ਸਿਹਤ ਮੰਤਰਾਲੇ ਨੇ ਐਲਾਨ ਕੀਤਾ ਹੈ ਕਿ ਨਿਊਜ਼ੀਲੈਂਡ ਵਿੱਚ ਸ਼ਨੀਵਾਰ ਨੂੰ ਕੋਰੋਨਾ ਦੇ 7930 ਨਵੇਂ ਕੋਵਿਡ -19 ਮਾਮਲੇ ਸਾਹਮਣੇ ਆਏ ਹਨ। ਇਸ ਦੇ ਨਾਲ ਹੀ ਵਾਇਰਸ ਨਾਲ ਪੀੜਤ 19 ਲੋਕਾਂ ਦੀ ਮੌਤਾਂ ਦੀ ਘੋਸ਼ਣਾ ਵੀ ਕੀਤੀ ਗਈ ਹੈ, ਮੌਤਾਂ ਪਿਛਲੇ ਸੱਤ ਦਿਨਾਂ ਵਿੱਚ ਹੋਈਆਂ ਸਨ। ਇਸ ਦੇ ਨਾਲ ਹੀ ਕੋਵਿਡ -19 ਕਾਰਨ ਹੋਈਆਂ ਕੁੱਲ ਮੌਤਾਂ ਦੀ ਗਿਣਤੀ 655 ਹੋ ਗਈ ਹੈ। ਇਸ ਤੋਂ ਪਹਿਲਾ ਅੱਜ ਸਿਹਤ ਮੰਤਰਾਲੇ ਨੇ Omicron XE ਵੇਰੀਐਂਟ ਦੇ ਪਹਿਲੇ ਬਾਰਡਰ ਕੇਸ ਦੀ ਵੀ ਪੁਸ਼ਟੀ ਕੀਤੀ ਹੈ। ਇਹ ਵੇਰੀਐਂਟ Omicron ਦੇ BA.1 ਅਤੇ BA.2 ਸਬ-ਵੇਰੀਐਂਟਸ ਦਾ ਮਿਸ਼ਰਣ ਹੈ।
ਸ਼ਨੀਵਾਰ ਦੇ 7930 ਨਵੇਂ ਕਮਿਊਨਿਟੀ ਕੇਸ, ਜੋ ਪੀਸੀਆਰ ਅਤੇ ਆਰਏਟੀ ਦੁਆਰਾ ਸਾਹਮਣੇ ਆਏ ਹਨ, ਇਹ ਨੌਰਥਲੈਂਡ (275), ਆਕਲੈਂਡ (2,037), ਵਾਈਕਾਟੋ (548), ਬੇ ਆਫ ਪਲੇਨਟੀ (300), ਲੇਕਸ (163), ਹਾਕਸ ਬੇ (253) , ਮਿਡਸੈਂਟਰਲ (321), ਵੰਗਾਨੁਈ (123), ਤਾਰਾਨਾਕੀ (263), ਟਾਈਰਾਵਿਟੀ (73), ਵੈਰਾਰਾਪਾ (83), ਕੈਪੀਟਲ ਐਂਡ ਕੋਸਟ (459), ਹੱਟ ਵੈਲੀ (240), ਨੈਲਸਨ ਮਾਰਲਬਰੋ (294), ਕੈਂਟਰਬਰੀ (1,306), ਦੱਖਣੀ ਕੈਂਟਰਬਰੀ (164), ਦੱਖਣੀ (929), ਪੱਛਮੀ ਤੱਟ (93) ਵਿੱਚ ਦਰਜ ਕੀਤੇ ਗਏ ਹਨ। ਜਦਕਿ ਛੇ ਕੇਸਾਂ ਦੀ ਸਥਿੱਤੀ ਸਪਸ਼ਟ ਨਹੀਂ ਹੈ।
ਦੇਸ਼ ਭਰ ਵਿੱਚ, ਕੋਵਿਡ -19 ਕਾਰਨ ਹਸਪਤਾਲ ਵਿੱਚ 494 ਲੋਕ ਹਨ। ਇਹਨਾਂ ਵਿੱਚੋਂ, 15 ਆਈਸੀਯੂ ਵਿੱਚ ਜਾਂ ਉੱਚ ਨਿਰਭਰਤਾ ਯੂਨਿਟ ਅਧੀਨ ਹਨ। ਪਿਛਲੇ 24 ਘੰਟਿਆਂ ਦੌਰਾਨ ਸਰਹੱਦ ‘ਤੇ 55 ਹੋਰ ਮਾਮਲੇ ਸਾਹਮਣੇ ਆਏ ਹਨ।