ਥਾਈਲੈਂਡ ਦੇ ਦੱਖਣੀ ਸੂਬੇ ਸੋਂਗਖਲਾ ਵਿੱਚ ਬੁੱਧਵਾਰ ਸ਼ਾਮ ਇੱਕ ਸਕੂਲ ਵਿੱਚ ਸ਼ੂਟਰਾਂ ਨੇ ਗੋਲਾਬਾਰੀ ਕੀਤੀ ਅਤੇ ਕਈ ਵਿਦਿਆਰਥੀਆਂ ਅਤੇ ਅਧਿਆਪਕਾਂ ਨੂੰ ਬੰਧਕ ਬਣਾ ਲਿਆ। ਸਥਾਨਕ ਪ੍ਰਸ਼ਾਸਨ ਨੇ ਸੋਸ਼ਲ ਮੀਡੀਆ ‘ਤੇ ਇਸ ਦੀ ਪੁਸ਼ਟੀ ਕੀਤੀ ਹੈ। ਰਾਇਟਰਜ਼ ਦੀ ਰਿਪੋਰਟ ਮੁਤਾਬਕ, ਸੋਂਗਖਲਾ ਸੂਬੇ ਦੇ ਇੱਕ ਸਕੂਲ ਵਿੱਚ ਅਣਪਛਾਤੀ ਗਿਣਤੀ ਵਿੱਚ ਵਿਦਿਆਰਥੀ ਅਤੇ ਅਧਿਆਪਕ ਬੰਧਕ ਹਨ। ਘਟਨਾ ਹਾਟ ਯਾਈ ਜ਼ਿਲ੍ਹੇ ਦੇ ਪਟੋਂਗ ਸਬ-ਡਿਸਟ੍ਰਿਕਟ ਵਿੱਚ ਸਥਿਤ ਪਟੋਂਗ ਪ੍ਰਥਾਨ ਖਿਰੀਵਿਤ ਸਕੂਲ ਵਿੱਚ ਵਾਪਰੀ ਹੈ।
ਗੋਲਾਬਾਰੀ ਵਿੱਚ ਕਈ ਜ਼ਖ਼ਮੀ, ਸਕੂਲ ਵਿੱਚ ਫਸੇ ਲੋਕ
ਥਾਈਲੈਂਡ ਦੀ ਸਥਾਨਕ ਮੀਡੀਆ ਮੁਤਾਬਿਕ, ਬੰਦੂਕਧਾਰੀ ਸਕੂਲ ਵਿੱਚ ਦਾਖਲ ਹੋਇਆ ਅਤੇ ਫਾਇਰਿੰਗ ਕੀਤੀ, ਜਿਸ ਵਿੱਚ ਇੱਕ ਅਧਿਆਪਕ ਜ਼ਖ਼ਮੀ ਹੋ ਗਿਆ ਅਤੇ ਉਸ ਨੂੰ ਹਸਪਤਾਲ ਲਿਜਾਇਆ ਗਿਆ। ਕੁਝ ਰਿਪੋਰਟਾਂ ਵਿੱਚ ਬੱਚਿਆਂ ਸਮੇਤ ਕਈ ਲੋਕਾਂ ਦੇ ਜ਼ਖ਼ਮੀ ਹੋਣ ਦੀ ਗੱਲ ਕਹੀ ਗਈ ਹੈ, ਪਰ ਜ਼ਖ਼ਮੀਆਂ ਦੀ ਸਹੀ ਗਿਣਤੀ ਅਜੇ ਸਪੱਸ਼ਟ ਨਹੀਂ ਹੈ। ਕਈ ਵਿਦਿਆਰਥੀ ਅਤੇ ਅਧਿਆਪਕ ਅਜੇ ਵੀ ਸਕੂਲ ਅੰਦਰ ਫਸੇ ਹੋਏ ਹਨ ਅਤੇ ਬਾਹਰ ਨਹੀਂ ਨਿਕਲ ਸਕੇ। ਥੁੰਗ ਲੁੰਗ ਪੁਲਿਸ ਸਟੇਸ਼ਨ ਨੇ ਸਕੂਲ ਨੂੰ ਘੇਰ ਲਿਆ ਹੈ। ਸਪੈਸ਼ਲ ਓਪਰੇਸ਼ਨ ਯੂਨਿਟ ਅਤੇ ਰੈਸਕਿਊ ਟੀਮ ਮੌਕੇ ‘ਤੇ ਪਹੁੰਚ ਚੁੱਕੀਆਂ ਹਨ ਅਤੇ ਹਾਲਾਤ ‘ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਹਨ।
ਸੰਦੇਹੀ ਦੀ ਪਛਾਣ
