, ਹਿੰਸਕ, ਬਿਨਾਂ ਭੜਕਾਹਟ ਦੇ ਹਮਲਾ ਕੀਤਾ। ਇਸ ਹਮਲੇ ਕਾਰਨ ਸੱਤ ਲੋਕਾਂ ਨੂੰ ਕਈ ਤਰ੍ਹਾਂ ਦੀਆਂ ਸੱਟਾਂ ਲੱਗੀਆਂ, ਮਾਮੂਲੀ ਸੱਟਾਂ ਤੋਂ ਲੈ ਕੇ ਇੱਕ ਨੌਜਵਾਨ ਦੇ ਖੋਪੜੀ ‘ਚ ਗੰਭੀਰ ਤੱਕ ਜਿਸ ਲਈ ਸਰਜਰੀ ਦੀ ਲੋੜ ਸੀ। ਹਾਲਾਂਕਿ ਹੁਣ ਸਾਰੇ ਨੌਜਵਾਨ ਆਪਣੇ ਘਰ ਹਨ ਅਤੇ ਸੱਟਾਂ ਤੋਂ ਠੀਕ ਹੋ ਰਹੇ ਹਨ।”
ਮਰਡੋਕ ਨੇ ਕਿਹਾ ਕਿ ਪੁਲਿਸ ਇਕੱਠ ਦੇ ਪੀੜਤਾਂ ਅਤੇ ਗਵਾਹਾਂ ਨਾਲ ਗੱਲ ਕਰ ਰਹੀ ਹੈ। ਪੁਲਿਸ ਨੇ ਉਦੋਂ ਤੋਂ ਇਹ ਖੁਲਾਸਾ ਕੀਤਾ ਹੈ ਕਿ ਕਥਿਤ ਤੌਰ ‘ਤੇ ਹਮਲਾਵਰ ਹਮਲੇ ਤੋਂ ਲਗਭਗ 20 ਮਿੰਟ ਪਹਿਲਾਂ ਜੌਨਸਨਵਿਲ ਦੇ ਮੋਬਿਲ ਗੈਸ ਸਟੇਸ਼ਨ ਪਹੁੰਚੇ ਸੀ। ਤਾਵਾ ਦੇ ਇੱਕ 18 ਸਾਲਾ ਵਿਅਕਤੀ ਨੂੰ ਗ੍ਰਿਫ਼ਤਾਰ ਵੀ ਕੀਤਾ ਗਿਆ ਹੈ ਤੇ ਉਸਨੂੰ 29 ਜਨਵਰੀ ਨੂੰ ਵੈਲਿੰਗਟਨ ਜ਼ਿਲ੍ਹਾ ਅਦਾਲਤ ਵਿੱਚ ਕਈ ਦੋਸ਼ਾਂ ਵਿੱਚ ਪੇਸ਼ ਕੀਤਾ ਜਾਣਾ ਹੈ, ਜਿਸ ਵਿੱਚ ਗੰਭੀਰ ਸਰੀਰਕ ਨੁਕਸਾਨ ਪਹੁੰਚਾਉਣ ਦੇ ਇਰਾਦੇ ਨਾਲ ਜ਼ਖਮੀ ਕਰਨਾ, ਜ਼ਖਮੀ ਕਰਨ ਦੇ ਇਰਾਦੇ ਨਾਲ ਹਮਲਾ ਕਰਨਾ ਸ਼ਾਮਿਲ ਹੈ। ਜਾਂਚਕਰਤਾਵਾਂ ਨੇ ਬੁੱਧਵਾਰ ਨੂੰ ਉਨ੍ਹਾਂ ਆਦਮੀਆਂ ਦੀਆਂ ਸੀਸੀਟੀਵੀ ਤਸਵੀਰਾਂ ਜਾਰੀ ਕੀਤੀਆਂ ਜਿਨ੍ਹਾਂ ਨੂੰ ਇਸ ਘਟਨਾ ਨਾਲ ਜੋੜਿਆ ਜਾ ਰਿਹਾ ਹੈ।