ਨਿਊਜ਼ੀਲੈਂਡ ਵਿੱਚ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਅਚਾਨਕ ਵਾਧੇ ਨੂੰ ਲੈ ਕੇ ਸਰਕਾਰ ਨੇ ਲੋਕਾਂ ਨੂੰ ਸਚੇਤ ਰਹਿਣ ਦੀ ਅਪੀਲ ਕੀਤੀ ਹੈ। ਦੇਸ਼ ਦੇ ਸਰੋਤ ਮੰਤਰੀ Shane Jones ਨੇ ਕਿਹਾ ਹੈ ਕਿ ਜੇ ਕਿਸੇ ਪੈਟਰੋਲ ਪੰਪ ‘ਤੇ ਕੀਮਤਾਂ ਬਿਨਾਂ ਵਾਜਬ ਕਾਰਨ ਦੇ ਤੇਜ਼ੀ ਨਾਲ ਵਧ ਰਹੀਆਂ ਹਨ ਤਾਂ ਲੋਕ ਇਸ ਬਾਰੇ Commerce Commission ਨੂੰ ਸ਼ਿਕਾਇਤ ਕਰਨ।
ਉਨ੍ਹਾਂ ਨੇ ਦੱਸਿਆ ਕਿ ਕੁਝ ਫਿਊਲ ਰਿਟੇਲਰ ਗਲੋਬਲ ਹਾਲਾਤਾਂ ਦੀ ਅਣਿਸ਼ਚਿਤਤਾ ਦਾ ਫਾਇਦਾ ਚੁੱਕ ਕੇ ਕੀਮਤਾਂ ਵਧਾ ਰਹੇ ਹਨ, ਜੋ ਖਪਤਕਾਰਾਂ ਲਈ ਠੀਕ ਨਹੀਂ ਹੈ। ਇਸ ਹਫ਼ਤੇ ਨਿਊਜ਼ੀਲੈਂਡ ਦੇ ਕਈ ਹਿੱਸਿਆਂ ਵਿੱਚ ਪੈਟਰੋਲ ਦੀਆਂ ਕੀਮਤਾਂ ਵਿੱਚ ਖਾਸਾ ਉਛਾਲ ਦੇਖਿਆ ਗਿਆ ਹੈ। ਕੁਝ ਪੈਟਰੋਲ ਪੰਪਾਂ ‘ਤੇ 95 ਗਰੇਡ ਪੈਟਰੋਲ ਦੀ ਕੀਮਤ 19 ਸੈਂਟ ਤੱਕ ਵਧ ਕੇ 3 ਡਾਲਰ ਪ੍ਰਤੀ ਲੀਟਰ ਤੋਂ ਵੀ ਉੱਪਰ ਚਲੀ ਗਈ ਹੈ।
Shane Jones ਦਾ ਕਹਿਣਾ ਹੈ ਕਿ ਜੇ ਕਿਸੇ ਸਟੇਸ਼ਨ ‘ਤੇ ਕੀਮਤਾਂ ਅਚਾਨਕ ਜ਼ਿਆਦਾ ਲੱਗਦੀਆਂ ਹਨ ਤਾਂ ਉਸ ਦੀ ਜਾਣਕਾਰੀ ਅਧਿਕਾਰੀਆਂ ਨੂੰ ਦੇਣੀ ਚਾਹੀਦੀ ਹੈ। ਇਸ ਨਾਲ ਸੰਬੰਧਿਤ ਏਜੰਸੀਆਂ ਨੂੰ ਜਾਂਚ ਕਰਨ ਵਿੱਚ ਮਦਦ ਮਿਲੇਗੀ ਅਤੇ ਇਹ ਯਕੀਨੀ ਬਣਾਇਆ ਜਾ ਸਕੇਗਾ ਕਿ ਫਿਊਲ ਕੰਪਨੀਆਂ ਮਾਰਕੀਟ ਦੀ ਸਥਿਤੀ ਦਾ ਗਲਤ ਫਾਇਦਾ ਨਾ ਚੁੱਕਣ ਅਤੇ ਗਾਹਕਾਂ ਨਾਲ ਇਨਸਾਫ਼ ਹੋਵੇ।