ਨਿਊਜ਼ੀਲੈਂਡ ਸਰਕਾਰ ਨੇ ਦੇਸ਼ ਵਿੱਚ ਵਧ ਰਹੀ ਨਸ਼ਾ ਤਸਕਰੀ ਅਤੇ ਗੈਰਕਾਨੂੰਨੀ ਸਮਾਨ ਦੀ ਆਮਦ ਨੂੰ ਰੋਕਣ ਲਈ ਕਸਟਮਜ਼ ਵਿਭਾਗ ਨੂੰ 81.5 ਮਿਲੀਅਨ ਡਾਲਰ ਦੀ ਵੱਡੀ ਫੰਡਿੰਗ ਦੇਣ ਦਾ ਐਲਾਨ ਕੀਤਾ ਹੈ। ਇਹ ਐਲਾਨ ਬਜਟ 2026 ਦੇ ਤਹਿਤ ਕੀਤਾ ਗਿਆ ਹੈ। ਸਰਕਾਰ ਮੁਤਾਬਿਕ ਅੰਤਰਰਾਸ਼ਟਰੀ ਅਪਰਾਧਿਕ ਗਿਰੋਹ ਹੁਣ ਨਿਊਜ਼ੀਲੈਂਡ ਨੂੰ ਨਸ਼ਿਆਂ ਅਤੇ ਗੈਰਕਾਨੂੰਨੀ ਸਮਾਨ ਲਈ ਵੱਡਾ ਨਿਸ਼ਾਨਾ ਬਣਾ ਰਹੇ ਹਨ, ਜਿਸ ਕਾਰਨ ਸਰਹੱਦੀ ਸੁਰੱਖਿਆ ਹੋਰ ਮਜ਼ਬੂਤ ਕਰਨ ਦੀ ਲੋੜ ਮਹਿਸੂਸ ਕੀਤੀ ਗਈ ਹੈ।
ਇਸ ਫੰਡ ਵਿੱਚੋਂ 70.7 ਮਿਲੀਅਨ ਡਾਲਰ ਸਰਹੱਦੀ ਸੁਰੱਖਿਆ ਨੂੰ ਮਜ਼ਬੂਤ ਕਰਨ ਲਈ ਖਰਚੇ ਜਾਣਗੇ। ਇਸ ਦੇ ਤਹਿਤ ਬੰਦਰਗਾਹਾਂ ਅਤੇ ਹਵਾਈ ਅੱਡਿਆਂ ‘ਤੇ ਵਧੇਰੇ ਕਾਰਗੋ ਐਕਸ-ਰੇ ਮਸ਼ੀਨਾਂ ਲਗਾਈਆਂ ਜਾਣਗੀਆਂ, ਸੁਰੱਖਿਆ ਪ੍ਰਬੰਧ ਹੋਰ ਸਖ਼ਤ ਕੀਤੇ ਜਾਣਗੇ, ਕਸਟਮ ਅਧਿਕਾਰੀਆਂ ਲਈ ਨਵਾਂ ਟੈਕਟਿਕਲ ਸਾਮਾਨ ਅਤੇ ਟ੍ਰੇਨਿੰਗ ਮੁਹੱਈਆ ਕਰਵਾਈ ਜਾਵੇਗੀ। ਨਾਲ ਹੀ ਜ਼ਬਤ ਕੀਤੇ ਗਏ ਗੈਰਕਾਨੂੰਨੀ ਸਮਾਨ ਨੂੰ ਸਟੋਰ ਕਰਨ ਦੀ ਸਮਰੱਥਾ ਵੀ ਵਧਾਈ ਜਾਵੇਗੀ।
ਇਸ ਤੋਂ ਇਲਾਵਾ 10.8 ਮਿਲੀਅਨ ਡਾਲਰ ਨਾਲ ਪੈਸਿਫਿਕ, ਦੱਖਣੀ ਅਮਰੀਕਾ, ਮੱਧ-ਪੂਰਬ ਅਤੇ ਯੂਰਪ ਵਿੱਚ ਕਸਟਮਜ਼ ਦੇ ਚਾਰ ਨਵੇਂ ਅਹੁਦੇ ਸਥਾਪਿਤ ਕੀਤੇ ਜਾਣਗੇ। ਸਰਕਾਰ ਦਾ ਮੰਨਣਾ ਹੈ ਕਿ ਇਹ ਖੇਤਰ ਅੰਤਰਰਾਸ਼ਟਰੀ ਨਸ਼ਾ ਤਸਕਰੀ ਦੇ ਮੁੱਖ ਰੂਟ ਬਣ ਰਹੇ ਹਨ।
