ਈਬੀ ਗੇਮਜ਼ ਨੇ ਆਪਣੇ ਕਰਮਚਾਰੀਆਂ ਨੂੰ ਇੱਕ ਵੱਡਾ ਝਟਕਾ ਦਿੱਤਾ ਹੈ। EB ਗੇਮਜ਼ ਆਪਣਾ ਨਿਊਜ਼ੀਲੈਂਡ ਦਾ ਕਾਰੋਬਾਰ ਬੰਦ ਕਰ ਰਹੀ ਹੈ ਅਤੇ ਮਹੀਨੇ ਦੇ ਅੰਤ ਵਿੱਚ ਸਾਰੇ ਸਟੋਰ ਬੰਦ ਕਰ ਦਿੱਤੇ ਜਾਣਗੇ। ਪਿਛਲੇ ਹਫ਼ਤੇ ਕਰਮਚਾਰੀਆਂ ਨੂੰ ਭੇਜੇ ਗਏ ਇੱਕ ਪੱਤਰ ਵਿੱਚ, ਈਬੀ ਗੇਮਜ਼ ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੇ ਮੈਨੇਜਿੰਗ ਡਾਇਰੈਕਟਰ ਸ਼ੇਨ ਸਟਾਕਵੈੱਲ ਨੇ ਕਿਹਾ ਕਿ ਕੰਪਨੀ ਬਾਕੀ ਸਾਰੇ ਈਬੀ ਗੇਮਜ਼ ਨਿਊਜ਼ੀਲੈਂਡ ਸਟੋਰਾਂ ਅਤੇ ਨਿਊਜ਼ੀਲੈਂਡ ਡਿਸਟ੍ਰੀਬਿਊਸ਼ਨ ਸੈਂਟਰ ਨੂੰ ਬੰਦ ਕਰਨ ਦਾ ਪ੍ਰਸਤਾਵ ਰੱਖ ਰਹੀ ਹੈ। ਬੁੱਧਵਾਰ ਨੂੰ ਭੇਜੇ ਗਏ ਇੱਕ ਹੋਰ ਪੱਤਰ ਨੇ ਪੁਸ਼ਟੀ ਕੀਤੀ ਕਿ ਈਬੀ ਗੇਮਜ਼ 31 ਜਨਵਰੀ ਨੂੰ ਆਪਣਾ ਨਿਊਜ਼ੀਲੈਂਡ ਸੰਚਾਲਨ ਬੰਦ ਕਰ ਦੇਵੇਗੀ। ਬਾਕੀ ਸਟੋਰ ਉਸ ਦਿਨ ਬੰਦ ਹੋ ਜਾਣਗੇ ਜਦਕਿ ਵੰਡ ਕੇਂਦਰ 28 ਫਰਵਰੀ ਨੂੰ ਸਥਾਈ ਤੌਰ ‘ਤੇ ਬੰਦ ਹੋ ਜਾਵੇਗਾ।
EB ਗੇਮਜ਼ ਇੱਕ ਆਸਟ੍ਰੇਲੀਆਈ-ਅਧਾਰਤ ਵੀਡੀਓ ਗੇਮ ਅਤੇ ਪੌਪ ਕਲਚਰ ਵਪਾਰਕ ਰਿਟੇਲਰ ਹੈ, ਜਿਸਦੀ ਮਲਕੀਅਤ 2005 ਤੋਂ ਗੇਮਸਟੌਪ ਕੋਲ ਹੈ। GameStop ਦੀ ਨਵੀਨਤਮ ਸਾਲਾਨਾ ਰਿਪੋਰਟ ਦੇ ਅਨੁਸਾਰ, ਹੁਣ ਨਿਊਜ਼ੀਲੈਂਡ ਵਿੱਚ 38 ਸਟੋਰ ਹਨ ਜਦਕਿ ਆਸਟ੍ਰੇਲੀਆ ਵਿੱਚ 336। ਹਾਲਾਂਕਿ ਅਜੇ ਤੱਕ ਇਹ ਅਨਿਸ਼ਚਿਤ ਹੈ ਕਿ ਜੇਕਰ ਪ੍ਰਸਤਾਵ ਅੱਗੇ ਵਧਦਾ ਹੈ ਅਤੇ EB ਗੇਮਜ਼ ਨੇ ਆਪਣੇ ਸਾਰੇ ਨਿਊਜ਼ੀਲੈਂਡ ਸਟੋਰ ਬੰਦ ਕਰ ਦਿੱਤੇ ਹਨ ਤਾਂ ਕਿੰਨੀਆਂ ਨੌਕਰੀਆਂ ਖਤਮ ਹੋ ਜਾਣਗੀਆਂ। ਇਹ ਚੇਨ ਕੁਝ ਸਮੇਂ ਤੋਂ ਤਣਾਅ ਦਾ ਸਾਹਮਣਾ ਕਰ ਰਹੀ ਹੈ, ਜਿਸ ਵਿੱਚ ਆਸਟ੍ਰੇਲੀਆ ਅਤੇ ਨਿਊਜ਼ੀਲੈਂਡ ਦੋਵਾਂ ਵਿੱਚ ਸਟੋਰਾਂ ਦੇ ਬੰਦ ਹੋਣ ਦਾ ਮਸਲਾ ਵੀ ਸ਼ਾਮਿਲ ਹੈ।
ਹਾਲਾਂਕਿ ਨਿਊਜ਼ੀਲੈਂਡ ਦੇ ਕਰਮਚਾਰੀਆਂ ਨੂੰ ਲਿਖੇ ਪੱਤਰ ਵਿੱਚ ਆਸਟ੍ਰੇਲੀਆਈ ਸਟੋਰਾਂ ਦੇ ਭਵਿੱਖ ਬਾਰੇ ਕੁਝ ਵੀ ਜ਼ਿਕਰ ਨਹੀਂ ਕੀਤਾ ਗਿਆ ਸੀ। ਪਹਿਲਾਂ ਦੇ ਪੱਤਰ ਵਿੱਚ, ਸਟਾਕਵੈੱਲ ਨੇ ਕਿਹਾ ਸੀ ਕਿ ਨਿਊਜ਼ੀਲੈਂਡ ਦੇ ਕਾਰੋਬਾਰ ਨੂੰ “2024 ਵਿੱਤੀ ਸਾਲ ਦੌਰਾਨ ਕਈ ਮਿਲੀਅਨ ਡਾਲਰ ਦਾ ਨੁਕਸਾਨ” ਹੋਇਆ ਸੀ। ਉਨ੍ਹਾਂ ਕਿਹਾ ਕਿ ਪ੍ਰਚੂਨ ਬਾਜ਼ਾਰ ਸੁਸਤ ਰਹਿੰਦਾ ਹੈ ਅਤੇ ਕੰਪਨੀ ਨੂੰ ਭਰੋਸਾ ਨਹੀਂ ਸੀ ਕਿ ਇਸਦੀ ਕਾਰਗੁਜ਼ਾਰੀ ਵਿੱਚ ਸੁਧਾਰ ਹੋਵੇਗਾ। ਸਟਾਕਵੈੱਲ ਨੇ ਲਿਖਿਆ ਕਿ, “ਸਾਨੂੰ ਇਸ ਸਥਿਤੀ ਵਿੱਚ ਹੋਣ ਦਾ ਦੁੱਖ ਹੈ ਕਿਉਂਕਿ ਅਸੀਂ ਪਹਿਲਾਂ ਹੀ ਕਾਰੋਬਾਰ ਨੂੰ ਬਦਲਣ ਲਈ ਮਹੱਤਵਪੂਰਨ ਅਤੇ ਵਾਰ-ਵਾਰ ਯਤਨ ਕਰ ਚੁੱਕੇ ਹਾਂ।” ਕਰਮਚਾਰੀਆਂ ਨੂੰ 12 ਜਨਵਰੀ ਤੱਕ ਬੰਦ ਕਰਨ ਦੇ ਪ੍ਰਸਤਾਵ ‘ਤੇ ਫੀਡਬੈਕ ਜਮ੍ਹਾਂ ਕਰਾਉਣ ਲਈ ਕਿਹਾ ਗਿਆ ਹੈ।