ਆਕਲੈਂਡ ਏਅਰਪੋਰਟ ਦੀ ਪਾਰਕਿੰਗ ਮਸ਼ੀਨ ਵਿੱਚ ਆਈ ਤਕਨੀਕੀ ਖ਼ਰਾਬੀ ਨੇ ਭਾਰਤੀ ਮੂਲ ਦੇ ਇਕ ਵਿਅਕਤੀ ਨੂੰ ਹੈਰਾਨ ਕਰ ਦਿੱਤਾ। ਪਾਪਾਟੋਏਟੋਏ ਲੋਕਲ ਬੋਰਡ ਮੈਂਬਰ ਕੁਸ਼ਮਾ ਨਾਇਰ ਉਸ ਵੇਲੇ ਹੈਰਾਨ ਰਹਿ ਗਏ ਜਦੋਂ ਸਿਰਫ਼ 15 ਮਿੰਟ ਦੀ ਪਾਰਕਿੰਗ ਲਈ ਮਸ਼ੀਨ ਨੇ ਉਨ੍ਹਾਂ ਕੋਲੋਂ 4 ਹਜ਼ਾਰ ਡਾਲਰ ਤੋਂ ਵੱਧ ਦੀ ਫੀਸ ਮੰਗ ਲਈ। ਇਹ ਘਟਨਾ ਸੋਮਵਾਰ ਨੂੰ ਆਕਲੈਂਡ ਏਅਰਪੋਰਟ ਦੇ ਇੰਟਰਨੈਸ਼ਨਲ ਟਰਮੀਨਲ ਦੀ ਸ਼ਾਰਟ-ਟਰਮ ਪਾਰਕਿੰਗ ਵਿੱਚ ਵਾਪਰੀ। ਨਾਇਰ ਨੇ ਦੱਸਿਆ ਕਿ ਜਦੋਂ ਉਹ ਪਾਰਕਿੰਗ ਤੋਂ ਬਾਹਰ ਨਿਕਲਣ ਲਈ ਭੁਗਤਾਨ ਮਸ਼ੀਨ ਕੋਲ ਪਹੁੰਚੇ ਤਾਂ ਆਮ ਰਕਮ ਦੀ ਥਾਂ ਸਕਰੀਨ ’ਤੇ $4059 ਦੀ ਫੀਸ ਦਿਖਾਈ ਦਿੱਤੀ।
ਪਹਿਲਾਂ ਉਨ੍ਹਾਂ ਨੂੰ ਲੱਗਿਆ ਕਿ ਮਸ਼ੀਨ ਵਿੱਚ ਕੋਈ ਤਕਨੀਕੀ ਗੜਬੜ ਹੈ, ਕਿਉਂਕਿ ਕੁਝ ਮਿੰਟਾਂ ਦੀ ਪਾਰਕਿੰਗ ਲਈ ਇੰਨੀ ਵੱਡੀ ਰਕਮ ਅਸੰਭਵ ਸੀ। ਦੁਬਾਰਾ ਕੋਸ਼ਿਸ਼ ਕਰਨ ’ਤੇ ਵੀ ਮਸ਼ੀਨ ਨੇ ਉਹੀ ਰਕਮ ਦਿਖਾਈ।
ਬਾਅਦ ਵਿੱਚ ਉਨ੍ਹਾਂ ਨੇ ਹੈਲਪ ਬਟਨ ਰਾਹੀਂ ਕਸਟਮਰ ਸਪੋਰਟ ਨਾਲ ਸੰਪਰਕ ਕੀਤਾ। ਜਾਂਚ ਦੌਰਾਨ ਪਤਾ ਲੱਗਿਆ ਕਿ ਉਨ੍ਹਾਂ ਦੀ ਪਿਛਲੀ ਪਾਰਕਿੰਗ ਸੈਸ਼ਨ ਸਿਸਟਮ ਵਿੱਚ ਸਹੀ ਤਰੀਕੇ ਨਾਲ ਬੰਦ ਨਹੀਂ ਹੋਈ ਸੀ। ਇਸ ਕਾਰਨ ਪੁਰਾਣੇ ਚਾਰਜ ਨਵੇਂ ਦੌਰੇ ਨਾਲ ਜੁੜ ਗਏ ਅਤੇ ਮਸ਼ੀਨ ਨੇ ਹਜ਼ਾਰਾਂ ਡਾਲਰ ਦੀ ਗਲਤ ਰਕਮ ਦਿਖਾ ਦਿੱਤੀ। ਏਅਰਪੋਰਟ ਸਟਾਫ ਨੇ ਬਾਅਦ ਵਿੱਚ ਤਕਨੀਕੀ ਗੜਬੜ ਠੀਕ ਕਰਕੇ ਮਾਮਲਾ ਸੁਲਝਾਇਆ।