ਨਿਊਜ਼ੀਲੈਂਡ ਦੇ Waikato Region ਵਿੱਚ ਇੱਕ ਅਧਿਆਪਕਾ ਨੂੰ ਸ਼ਰਾਬ ਦੀ ਲਤ ਕਾਰਨ ਗੰਭੀਰ ਅਨੁਸ਼ਾਸਨਾਤਮਕ ਕਾਰਵਾਈ ਦਾ ਸਾਹਮਣਾ ਕਰਨਾ ਪਿਆ ਹੈ। ਮਾਮਲਾ Teachers Disciplinary Tribunal ਅੱਗੇ ਸੁਣਿਆ ਗਿਆ ਹੈ, ਜਿੱਥੇ ਉਸਨੂੰ ਪੇਸ਼ੇਵਰ ਮਿਆਰਾਂ ਦੀ ਉਲੰਘਣਾ ਲਈ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ। ਅਧਿਆਪਕਾ ਨੂੰ ਸ਼ਰਾਬ ਦੀ ਲਤ ਕਾਰਨ ਵਾਈਨ ਦੀਆਂ ਬੋਤਲਾਂ ਚੋਰੀ ਕਰਨ ਅਤੇ ਸਕੂਲ ਵਿੱਚ ਡਿਊਟੀ ਦੌਰਾਨ ਸ਼ਰਾਬ ਪੀਣ ਦੇ ਦੋਸ਼ਾਂ ‘ਚ ਦੋਸ਼ੀ ਕਰਾਰ ਦਿੱਤਾ ਗਿਆ। ਅਧਿਆਪਕਾ ਨੇ ਆਪਣੀ ਗਲਤੀ ਮੰਨ ਲਈ ਹੈ ਅਤੇ ਪੁਲਿਸ ਡਾਈਵਰਜ਼ਨ ਤਹਿਤ ਚੋਰੀ ਕੀਤੇ ਸਮਾਨ ਦੀ ਭਰਪਾਈ ਅਤੇ ਇਲਾਜ ਪੂਰਾ ਕੀਤਾ, ਜਿਸ ਤੋਂ ਬਾਅਦ ਫੌਜਦਾਰੀ ਦੋਸ਼ ਰੱਦ ਕਰ ਦਿੱਤੇ ਗਏ।
ਟ੍ਰਿਬਿਊਨਲ ਨੇ ਕਿਹਾ ਕਿ ਸਕੂਲ ਵਿੱਚ ਬੱਚਿਆਂ ਦੀ ਜ਼ਿੰਮੇਵਾਰੀ ਦੌਰਾਨ ਗੁਪਤ ਤੌਰ ‘ਤੇ ਸ਼ਰਾਬ ਪੀਣਾ ਵਿਦਿਆਰਥੀਆਂ ਦੀ ਸੁਰੱਖਿਆ ਲਈ ਖਤਰਾ ਸੀ। ਰਿਪੋਰਟ ਅਨੁਸਾਰ ਅਧਿਆਪਕਾ 2011 ਤੋਂ ਰਜਿਸਟਰਡ ਟੀਚਰ ਸੀ ਅਤੇ ਉਸਦੀ ਸ਼ਰਾਬ ਨਾਲ ਸੰਬੰਧਿਤ ਸਮੱਸਿਆ 2020 ਵਿੱਚ ਕੋਵਿਡ-19 ਲਾਕਡਾਊਨ ਦੌਰਾਨ ਸ਼ੁਰੂ ਹੋਈ। ਉਸਨੇ ਆਪਣੀ ਮਾਨਸਿਕ ਤਕਲੀਫ਼ ਦਾ ਕਾਰਨ ਵਿਆਹ ਟੁੱਟਣਾ, ਇਕੱਲੀ ਮਾਂ ਵਜੋਂ ਜੀਵਨ ਬਿਤਾਉਣਾ ਅਤੇ ਲਾਕਡਾਊਨ ਦੌਰਾਨ ਕੰਮ ਦਾ ਦਬਾਅ ਦੱਸਿਆ।