ਨਿਊਜ਼ੀਲੈਂਡ ਵਿੱਚ ਨੌਕਰੀ ਦਿਵਾਉਣ ਦੇ ਬਦਲੇ ਕਥਿਤ ਤੌਰ ’ਤੇ ਪੈਸੇ ਵਸੂਲਣ ਦੇ ਮਾਮਲੇ ਵਿੱਚ ਇੱਕ ਅਹਿਮ ਕਾਰਵਾਈ ਸਾਹਮਣੇ ਆਈ ਹੈ। Employment Relations Authority (ERA) ਨੇ ਜਗਦੀਪ ਸਿੰਘ ਨੂੰ ਜਾਂਚ ਦੌਰਾਨ ਸੰਮਨ ਦੇ ਬਾਵਜੂਦ ਪੇਸ਼ ਨਾ ਹੋਣ ਅਤੇ ਲੋੜੀਂਦੇ ਦਸਤਾਵੇਜ਼ ਮੁਹੱਈਆ ਨਾ ਕਰਵਾਉਣ ਕਾਰਨ $5,000 ਦਾ ਜੁਰਮਾਨਾ ਲਗਾਇਆ ਹੈ। ਹਾਲਾਂਕਿ, ਇਹ ਜੁਰਮਾਨਾ ਕਥਿਤ ਤੌਰ ’ਤੇ ਪੈਸੇ ਲੈਣ ਦੇ ਦੋਸ਼ਾਂ ਲਈ ਨਹੀਂ, ਸਗੋਂ ਜਾਂਚ ਵਿੱਚ ਸਹਿਯੋਗ ਨਾ ਕਰਨ ਕਾਰਨ ਲਗਾਇਆ ਗਿਆ ਹੈ।
ਤਰਨਜੋਤ ਸਿੰਘ ਨੇ ਦਰਜ ਕਰਵਾਈ ਸੀ ਸ਼ਿਕਾਇਤ
7 ਅਕਤੂਬਰ 2026 ਨੂੰ ਜਾਰੀ ਫ਼ੈਸਲੇ ਮੁਤਾਬਿਕ, ਤਰਨਜੋਤ ਸਿੰਘ ਨੇ SIAN Enterprises Limited ਅਤੇ ਸਤਵੰਤ ਸਿੰਘ ਖ਼ਿਲਾਫ਼ ਰੁਜ਼ਗਾਰ ਸਬੰਧੀ ਸ਼ਿਕਾਇਤ ਦਰਜ ਕਰਵਾਈ ਸੀ। ਉਸ ਨੇ ਦੋਸ਼ ਲਾਇਆ ਕਿ ਉਸ ਨੂੰ ਗੈਰਵਾਜਬ ਤਰੀਕੇ ਨਾਲ ਨੌਕਰੀ ਤੋਂ ਕੱਢਿਆ ਗਿਆ ਅਤੇ ਕੰਮ ਦੌਰਾਨ ਉਸ ਨਾਲ ਬੇਇਨਸਾਫ਼ੀ ਕੀਤੀ ਗਈ।
ਸ਼ਿਕਾਇਤਕਰਤਾ ਮੁਤਾਬਿਕ, ਨੌਕਰੀ ਦੀ ਪੇਸ਼ਕਸ਼ ਪੱਕੀ ਹੋਣ ਤੋਂ ਪਹਿਲਾਂ ਉਸ ਕੋਲੋਂ ਪੈਸਿਆਂ ਦੀ ਮੰਗ ਕੀਤੀ ਗਈ ਸੀ। ਉਸ ਨੇ ਦਾਅਵਾ ਕੀਤਾ ਕਿ ਕੁਝ ਰਕਮ ਭਾਰਤ ਵਿੱਚ ਸਤਵੰਤ ਸਿੰਘ ਦੇ ਪਿਤਾ ਨੂੰ ਦਿੱਤੀ ਗਈ, ਜਦਕਿ ਜ਼ਿਆਦਾਤਰ ਪੈਸੇ ਨਿਊਜ਼ੀਲੈਂਡ ਵਿੱਚ ਰਹਿੰਦੇ ਜਗਦੀਪ ਸਿੰਘ ਦੇ ਬੈਂਕ ਖਾਤੇ ਵਿੱਚ ਕਿਸ਼ਤਾਂ ਰਾਹੀਂ ਜਮ੍ਹਾਂ ਕਰਵਾਏ ਗਏ।
