ਸ਼ੁੱਕਰਵਾਰ ਸਵੇਰੇ ਉੱਤਰੀ ਆਕਲੈਂਡ ‘ਚ ਇੱਕ ਬੱਸ ਨੂੰ ਅੱਗ ਲੱਗਣ ਦਾ ਮਾਮਲਾ ਸਾਹਮਣੇ ਆਇਆ ਹੈ ਜਿਸ ਵਿੱਚ ਚਾਰ ਸੈਕੰਡਰੀ ਸਕੂਲ ਦੇ ਵਿਦਿਆਰਥੀ ਸਵਾਰ ਸਨ। ਐਮਰਜੈਂਸੀ ਸੇਵਾਵਾਂ ਨੂੰ ਸਵੇਰੇ 8 ਵਜੇ ਦੇ ਕਰੀਬ ਲੇਹ ਦੇ ਪਾਕੀਰੀ ਰੋਡ ‘ਤੇ ਘਟਨਾ ਸਥਾਨ ‘ਤੇ ਬੁਲਾਇਆ ਗਿਆ ਸੀ। ਫਾਇਰ ਐਂਡ ਐਮਰਜੈਂਸੀ ਨਿਊਜ਼ੀਲੈਂਡ ਨੇ ਕਿਹਾ ਕਿ ਲੇਹ ਅਤੇ ਮਟਾਕਾਨਾ ਤੋਂ ਚਾਰ ਅਮਲੇ ਪਹੁੰਚੇ ਸਨ ਪਰ ਬੱਸ ਪੂਰੀ ਤਰਾਂ ਅੱਗ ਦੀਆਂ ਲਪਟਾਂ ਵਿੱਚ ਘਿਰ ਚੁੱਕੀ ਸੀ। ਇੱਕ ਬੁਲਾਰੇ ਨੇ ਕਿਹਾ ਕਿ, “ਸਵਾਰ ਸਾਰੇ ਯਾਤਰੀਆਂ ਨੂੰ ਸੁਰੱਖਿਅਤ ਬਾਹਰ ਕੱਢ ਲਿਆ ਗਿਆ ਸੀ ਬਿਨਾਂ ਕਿਸੇ ਸੱਟ ਦੇ।” ਅੱਗ ਸਵੇਰੇ 8.30 ਵਜੇ ਤੱਕ ਬੁਝਾ ਦਿੱਤੀ ਗਈ ਸੀ।
ਸਾਰਜੈਂਟ ਮਾਰਕ ਸਟਾਲਵਰਥੀ ਨੇ ਕਿਹਾ ਕਿ ਸਕੂਲ ਬੱਸ ਅੱਗ ਕਾਰਨ “ਬਹੁਤ ਜ਼ਿਆਦਾ ਨੁਕਸਾਨੀ ਗਈ” ਹੈ। “ਇਹ ਖੁਸ਼ਕਿਸਮਤੀ ਹੈ ਕਿ ਕੋਈ ਵੀ ਜ਼ਖਮੀ ਨਹੀਂ ਹੋਇਆ ਹੈ।” ਮਹੁਰੰਗੀ ਕਾਲਜ ਦੇ ਪ੍ਰਿੰਸੀਪਲ ਟੋਨੀ ਗਾਈਲਸ ਨੇ ਕਿਹਾ ਕਿ ਚਾਰ ਵਿਦਿਆਰਥੀਆਂ ਨੂੰ ਬੱਸ ਵਿੱਚੋਂ ਕੱਢ ਲਿਆ ਗਿਆ ਸੀ, ਜੋ ਕਿ ਪਾਕੀਰੀ ਤੋਂ ਮਹੁਰੰਗੀ ਕਾਲਜ ਜਾ ਰਹੇ ਸੀ। ਗਾਈਲਸ ਨੇ ਕਿਹਾ ਕਿ, “ਮੇਰਾ ਖਾਸ ਧੰਨਵਾਦ ਸਾਡੇ ਦੋ ਸੀਨੀਅਰ ਵਿਦਿਆਰਥੀਆਂ ਦਾ ਹੈ ਜਿਨ੍ਹਾਂ ਨੇ ਡਰਾਈਵਰ ਨੂੰ ਧੂੰਏਂ ਬਾਰੇ ਸੁਚੇਤ ਕੀਤਾ ਅਤੇ ਫਿਰ ਛੋਟੇ ਵਿਦਿਆਰਥੀਆਂ ਨੂੰ ਬੱਸ ਤੋਂ ਉਤਾਰਨ ਵਿੱਚ ਸਹਾਇਤਾ ਕੀਤੀ।”