ਇੱਕ 34 ਸਾਲਾ ਭਾਰਤੀ ਨਾਗਰਿਕ ਅਮ੍ਰਿਤਪਾਲ ਸਿੰਘ ਧੌਂਸੀ, ਜਿਸਨੇ ਆਪਣੀ ਪੂਰੀ ਜਵਾਨੀ ਦੇ ਸਾਲ ਨਿਊਜ਼ੀਲੈਂਡ ‘ਚ ਬਿਤਾਏ ਹਨ ਤੇ ਉਸਦਾ ਇੱਕ ਪੁੱਤਰ ਵੀ ਨਿਊਜ਼ੀਲੈਂਡ ‘ਚ ਜੰਮਿਆ ਹੈ, ਨੂੰ ਅਸ਼ਲੀਲ ਹਮਲੇ ਦੇ ਦੋਸ਼ ‘ਚ ਦੋਸ਼ੀ ਕਰਾਰ ਦਿੱਤਾ ਗਿਆ ਹੈ ਅਤੇ ਉਸਨੂੰ ਦੇਸ਼ ਨਿਕਾਲਾ ਦਿੱਤਾ ਜਾਣਾ ਹੈ ਯਾਨੀ ਕਿ ਹੁਣ ਉਸਨੂੰ ਭਾਰਤ ਡਿਪੋਰਟ ਕੀਤਾ ਜਾਵੇਗਾ। 34 ਸਾਲਾ ਅੰਮ੍ਰਿਤਪਾਲ ਸਿੰਘ ਧੌਂਸੀ ਨੂੰ ਤਿੰਨ ਮਹੀਨਿਆਂ ਦਾ ਵਰਕ ਵੀਜ਼ਾ ਦਿੱਤਾ ਗਿਆ ਹੈ ਤਾਂ ਜੋ “ਉਸਨੂੰ ਆਪਣੇ ਮਾਮਲਿਆਂ ਨੂੰ ਸੁਲਝਾਉਣ ਲਈ ਸਮਾਂ ਮਿਲ ਸਕੇ” ਅਤੇ ਆਪਣੇ ਛੋਟੇ ਪੁੱਤਰ ਨੂੰ ਇਸ ਖ਼ਬਰ ਸਬੰਧੀ ਤਿਆਰ ਕੀਤਾ ਜਾ ਸਕੇ ਕਿ ਉਸਦੇ ਪਿਤਾ ਨੂੰ ਦੇਸ਼ ਛੱਡਣਾ ਪਵੇਗਾ। ਇਮੀਗ੍ਰੇਸ਼ਨ ਅਤੇ ਸੁਰੱਖਿਆ ਟ੍ਰਿਬਿਊਨਲ ਨੇ ਦਸੰਬਰ 2020 ਦੇ ਮਾਮਲੇ ‘ਚ ਇਹ ਸਖ਼ਤ ਫੈਸਲਾ ਸੁਣਾਇਆ ਹੈ।
ਟ੍ਰਾਈਬਿਊਨਲ ਨੇ ਮੰਨਿਆ ਕਿ ਉਸਦਾ ਆਪਣੇ ਸਕੂਲ-ਉਮਰ ਦੇ ਪੁੱਤਰ ਨਾਲ ਰਿਸ਼ਤਾ “ਅਸਧਾਰਨ ਮਨੁੱਖੀ ਹਾਲਾਤ” ਹੈ, ਪਰ ਨਾਲ ਹੀ ਇਹ ਵੀ ਸਪਸ਼ਟ ਕੀਤਾ ਕਿ ਨਿਊਜ਼ੀਲੈਂਡ ਵਿੱਚ ਰਹਿਣਾ ਇੱਕ “ਸੁਵਿਧਾ ਹੈ, ਅਧਿਕਾਰ ਨਹੀਂ।” ਉਸਦੀ ਕਰਤੂਤ ਨੇ ਪੀੜਤ ਉੱਤੇ ਗੰਭੀਰ ਪ੍ਰਭਾਵ ਪਾਇਆ ਸੀ, ਅਤੇ ਡਿਪੋਰਟ ਕਰਨਾ ਉਸਦੇ ਮਾਮਲੇ ਵਿੱਚ ਜਰੂਰੀ ਸੀ।
ਦੱਸ ਦੇਈਏ ਧੌਂਸੀ 18 ਸਾਲ ਦੀ ਉਮਰ ‘ਚ ਪੜ੍ਹਾਈ ਕਰਨ ਲਈ ਨਿਊਜ਼ੀਲੈਂਡ ਆਇਆ ਸੀ। ਇਸ ਦੌਰਾਨ ਉਸ ਕੋਲ ਕਈ ਵੀਜ਼ੇ ਰਹੇ ਹਨ। ਉਸਨੂੰ ਮਈ 2017 ਵਿੱਚ ਪੱਕੀ ਰਿਹਾਇਸ਼ ਦਿੱਤੀ ਗਈ ਸੀ। ਟ੍ਰਿਬਿਊਨਲ ਨੇ ਇੱਕ ਤਾਜ਼ਾ ਫੈਸਲੇ ਵਿੱਚ ਕਿਹਾ ਕਿ, “ਉਸਦੀ ਸਾਰੀ ਬਾਲਗ ਜ਼ਿੰਦਗੀ, ਸਿੱਖਿਆ, ਕੰਮ ਦਾ ਤਜਰਬਾ ਅਤੇ ਸਮਾਜਿਕ ਏਕੀਕਰਨ ਨਿਊਜ਼ੀਲੈਂਡ ਵਿੱਚ ਹੀ ਰਿਹਾ ਹੈ।” ਹਾਲਾਂਕਿ, ਉਹ ਦੇਸ਼ ਨਿਕਾਲੇ ਲਈ ਜ਼ਿੰਮੇਵਾਰ ਬਣ ਗਿਆ ਕਿਉਂਕਿ ਉਸਦਾ ਅਪਰਾਧ ਰਿਹਾਇਸ਼ੀ ਦਰਜਾ ਪ੍ਰਾਪਤ ਕਰਨ ਦੇ ਪੰਜ ਸਾਲਾਂ ਦੇ ਅੰਦਰ ਹੋਇਆ ਸੀ। ਟ੍ਰਿਬਿਊਨਲ ਦੇ ਚੇਅਰਮੈਨ ਜੱਜ ਮਾਰਟਿਨ ਟ੍ਰੈਡਵੈਲ ਨੇ ਕਿਹਾ ਕਿ ਧੌਂਸੀ ਨਿਊਜ਼ੀਲੈਂਡ ਵਿੱਚ ਚੰਗੀ ਤਰ੍ਹਾਂ ਸੈਟਲ ਹੋ ਗਿਆ ਸੀ, ਉਸ ਕੋਲ ਇੱਕ ਹਾਰਡਵੇਅਰ ਸਟੋਰ ਵਿੱਚ ਇੱਕ ਜ਼ਿੰਮੇਵਾਰ ਅਹੁਦਾ ਸੀ ਅਤੇ ਉਸਦੇ ਲੰਬੇ ਸਮੇਂ ਦੇ ਮਕਾਨ ਮਾਲਕ ਦੁਆਰਾ ਉਸਨੂੰ ਇੱਕ “ਮਿਸਾਲੀ” ਕਿਰਾਏਦਾਰ ਦੱਸਿਆ ਗਿਆ ਸੀ।