ਤਰਨਜੋਤ ਸਿੰਘ ਨੇ ਮਾਰਚ 2024 ਵਿੱਚ SIAN Enterprises Limited ਵਿੱਚ ਡਰਾਈਵਰ ਵਜੋਂ ਕੰਮ ਸ਼ੁਰੂ ਕੀਤਾ ਸੀ।
ਕੰਪਨੀ ਦੇ ਡਾਇਰੈਕਟਰਾਂ ਸਬੰਧੀ ਵੀ ਹੋਏ ਅਹਿਮ ਖੁਲਾਸੇ
ਸੁਣਵਾਈ ਦੌਰਾਨ ਇਹ ਗੱਲ ਸਾਹਮਣੇ ਆਈ ਕਿ ਜਗਦੀਪ ਸਿੰਘ ILV ਨਾਮਕ ਇੱਕ ਹੋਰ ਕੰਪਨੀ ਦਾ ਇਕਲੌਤਾ ਡਾਇਰੈਕਟਰ ਅਤੇ ਸ਼ੇਅਰਹੋਲਡਰ ਹੈ। ਇਸ ਕੰਪਨੀ ਵਿੱਚ ਸਤਵੰਤ ਸਿੰਘ ਦਾ ਭਰਾ ਵੀ ਕੰਮ ਕਰਦਾ ਹੈ। ਰਿਕਾਰਡ ਮੁਤਾਬਿਕ, ਸਤਵੰਤ ਸਿੰਘ ਵੀ 19 ਮਾਰਚ 2025 ਤੱਕ ਇਸ ਕੰਪਨੀ ਦਾ ਡਾਇਰੈਕਟਰ ਰਹਿ ਚੁੱਕਾ ਸੀ।
ਦੂਜੇ ਪਾਸੇ, ਸਤਵੰਤ ਸਿੰਘ ਨੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਅਤੇ ਕਿਹਾ ਕਿ ਉਹ ਜਗਦੀਪ ਸਿੰਘ ਨਾਮ ਦੇ ਵਿਅਕਤੀ ਨੂੰ ਨਹੀਂ ਜਾਣਦਾ। ਉਸ ਦੇ ਭਰਾ ਨੇ ਵੀ ਇਸੇ ਤਰ੍ਹਾਂ ਦਾ ਦਾਅਵਾ ਕੀਤਾ।
ਸੰਮਨ ਦੇ ਬਾਵਜੂਦ ਨਹੀਂ ਹੋਏ ਪੇਸ਼
ਅਥਾਰਟੀ ਨੇ 27 ਅਗਸਤ 2026 ਨੂੰ ਜਗਦੀਪ ਸਿੰਘ ਨੂੰ ਸੰਮਨ ਜਾਰੀ ਕਰਕੇ 4 ਸਤੰਬਰ ਦੀ ਸੁਣਵਾਈ ਵਿੱਚ ਹਾਜ਼ਰ ਹੋਣ ਲਈ ਕਿਹਾ ਸੀ। ਉਸ ਨੂੰ ਅਕਤੂਬਰ ਤੋਂ ਦਸੰਬਰ 2023 ਤੱਕ ਦੀਆਂ ਨਿੱਜੀ ਅਤੇ ਕੰਪਨੀ ਦੀਆਂ ਬੈਂਕ ਸਟੇਟਮੈਂਟਾਂ ਵੀ ਪੇਸ਼ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਸਨ।
ਪਰ ਜਗਦੀਪ ਸਿੰਘ ਨਾ ਤਾਂ ਸੁਣਵਾਈ ਵਿੱਚ ਹਾਜ਼ਰ ਹੋਇਆ ਅਤੇ ਨਾ ਹੀ ਉਸ ਨੇ ਆਪਣੀ ਗੈਰਹਾਜ਼ਰੀ ਦਾ ਕੋਈ ਕਾਰਨ ਦੱਸਿਆ। ਅਥਾਰਟੀ ਵੱਲੋਂ ਹੋਰ ਮੌਕਾ ਦਿੱਤੇ ਜਾਣ ਦੇ ਬਾਵਜੂਦ ਵੀ ਉਸ ਵੱਲੋਂ ਕੋਈ ਜਵਾਬ ਦਾਖ਼ਲ ਨਹੀਂ ਕੀਤਾ ਗਿਆ।
ਅਥਾਰਟੀ ਦੀ ਮੈਂਬਰ ਐਲੀਨਰ ਰੌਬਿਨਸਨ ਨੇ ਇਸ ਵਿਹਾਰ ਨੂੰ ਜਾਂਚ ਵਿੱਚ ਜਾਣਬੁੱਝ ਕੇ ਰੁਕਾਵਟ ਪਾਉਣ ਵਾਲੀ ਕਾਰਵਾਈ ਮੰਨਿਆ। ਇਸ ਤੋਂ ਬਾਅਦ ਜਗਦੀਪ ਸਿੰਘ ਨੂੰ $5,000 ਦਾ ਜੁਰਮਾਨਾ ਅਦਾ ਕਰਨ ਦੇ ਹੁਕਮ ਦਿੱਤੇ ਗਏ, ਜਿਸ ਦੀ ਅਦਾਇਗੀ 14 ਦਿਨਾਂ ਅੰਦਰ ਸਰਕਾਰ ਦੇ ਖਾਤੇ ਵਿੱਚ ਕਰਨੀ ਹੈ।
ਨੌਕਰੀ ਦੇ ਬਦਲੇ ਗੈਰਕਾਨੂੰਨੀ ਪੈਸੇ ਲੈਣਾ ਮਨਾਹੀ
ਨਿਊਜ਼ੀਲੈਂਡ ਦੇ Wages Protection Act 1983 ਤਹਿਤ ਨੌਕਰੀ ਦੇਣ ਦੇ ਬਦਲੇ ਗੈਰਕਾਨੂੰਨੀ ਪ੍ਰੀਮੀਅਮ ਜਾਂ ਰਕਮ ਵਸੂਲਣ ਦੀ ਮਨਾਹੀ ਹੈ।
ਹਾਲਾਂਕਿ, ਅਥਾਰਟੀ ਦਾ 7 ਅਕਤੂਬਰ ਵਾਲਾ ਫ਼ੈਸਲਾ ਜਗਦੀਪ ਸਿੰਘ ਵੱਲੋਂ ਜਾਂਚ ਵਿੱਚ ਸਹਿਯੋਗ ਨਾ ਕਰਨ ਨਾਲ ਸਬੰਧਤ ਹੈ। ਤਰਨਜੋਤ ਸਿੰਘ ਵੱਲੋਂ ਲਗਾਏ ਗਏ ਕਥਿਤ ਪੈਸੇ ਵਸੂਲਣ ਅਤੇ ਗੈਰਵਾਜਬ ਤਰੀਕੇ ਨਾਲ ਨੌਕਰੀ ਤੋਂ ਕੱਢਣ ਦੇ ਦੋਸ਼ਾਂ ਬਾਰੇ ਅੰਤਿਮ ਫ਼ੈਸਲਾ ਇਸ ਹੁਕਮ ਵਿੱਚ ਨਹੀਂ ਕੀਤਾ ਗਿਆ।
ਸਰੋਤ: Employment Relations Authority, [2026] NZERA 739, 7 ਅਕਤੂਬਰ 2026।