ਨਿਊਜ਼ੀਲੈਂਡ ਦੇ ਆਕਲੈਂਡ ਏਅਰਪੋਰਟ ’ਤੇ ਕਸਟਮ ਅਧਿਕਾਰੀਆਂ ਨੇ ਵੱਡੀ ਕਾਰਵਾਈ ਕਰਦੇ ਹੋਏ ਕਰੀਬ 22 ਲੱਖ ਡਾਲਰ ਮੁੱਲ ਦੀ ਕੋਕੀਨ ਬਰਾਮਦ ਕੀਤੀ ਹੈ। ਇਸ ਮਾਮਲੇ ਵਿੱਚ ਵਿਦੇਸ਼ੀ ਮੂਲ ਦੇ ਦੋ ਨੌਜਵਾਨਾਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ। ਗ੍ਰਿਫ਼ਤਾਰ ਕੀਤੇ ਗਏ ਦੋਵੇਂ ਨੌਜਵਾਨ 22 ਅਤੇ 23 ਸਾਲ ਦੀ ਉਮਰ ਦੇ ਹਨ ਅਤੇ ਉਹ ਚਿਲੀ ਦੇ ਸੈਂਟਿਆਗੋ ਸ਼ਹਿਰ ਤੋਂ ਬੁੱਧਵਾਰ ਰਾਤ ਆਕਲੈਂਡ ਪਹੁੰਚੇ ਸਨ। ਪਾਸਪੋਰਟ ਜਾਂਚ ਦੌਰਾਨ ਸ਼ੱਕ ਹੋਣ ’ਤੇ ਕਸਟਮ ਅਧਿਕਾਰੀਆਂ ਨੇ ਉਨ੍ਹਾਂ ਦੇ ਸਮਾਨ ਦੀ ਤਲਾਸ਼ੀ ਲਈ।
ਜਦੋਂ ਅਧਿਕਾਰੀਆਂ ਨੇ ਸੂਟਕੇਸਾਂ ਦਾ ਸਮਾਨ ਬਾਹਰ ਕੱਢ ਕੇ ਐਕਸ-ਰੇ ਕੀਤਾ ਤਾਂ ਸੂਟਕੇਸ ਦੇ ਅੰਦਰ ਗੜਬੜ ਨਜ਼ਰ ਆਈ। ਵਧੇਰੇ ਜਾਂਚ ਕਰਨ ’ਤੇ ਪਤਾ ਲੱਗਿਆ ਕਿ ਦੋਵੇਂ ਸੂਟਕੇਸਾਂ ਦੇ ਅੰਦਰਲੇ ਹਿੱਸੇ ਵਿੱਚ ਝੂਠਾ ਤਲਾ ਬਣਾਇਆ ਗਿਆ ਸੀ। ਇਸ ਵਿੱਚ ਵੈਕਿਊਮ ਸੀਲ ਕੀਤੇ ਪੈਕਟ ਲੁਕਾਏ ਹੋਏ ਸਨ, ਜਿਨ੍ਹਾਂ ਵਿੱਚ ਮਿਲੀ ਪਾਊਡਰ ਨੁਮਾ ਵਸਤੂ ਦੀ ਜਾਂਚ ਕਰਨ ’ਤੇ ਉਹ ਕੋਕੀਨ ਨਿਕਲੀ।
ਕਸਟਮ ਵਿਭਾਗ ਮੁਤਾਬਕ ਬਰਾਮਦ ਕੀਤੀ ਗਈ ਕੋਕੀਨ ਦਾ ਕੁੱਲ ਭਾਰ ਕਰੀਬ 6.3 ਕਿਲੋਗ੍ਰਾਮ ਹੈ। ਇਹ ਨਸ਼ਾ ਲਗਭਗ 63 ਹਜ਼ਾਰ ਤੋਂ ਵੱਧ ਖੁਰਾਕਾਂ ਦੇ ਬਰਾਬਰ ਮੰਨਿਆ ਜਾ ਰਿਹਾ ਹੈ, ਜਿਸ ਦੀ ਬਾਜ਼ਾਰੀ ਕੀਮਤ ਤਕਰੀਬਨ 22 ਲੱਖ ਡਾਲਰ ਹੈ।
ਆਕਲੈਂਡ ਏਅਰਪੋਰਟ ਦੇ ਕਸਟਮ ਮੈਨੇਜਰ ਪੌਲ ਵਿਲੀਅਮਜ਼ ਨੇ ਕਿਹਾ ਕਿ ਇਹ ਕਾਰਵਾਈ ਨਸ਼ਿਆਂ ਕਾਰਨ ਸਮਾਜ ਨੂੰ ਹੋਣ ਵਾਲੇ ਨੁਕਸਾਨ ਨੂੰ ਰੋਕਣ ਵੱਲ ਇੱਕ ਵੱਡੀ ਕਾਮਯਾਬੀ ਹੈ। ਉਨ੍ਹਾਂ ਚੇਤਾਵਨੀ ਦਿੰਦਿਆਂ ਕਿਹਾ ਕਿ ਜੋ ਲੋਕ ਨਸ਼ੇ ਦੀ ਤਸਕਰੀ ਕਰਨ ਦੀ ਕੋਸ਼ਿਸ਼ ਕਰਦੇ ਹਨ, ਉਹ ਜ਼ਿਆਦਾ ਸਮੇਂ ਤੱਕ ਕਾਨੂੰਨ ਤੋਂ ਨਹੀਂ ਬਚ ਸਕਦੇ।
ਉਨ੍ਹਾਂ ਕਿਹਾ ਕਿ ਨਿਊਜ਼ੀਲੈਂਡ ਦੀ ਸਰਹੱਦ ਪੂਰੀ ਤਰ੍ਹਾਂ ਸੁਰੱਖਿਅਤ ਹੈ ਅਤੇ ਹਰ ਅਜਿਹੀ ਬਰਾਮਦਗੀ ਨਾਲ ਸਮਾਜ ਨੂੰ ਵੱਡੇ ਨੁਕਸਾਨ ਤੋਂ ਬਚਾਇਆ ਜਾਂਦਾ ਹੈ।