ਨਿਊਜ਼ੀਲੈਂਡ ਦੀ ਰਾਜਧਾਨੀ ਵੈਲਿੰਗਟਨ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਦਰਅਸਲ ਵੈਲਿੰਗਟਨ ਦੇ ਇੱਕ ਮਾਲਕ ਨੂੰ ਦੋ ਵਾਰ ਇੱਕ ਭਾਰਤੀ ਪ੍ਰਵਾਸੀ ਕਾਮੇ ਨੂੰ ਉਸਦੇ ਪੈਸੇ ਵਾਪਿਸ ਕਰਨ ਦਾ ਹੁਕਮ ਦਿੱਤਾ ਗਿਆ ਹੈ ਜਿਸਨੇ ਕੋਵਿਡ-19 ਮਹਾਂਮਾਰੀ ਦੌਰਾਨ ਮਾਲਕ ਦੇ ਕਾਰੋਬਾਰ ਨੂੰ ਚਲਦਾ ਰੱਖਣ ਲਈ ਉਸਨੂੰ ਹਜ਼ਾਰਾਂ ਡਾਲਰ ਦਾ ਕਰਜ਼ਾ ਦਿੱਤਾ ਸੀ ਪਰ ਅਜੇ ਤੱਕ ਉਸਨੂੰ ਪੂਰੀ ਰਕਮ ਅਦਾ ਨਹੀਂ ਕੀਤੀ ਹੈ। ਵੈਲਿੰਗਟਨ ‘ਚ ਰਹਿਣ ਵਾਲੇ ਮਾਈਗ੍ਰੈਂਟ ਵਰਕਰ ਵਿਸ਼ਾਲ ਸਤੀਜਾ ਨੇ ਕੋਵਿਡ-19 ਦੌਰਾਨ ਆਪਣੇ ਮਾਲਕ ਨੂੰ $25,000 ਦਾ ਕਰਜ਼ਾ ਦੇ ਕੇ ਉਸਦੇ ਡੋਨਟ ਕਾਰੋਬਾਰ ਨੂੰ ਬਚਾਉਣ ਦੀ ਕੋਸ਼ਿਸ਼ ਕੀਤੀ ਸੀ। ਸਤਿਜਾ 2020 ‘ਚ Epiphany Donuts Newtown Ltd ਅਤੇ Epiphany Donuts Waikanae Ltd ਵਿੱਚ ਕੰਮ ਕਰਦਾ ਸੀ, ਸਤੀਜਾ ਨੇ ਕਿਹਾ ਕਿ ਉਸਨੇ ਪਹਿਲਾਂ $10,000 ਅਤੇ ਫਿਰ ਕੋਵਿਡ ਦੌਰਾਨ ਹੋਰ $15,000 ਦਾ ਕਰਜ਼ਾ ਦਿੱਤਾ ਸੀ। ਨਾ ਤਾਂ ਉਸਨੂੰ ਤਨਖਾਹ ਦਾ ਇੱਕ ਵੀ ਡਾਲਰ ਮਿਿਲਆ ਤੇ ਨਾ ਹੀ ਨਵਾਂ ਆਉਟਲੈਟ ਖੁੱਲ੍ਹਿਆ।
ਹੈਰਾਨੀਜਨਕ ਗੱਲ ਹੈ ਕਿ ਰੁਜ਼ਗਾਰ ਸੰਬੰਧ ਅਥਾਰਟੀ (ERA) ਦੇ ਦੋ ਆਦੇਸ਼ਾਂ ਅਤੇ ਮਹੀਨਿਆਂ ਦੀ ਕਾਨੂੰਨੀ ਕਾਰਵਾਈ ਦੇ ਬਾਵਜੂਦ, ਸਤੀਜਾ ਨੂੰ ਅਜੇ ਵੀ ਅਦਾਇਗੀ ਨਹੀਂ ਕੀਤੀ ਜਾ ਰਹੀ ਅਤੇ ਉਹ ਅਜੇ ਵੀ ਆਪਣੀ ਤਨਖਾਹ ਦੀ ਮੰਗ ਕਰ ਰਿਹਾ ਹੈ। ਅਕਤੂਬਰ 2024 ਵਿੱਚ, ERA ਨੇ ਸਤੀਜਾ ਅਤੇ ਅਜ਼ੂਸੇਨਾ ਵਿਚਕਾਰ ਇੱਕ ਬਾਈਡਿੰਗ ਸੈਟਲਮੈਂਟ ਸਮਝੌਤਾ ਕਰਵਾਇਆ, ਜਿਸ ਵਿੱਚ ਮਾਲਕ ਨੂੰ 28 ਦਿਨਾਂ ਦੇ ਅੰਦਰ ਕਰਜ਼ਾ ਅਤੇ ਬਕਾਇਆ ਤਨਖਾਹ ਵਾਪਸ ਕਰਨ ਦਾ ਹੁਕਮ ਦਿੱਤਾ ਗਿਆ। ਹਾਲਾਂਕਿ, ਅਜੇ ਤੱਕ ਭੁਗਤਾਨ ਨਹੀਂ ਕੀਤਾ ਗਿਆ।
ਇਸ ਤੋਂ ਬਾਅਦ, 1 ਜੁਲਾਈ, 2025 ਨੂੰ, ERA ਨੇ ਇੱਕ ਪਾਲਣਾ ਆਦੇਸ਼ ਜਾਰੀ ਕੀਤਾ ਜਿਸ ਵਿੱਚ ਅਜ਼ੂਸੇਨਾ ਅਤੇ ਉਸਦੀਆਂ ਕੰਪਨੀਆਂ ਨੂੰ 14 ਦਿਨਾਂ ਦੇ ਅੰਦਰ ਪੂਰਾ ਭੁਗਤਾਨ ਕਰਨ ਦੀ ਲੋੜ ਸੀ, ਜਿਸ ਵਿੱਚ ਕਾਨੂੰਨੀ ਖਰਚਿਆਂ ਵਿੱਚ $4,500 ਵਾਧੂ ਅਤੇ $71.55 ਫਾਈਲਿੰਗ ਫੀਸ ਸ਼ਾਮਿਲ ਸੀ। ਪਰ ਇਹ ਆਦੇਸ਼ ਵੀ ਅਧੂਰਾ ਹੀ ਰਿਹਾ।
ਸਤੀਜਾ ਨੇ ਦੱਸਿਆ ਕਿ ਉਹ 2018 ਵਿੱਚ ਇੱਕ ਕਮਿਊਨਿਟੀ ਸਮਾਗਮ ਵਿੱਚ ਅਜ਼ੂਸੇਨਾ ਨੂੰ ਮਿਲਿਆ ਸੀ ਅਤੇ ਸ਼ੁਰੂ ਵਿੱਚ ਅਜ਼ੂਸੇਨਾ ਦੇ ਵੱਡੇ ਕਾਰੋਬਾਰ ਚਲਾਉਣ ਅਤੇ ਸਕੂਲ ਬੋਰਡਾਂ ਵਿੱਚ ਸੇਵਾ ਕਰਨ ਦੇ ਦਾਅਵਿਆਂ ਤੋਂ ਪ੍ਰਭਾਵਿਤ ਹੋਇਆ ਸੀ, ਜਿਸਨੇ ਉਸਨੂੰ ਕਰੀਅਰ ਦੇ ਵਾਧੇ ਲਈ ਉਮੀਦ ਦਿੱਤੀ ਸੀ। ਸਤੀਜਾ ਨੇ ਕਿਹਾ ਕਿ ਉਸਨੇ ਇਹ ਪੈਸਾ ਆਪਣੀਆਂ ਬਚਤਾਂ ਵਿੱਚੋਂ ਦਿੱਤਾ ਸੀ ਤੇ ਉਸਨੂੰ ਲਗਦਾ ਸੀ ਕਿ ਕਾਰੋਬਾਰ ਦੀ ਵਿਕਾਸ ਯੋਜਨਾ, ਉਸ ਦੀ ਨੌਕਰੀ ਨੂੰ ਸੁਰੱਖਿਅਤ ਕਰੇਗਾ। ਪਰ ਨਤੀਜਾ ਉਲਟ ਨਿਕਲਿਆ। ਉਸ ਨੇ ਦੱਸਿਆ ਕਿ ਉਹ ਹੁਣ Uber ਚਲਾ ਕੇ ਰਾਤਾਂ ਨੂੰ ਆਪਣਾ ਗੁਜ਼ਾਰਾ ਕਰ ਰਿਹਾ ਹੈ। ਸਤੀਜਾ 2016 ਵਿੱਚ ਵਿਦਿਆਰਥੀ ਵੀਜ਼ੇ ‘ਤੇ ਨਿਊਜ਼ੀਲੈਂਡ ਆਇਆ ਸੀ, 2022 ਵਿੱਚ ਨਿਵਾਸੀ ਬਣ ਗਿਆ ਸੀ, ਅਤੇ ਅਜ਼ੂਸੇਨਾ ਅਤੇ ਉਸਦੀ ਪਤਨੀ ਦੇ ਖਿਲਾਫ ERA ਕੋਲ ਦਾਅਵਾ ਦਾਇਰ ਕੀਤਾ।
ਇਸੇ ਦੌਰਾਨ ਅਜ਼ੂਸੇਨਾ ਨੇ ਦਾਅਵਾ ਕੀਤਾ ਕਿ ਸਤੀਜਾ ਨੇ ਆਪਣੀ ਮਰਜ਼ੀ ਨਾਲ ਪੈਸਾ ਦਿੱਤਾ ਸੀ ਕਿ ਉਹ ਕਾਰੋਬਾਰ ਵਿੱਚ ਮੰਦੀਆਂ ਕਾਰਨ ਮੁਸ਼ਕਿਲ ਵਿਚ ਹਨ। ਅਜ਼ੂਸੇਨਾ ਨੇ ਕਿਹਾ ਕਿ ਸਤੀਜਾ ਨੇ ਜੁਲਾਈ ਤੋਂ ਦਸੰਬਰ 2020 ਤੱਕ ਕੰਮ ਨਹੀਂ ਕੀਤਾ ਸੀ, ਇਸ ਲਈ ਉਸ ਦੌਰਾਨ ਦੀ ਤਨਖਾਹ ਦਾ ਕੋਈ ਹੱਕ ਨਹੀਂ ਬਣਦਾ।