ਥਾਈਰਾਥ ਨਿਊਜ਼ ਮੁਤਾਬਕ, ਸੰਦੇਹੀ ਦੀ ਪਛਾਣ 18 ਸਾਲਾ ‘ਖੇਮ’ ਵਜੋਂ ਹੋਈ ਹੈ। ਉਸ ਨੇ ਸਕੂਲ ਦੇ ਫਰਸਟ ਫਲੋਰ ‘ਤੇ ਪਬਲਿਕ ਰਿਲੇਸ਼ਨਜ਼ ਰੂਮ ਵਿੱਚ ਇੱਕ ਮਹਿਲਾ ਸਟਾਫ ਮੈਂਬਰ ਨੂੰ ਬੰਧਕ ਬਣਾਇਆ ਹੋਇਆ ਹੈ। ਕੁਝ ਰਿਪੋਰਟਾਂ ਵਿੱਚ ਕਿਹਾ ਗਿਆ ਹੈ ਕਿ ਮਥਾਯੋਮ 5 (ਗ੍ਰੇਡ 11) ਦੇ ਇੱਕ ਵਿਦਿਆਰਥੀ ਨੂੰ ਵੀ ਬੰਧਕ ਬਣਾਇਆ ਗਿਆ ਹੈ। ਪੁਲਿਸ ਨੇ ਸਕੂਲ ਦੇ ਆਲੇ-ਦੁਆਲੇ ਇਲਾਕਾ ਸੀਲ ਕਰ ਦਿੱਤਾ ਹੈ ਅਤੇ ਗੱਲਬਾਤ ਰਾਹੀਂ ਮਾਮਲਾ ਸੁਲਝਾਉਣ ਦੀ ਕੋਸ਼ਿਸ਼ ਕੀਤੀ ਜਾ ਰਹੀ ਹੈ।
ਛੁੱਟੀ ਦੇ ਸਮੇਂ ਵਾਪਰੀ ਘਟਨਾ
ਇਹ ਘਟਨਾ ਸਕੂਲ ਦੀ ਛੁੱਟੀ ਦੇ ਸਮੇਂ ਦੇ ਨੇੜੇ ਵਾਪਰੀ, ਜਦੋਂ ਵਿਦਿਆਰਥੀ ਘਰ ਵੱਲ ਜਾ ਰਹੇ ਸਨ। ਮੈ ਤਪਤਿਮ ਯਾਲਾ ਫਾਊਂਡੇਸ਼ਨ ਨੇ ਫੇਸਬੁੱਕ ‘ਤੇ ਸਭ ਤੋਂ ਪਹਿਲਾਂ ਇਸ ਬਾਰੇ ਜਾਣਕਾਰੀ ਦਿੱਤੀ ਸੀ। ਸਥਾਨਕ ਪ੍ਰਸ਼ਾਸਨ ਅਤੇ ਪੁਲਿਸ ਸਥਿਤੀ ‘ਤੇ ਨਜ਼ਰ ਰੱਖੇ ਹੋਏ ਹਨ। ਅਜੇ ਤੱਕ ਕਿਸੇ ਦੀ ਮੌਤ ਦੀ ਖ਼ਬਰ ਨਹੀਂ ਹੈ, ਪਰ ਜ਼ਖ਼ਮੀਆਂ ਦੀ ਗਿਣਤੀ ਵੱਧ ਸਕਦੀ ਹੈ। ਰੈਸਕਿਊ ਓਪਰੇਸ਼ਨ ਜਾਰੀ ਹੈ ਅਤੇ ਆਉਣ ਵਾਲਿਆਂ ਘੰਟਿਆਂ ਵਿੱਚ ਹੋਰ ਅਪਡੇਟ ਆ ਸਕਦੀਆਂ ਹਨ। ਥਾਈ ਸਰਕਾਰ ਅਤੇ ਪੁਲਿਸ ਨੇ ਲੋਕਾਂ ਨੂੰ ਸ਼ਾਂਤ ਰਹਿਣ ਅਤੇ ਅਫਵਾਹਾਂ ‘ਤੇ ਵਿਸ਼ਵਾਸ ਨਾ ਕਰਨ ਦੀ ਅਪੀਲ ਕੀਤੀ ਹੈ।
ਥਾਈਲੈਂਡ ਵਿੱਚ ਬੰਦੂਕ ਹਿੰਸਾ ਦੇ ਮਾਮਲੇ ਪਹਿਲਾਂ ਵੀ ਸਾਹਮਣੇ ਆ ਚੁੱਕੇ ਹਨ। ਜਿਵੇਂ 2022 ਵਿੱਚ ਇੱਕ ਸਾਬਕਾ ਪੁਲਿਸਕਰਮੀ ਨੇ ਡੇਅ-ਕੇਅਰ ਸੈਂਟਰ ਵਿੱਚ 37 ਲੋਕਾਂ ਦੀ ਹੱਤਿਆ ਕਰ ਦਿੱਤੀ ਸੀ, ਜਿਨ੍ਹਾਂ ਵਿੱਚ ਜ਼ਿਆਦਾਤਰ ਬੱਚੇ ਸਨ। ਪਰ ਸਕੂਲ ਵਿੱਚ ਬੰਧਕ ਬਣਾਉਣ ਵਾਲੀ ਇਹ ਘਟਨਾ ਬਹੁਤ ਹੀ ਗੰਭੀਰ ਮੰਨੀ ਜਾ ਰਹੀ ਹੈ।