ਨੌਰਥਲੈਂਡ ਤੋਂ ਇੱਕ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ। ਇੱਥੇ ਇੱਕ 27 ਸਾਲ ਦੀ ਔਰਤ ਨੂੰ ਗ੍ਰਿਫਤਾਰ ਕੀਤਾ ਗਿਆ ਹੈ ਜਿਸ ‘ਤੇ ਬੱਸ ਦੇ ਸਾਮਾਨ ਵਾਲੇ ਖਾਨੇ ਵਿੱਚ ਇੱਕ ਸੂਟਕੇਸ ਵਿੱਚ ਜ਼ਿੰਦਾ ਮਿਲੇ ਦੋ ਸਾਲ ਦੇ ਬੱਚੇ ਪ੍ਰਤੀ ਬਦਸਲੂਕੀ/ਅਣਗਹਿਲੀ ਕਰਨ ਦਾ ਦੋਸ਼ ਹੈ, ਮਹਿਲਾ ਨੂੰ ਅਦਾਲਤ ਵਿੱਚ ਪੇਸ਼ ਕੀਤਾ ਗਿਆ ਹੈ। ਕੱਲ੍ਹ, ਵੈਂਗਰੇਈ ਤੋਂ ਆਕਲੈਂਡ ਦੀ ਯਾਤਰਾ ‘ਤੇ ਦੁਪਹਿਰ 1 ਵਜੇ ਤੋਂ ਥੋੜ੍ਹੀ ਦੇਰ ਪਹਿਲਾਂ ਕਾਈਵਾਕਾ ਵਿੱਚ ਇੱਕ ਯੋਜਨਾਬੱਧ ਸਟਾਪ ਦੌਰਾਨ ਸ਼ੱਕ ਪੈਣ ‘ਤੇ ਪੁਲਿਸ ਨੂੰ ਬੁਲਾਇਆ ਗਿਆ ਸੀ। ਦਰਅਸਲ ਡਰਾਈਵਰ ਨੇ ਬੈਗ ਨੂੰ ਹਿਲਦਾ ਦੇਖਿਆ ਸੀ ਅਤੇ ਜਦੋਂ ਡਰਾਈਵਰ ਨੇ ਸੂਟਕੇਸ ਖੋਲ੍ਹਿਆ ਉਸ ਵਿੱਚੋਂ ਉਨ੍ਹਾਂ ਨੂੰ ਦੋ ਸਾਲ ਦੀ ਬੱਚੀ ਮਿਲੀ।
ਅੱਜ ਨੌਰਥ ਸ਼ੋਰ ਜ਼ਿਲ੍ਹਾ ਅਦਾਲਤ ਵਿੱਚ ਪੇਸ਼ੀ ਮਗਰੋਂ ਮਹਿਲਾ ਨੂੰ ਹਿਰਾਸਤ ਵਿੱਚ ਭੇਜ ਦਿੱਤਾ ਗਿਆ। ਫੋਰੈਂਸਿਕ ਮਨੋਵਿਗਿਆਨਕ ਮੁਲਾਂਕਣ ਤੋਂ ਬਾਅਦ ਉਸਨੂੰ ਕੱਲ੍ਹ ਅਦਾਲਤ ਵਿੱਚ ਦੁਬਾਰਾ ਪੇਸ਼ ਕੀਤਾ ਜਾਵੇਗਾ। ਪੁਲਿਸ ਨੇ ਦੋਸ਼ ਲਗਾਇਆ ਹੈ ਕਿ ਔਰਤ ਨੇ ਜਾਣਬੁੱਝ ਕੇ ਬੱਚੇ ਨੂੰ ਸੂਟਕੇਸ ਵਿੱਚ ਰੱਖਿਆ ਸੀ, ਜਿਸ ਨਾਲ ਦਮ ਘੁੱਟਣ, ਡੀਹਾਈਡਰੇਸ਼ਨ, ਕਾਰਬਨ ਮੋਨੋਆਕਸਾਈਡ ਜ਼ਹਿਰ, ਗਰਮੀ ਦੀ ਥਕਾਵਟ ਅਤੇ ਮਨੋਵਿਗਿਆਨਕ ਸਦਮੇ ਵਰਗੇ ਮਾੜੇ ਪ੍ਰਭਾਵ ਹੋਣ ਦੀ ਸੰਭਾਵਨਾ ਸੀ। ਦੋਸ਼ ਦੀ ਵੱਧ ਤੋਂ ਵੱਧ ਸਜ਼ਾ 10 ਸਾਲ ਦੀ ਕੈਦ ਹੈ। ਵਾਈਮੇਟਾ ਦੇ ਕਾਰਜਕਾਰੀ ਫੀਲਡ ਕ੍ਰਾਈਮ ਮੈਨੇਜਰ ਡਿਟੈਕਟਿਵ ਇੰਸਪੈਕਟਰ ਸਾਈਮਨ ਹੈਰੀਸਨ ਨੇ ਕਿਹਾ ਕਿ “ਬੱਚੀ ਨੂੰ ਹਸਪਤਾਲ ਲਿਜਾਇਆ ਗਿਆ ਸੀ, ਜਿੱਥੇ ਉਹ ਇਲਾਜ਼ ਅਧੀਨ ਹੈ। ਪੁਲਿਸ ਨੇ ਕਿਹਾ ਕਿ ਘਟਨਾ ਦੀ ਪੁੱਛਗਿੱਛ ਜਾਰੀ ਹੈ ਅਤੇ ਹੋਰ ਦੋਸ਼ਾਂ ਤੋਂ ਇਨਕਾਰ ਨਹੀਂ ਕੀਤਾ ਗਿਆ ਹੈ।