ਕਸਟਮਜ਼ ਮੰਤਰੀ ਕੇਸੀ ਕੋਸਟੈਲੋ ਨੇ ਕਿਹਾ ਕਿ ਨਿਊਜ਼ੀਲੈਂਡ ਇਸ ਵੇਲੇ ਅੰਤਰਰਾਸ਼ਟਰੀ ਅਪਰਾਧਿਕ ਗਿਰੋਹਾਂ ਦੇ ਨਿਸ਼ਾਨੇ ‘ਤੇ ਹੈ। ਉਨ੍ਹਾਂ ਕਿਹਾ ਕਿ ਸਰਹੱਦਾਂ ‘ਤੇ ਗੈਰਕਾਨੂੰਨੀ ਨਸ਼ਿਆਂ ਅਤੇ ਕਾਲੇ ਬਾਜ਼ਾਰ ਵਾਲੇ ਤਮਾਕੂ ਦੀ ਵਧ ਰਹੀ ਬਰਾਮਦਗੀ ਇਸ ਖਤਰੇ ਦੀ ਗੰਭੀਰਤਾ ਨੂੰ ਦਰਸਾਉਂਦੀ ਹੈ।
ਉਨ੍ਹਾਂ ਦੱਸਿਆ ਕਿ ਪਿਛਲੇ ਸਾਲ ਕਸਟਮਜ਼ ਵੱਲੋਂ ਕਰੀਬ 1.5 ਕਰੋੜ ਗੈਰਕਾਨੂੰਨੀ ਸਿਗਰਟਾਂ ਅਤੇ 8 ਟਨ ਗੈਰਕਾਨੂੰਨੀ ਤਮਾਕੂ ਜ਼ਬਤ ਕੀਤਾ ਗਿਆ। ਇਸਦੇ ਨਾਲ ਹੀ ਪੈਸਿਫਿਕ ਖੇਤਰ ਵਿੱਚ ਨਸ਼ਿਆਂ ਦੀ ਬਰਾਮਦਗੀ ਵਿੱਚ ਵੀ ਵੱਡਾ ਵਾਧਾ ਹੋਇਆ ਹੈ।
ਕੇਸੀ ਕੋਸਟੈਲੋ ਨੇ ਕਿਹਾ ਕਿ ਸਿਰਫ 2026 ਦੇ ਪਹਿਲੇ ਦੋ ਮਹੀਨਿਆਂ ਵਿੱਚ ਹੀ ਪੈਸਿਫਿਕ ਖੇਤਰ ਵਿੱਚ 14 ਟਨ ਤੋਂ ਵੱਧ ਕੋਕੇਨ ਜ਼ਬਤ ਕੀਤੀ ਗਈ ਹੈ।
ਸਰਕਾਰ ਦਾ ਕਹਿਣਾ ਹੈ ਕਿ ਵਿਦੇਸ਼ਾਂ ਵਿੱਚ ਤਾਇਨਾਤ ਕਸਟਮਜ਼ ਅਧਿਕਾਰੀ ਸਾਂਝੇਦਾਰ ਏਜੰਸੀਆਂ ਨਾਲ ਮਿਲ ਕੇ ਅਪਰਾਧਿਕ ਗਿਰੋਹਾਂ ਦੀਆਂ ਸਰਗਰਮੀਆਂ ਨੂੰ ਪਹਿਲਾਂ ਹੀ ਨਾਕਾਮ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਉਣਗੇ।