2025 ਦੀ ਦੂਜੀ ਤਿਮਾਹੀ ‘ਚ ਨਿਊਜ਼ੀਲੈਂਡ ਦੀ ਆਰਥਿਕਤਾ ਹੇਠਾਂ ਆ ਗਈ ਹੈ, ਸਟੈਟਸ ਐਨ ਜ਼ੈਡ ਦੁਆਰਾ ਵੀਰਵਾਰ ਸਵੇਰੇ ਜਾਰੀ ਕੀਤੇ ਗਏ ਨਵੇਂ ਅੰਕੜਿਆਂ ਮੁਤਾਬਿਕ ਕੁੱਲ ਘਰੇਲੂ ਉਤਪਾਦ 0.9% ਘਟਿਆ ਹੈ। ਇਹ ਪਿਛਲੀ ਮਾਰਚ ਤਿਮਾਹੀ ‘ਚ ਸੋਧੇ ਹੋਏ 0.9% ਵਾਧੇ ਤੋਂ ਬਾਅਦ ਦੇ ਅੰਕੜੇ ਹਨ। ਸਟੈਟਸ ਐਨ ਜ਼ੈਡ ਦੇ ਅਨੁਸਾਰ, ਜੂਨ ਤਿਮਾਹੀ ਦੌਰਾਨ ਤਿੰਨ ਉੱਚ-ਪੱਧਰੀ ਉਦਯੋਗ ਸਮੂਹਾਂ ਵਿੱਚੋਂ ਦੋ ਵਿੱਚ ਗਤੀਵਿਧੀਆਂ ਘਟੀਆਂ ਸਨ। ਸਾਮਾਨ-ਉਤਪਾਦਕ ਉਦਯੋਗ 2.3% ਡਿੱਗ ਗਏ, ਪ੍ਰਾਇਮਰੀ ਉਦਯੋਗ 0.7% ਡਿੱਗ ਗਏ, ਅਤੇ ਸੇਵਾ ਉਦਯੋਗ ਸਥਿਰ ਰਹੇ। ਆਰਥਿਕ ਵਿਕਾਸ ਦੇ ਬੁਲਾਰੇ ਜੇਸਨ ਐਟਵੈਲ ਨੇ ਕਿਹਾ, “ਜੂਨ 2025 ਤਿਮਾਹੀ ਵਿੱਚ ਆਰਥਿਕ ਗਤੀਵਿਧੀਆਂ ਵਿੱਚ 0.9% ਗਿਰਾਵਟ ਵਿਆਪਕ ਅਧਾਰਿਤ ਸੀ ਜਿਸ ‘ਚ 16 ਵਿੱਚੋਂ 10 ਉਦਯੋਗਾਂ ਵਿੱਚ ਗਿਰਾਵਟ ਆਈ ਹੈ।”
ਵਿੱਤ ਮੰਤਰੀ ਨਿਕੋਲਾ ਵਿਲਿਸ ਨੇ ਕਿਹਾ ਕਿ ਅੱਜ ਦੇ ਅੰਕੜੇ “ਵਿਸ਼ਵਵਿਆਪੀ ਅਨਿਸ਼ਚਿਤਤਾ” ਦੇ ਅਰਥਚਾਰੇ ‘ਤੇ ਪਏ ਪ੍ਰਭਾਵ ਦਾ ਪ੍ਰਤੀਬਿੰਬ ਹਨ। ਵਿਲਿਸ ਨੇ ਕਿਹਾ ਕਿ, “ਟੈਰਿਫ ਨਾਲ ਸਬੰਧਿਤ ਅੰਤਰਰਾਸ਼ਟਰੀ ਉਥਲ-ਪੁਥਲ ਅਤੇ ਅਨਿਸ਼ਚਿਤਤਾ ਦਾ ਸਪੱਸ਼ਟ ਤੌਰ ‘ਤੇ ਫਰਮਾਂ ਅਤੇ ਘਰਾਂ ਦੀ ਨਿਵੇਸ਼ ਫੈਸਲੇ ਲੈਣ ਦੀ ਇੱਛਾ ‘ਤੇ ਪ੍ਰਭਾਵ ਪਿਆ।” ਉਨ੍ਹਾਂ ਕਿਹਾ ਕਿ ਜਦੋਂ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੇ ਟੈਰਿਫ ਲਾਗੂ ਹੋਣ ਮਗਰੋਂ ਅਰਥਚਾਰੇ ‘ਤੇ ਕਾਫੀ ਪ੍ਰਭਾਵ ਪਿਆ ਹੈ। ਦੱਸ ਦੇਈਏ “ਸਾਲ ਦੀ ਦੂਜੀ ਤਿਮਾਹੀ ਸੰਯੁਕਤ ਰਾਜ ਅਮਰੀਕਾ ਦੇ ਟੈਰਿਫ ਐਲਾਨੇ ਜਾਣ ਤੋਂ ਇੱਕ ਦਿਨ ਪਹਿਲਾਂ ਸ਼ੁਰੂ ਹੋਈ ਸੀ।”
“ਪਿਛਲੇ ਛੇ ਮਹੀਨਿਆਂ ਵਿੱਚ ਅਰਥਵਿਵਸਥਾ ਜ਼ੋਰਦਾਰ ਢੰਗ ਨਾਲ ਵਧ ਰਹੀ ਸੀ… ਮੈਂ ਉਨ੍ਹਾਂ ਲੋਕਾਂ ਅਤੇ ਕਾਰੋਬਾਰਾਂ ਲਈ ਹਮਦਰਦੀ ਮਹਿਸੂਸ ਕਰਦੀ ਹਾਂ ਜੋ ਪ੍ਰਭਾਵਿਤ ਹੋਏ ਹਨ।” ਵਿਲਿਸ ਨੇ ਕਿਹਾ ਕਿ ਮੌਜੂਦਾ ਤਿਮਾਹੀ ਦੇ ਅੰਤ ਦੇ ਨੇੜੇ ਆਉਣ ‘ਤੇ ਅਰਥਵਿਵਸਥਾ ਦੁਬਾਰਾ ਵਧਣ ਦੇ ਸੰਕੇਤ ਹਨ। ਲੇਬਰ ਦੇ ਵਿੱਤ ਅਤੇ ਅਰਥਵਿਵਸਥਾ ਦੇ ਬੁਲਾਰੇ ਬਾਰਬਰਾ ਐਡਮੰਡਸ ਨੇ ਕਿਹਾ ਕਿ ਅੰਕੜੇ ਦਰਸਾਉਂਦੇ ਹਨ ਕਿ “ਦੇਸ਼ ਭਰ ਵਿੱਚ ਨੈਸ਼ਨਲ ਦੇ ਆਰਥਿਕ ਕੁਪ੍ਰਬੰਧਨ ਨੂੰ ਕਿੰਨਾ ਨੁਕਸਾਨ ਹੋ ਰਿਹਾ ਹੈ”। “ਹਜ਼ਾਰਾਂ ਨੌਕਰੀਆਂ ਖਤਮ ਹੋ ਰਹੀਆਂ ਹਨ, ਕਾਰੋਬਾਰ ਚੱਲਦੇ ਰਹਿਣ ਲਈ ਸੰਘਰਸ਼ ਕਰ ਰਹੇ ਹਨ, ਅਤੇ ਰਿਕਾਰਡ ਗਿਣਤੀ ਵਿੱਚ ਨਿਊਜ਼ੀਲੈਂਡਰ ਵਿਦੇਸ਼ਾਂ ਵਿੱਚ ਕੰਮ ਲੱਭਣ ਲਈ ਜਾ ਰਹੇ ਹਨ।” “ਨਿਊਜ਼ੀਲੈਂਡ ਹੁਣ ਮੰਦੀ ਦੇ ਕਿਨਾਰੇ ਹੈ – ਅਤੇ ਕ੍ਰਿਸਟੋਫਰ ਲਕਸਨ ਕੋਲ ਚੀਜ਼ਾਂ ਨੂੰ ਬਦਲਣ ਦੀ ਕੋਈ ਯੋਜਨਾ ਨਹੀਂ ਹੈ। ਇਹ ਕਾਫ਼ੀ ਚੰਗਾ ਨਹੀਂ ਹੈ।”