ਨਿਊਜ਼ੀਲੈਂਡ ਦੇ ਰੁਜ਼ਗਾਰ ਬਾਜ਼ਾਰ ‘ਤੇ ਦਬਾਅ ਲਗਾਤਾਰ ਵਧਦਾ ਜਾ ਰਿਹਾ ਹੈ। ਤਾਜ਼ਾ ਸਰਕਾਰੀ ਅੰਕੜਿਆਂ ਅਨੁਸਾਰ ਦੇਸ਼ ਦੀ ਬੇਰੁਜ਼ਗਾਰੀ ਦਰ ਵੱਧ ਕੇ 5.6 ਫ਼ੀਸਦੀ ਤੱਕ ਪਹੁੰਚ ਗਈ ਹੈ, ਜੋ ਕਰੀਬ 11 ਸਾਲਾਂ ਵਿੱਚ ਸਭ ਤੋਂ ਉੱਚਾ ਪੱਧਰ ਮੰਨਿਆ ਜਾ ਰਿਹਾ ਹੈ। Stats NZ ਵੱਲੋਂ ਜੂਨ ਤੱਕ ਦੇ ਤਿੰਨ ਮਹੀਨਿਆਂ ਲਈ ਜਾਰੀ ਰਿਪੋਰਟ ਮੁਤਾਬਕ ਇਸ ਵੇਲੇ ਦੇਸ਼ ਵਿੱਚ ਲਗਭਗ 1,71,000 ਲੋਕ ਬੇਰੁਜ਼ਗਾਰ ਹਨ।
ਰਿਪੋਰਟ ਦੱਸਦੀ ਹੈ ਕਿ ਪਿਛਲੀ ਤਿਮਾਹੀ ਦੇ ਮੁਕਾਬਲੇ ਬੇਰੁਜ਼ਗਾਰਾਂ ਦੀ ਗਿਣਤੀ ਵਿੱਚ 7,000 ਦਾ ਵਾਧਾ ਹੋਇਆ ਹੈ, ਜਦਕਿ ਇੱਕ ਸਾਲ ਪਹਿਲਾਂ ਨਾਲੋਂ ਇਹ ਅੰਕੜਾ 13,000 ਵੱਧ ਹੈ। ਇਸ ਦੌਰਾਨ ਸਿਰਫ਼ 5,000 ਨਵੀਆਂ ਨੌਕਰੀਆਂ ਹੀ ਬਣੀਆਂ, ਪਰ 21,000 ਹੋਰ ਲੋਕ ਰੁਜ਼ਗਾਰ ਬਾਜ਼ਾਰ ਵਿੱਚ ਦਾਖਲ ਹੋਏ ਜਾਂ ਨੌਕਰੀ ਲੱਭਣ ਲੱਗੇ। ਇਸ ਕਾਰਨ ਨੌਕਰੀਆਂ ਦੀ ਮੰਗ ਅਤੇ ਉਪਲਬਧ ਮੌਕਿਆਂ ਵਿਚਕਾਰ ਫ਼ਰਕ ਹੋਰ ਵੱਧ ਗਿਆ ਹੈ।
ਲੰਬੇ ਸਮੇਂ ਤੋਂ ਬੇਰੁਜ਼ਗਾਰ ਰਹਿਣ ਵਾਲਿਆਂ ਦੀ ਗਿਣਤੀ ਵੀ ਚਿੰਤਾ ਦਾ ਵਿਸ਼ਾ ਬਣੀ ਹੋਈ ਹੈ। ਲਗਭਗ 19 ਫ਼ੀਸਦੀ ਬੇਰੁਜ਼ਗਾਰ ਇੱਕ ਸਾਲ ਜਾਂ ਇਸ ਤੋਂ ਵੱਧ ਸਮੇਂ ਤੋਂ ਕੰਮ ਦੀ ਭਾਲ ਕਰ ਰਹੇ ਹਨ, ਜੋ ਪਿਛਲੇ ਸਾਲ ਨਾਲੋਂ ਕਰੀਬ 8,000 ਵੱਧ ਹਨ। ਨੌਜਵਾਨਾਂ ਦੀ ਸਥਿਤੀ ਵੀ ਚਿੰਤਾਜਨਕ ਹੈ। 15 ਤੋਂ 24 ਸਾਲ ਦੀ ਉਮਰ ਦੇ ਉਹ ਨੌਜਵਾਨ ਜੋ ਨਾ ਨੌਕਰੀ ਕਰ ਰਹੇ ਹਨ ਅਤੇ ਨਾ ਹੀ ਕਿਸੇ ਪੜ੍ਹਾਈ ਜਾਂ ਟ੍ਰੇਨਿੰਗ ਵਿੱਚ ਹਨ, ਉਨ੍ਹਾਂ ਦੀ ਦਰ 12.9 ਫ਼ੀਸਦੀ ਤੋਂ ਵੱਧ ਕੇ 13.8 ਫ਼ੀਸਦੀ ਹੋ ਗਈ ਹੈ।
ਖੇਤਰੀ ਪੱਧਰ ‘ਤੇ ਵੀ ਵੱਡਾ ਅੰਤਰ ਸਾਹਮਣੇ ਆਇਆ ਹੈ। ਉੱਤਰੀ ਟਾਪੂ ਵਿੱਚ ਬੇਰੁਜ਼ਗਾਰੀ ਦਰ ਲਗਭਗ 6 ਫ਼ੀਸਦੀ ਦਰਜ ਕੀਤੀ ਗਈ, ਜਦਕਿ ਆਕਲੈਂਡ ਅਤੇ ਨਾਰਥਲੈਂਡ ਵਿੱਚ ਇਹ ਇਸ ਤੋਂ ਵੀ ਵੱਧ ਰਹੀ। ਇਸਦੇ ਉਲਟ ਦੱਖਣੀ ਟਾਪੂ ਵਿੱਚ ਬੇਰੁਜ਼ਗਾਰੀ ਦਰ ਸਿਰਫ਼ 3.7 ਫ਼ੀਸਦੀ ਰਹੀ। ਅਰਥਸ਼ਾਸਤਰੀਆਂ ਦਾ ਮੰਨਣਾ ਹੈ ਕਿ ਰੁਜ਼ਗਾਰ ਬਾਜ਼ਾਰ ਵਿੱਚ ਵੱਡਾ ਸੁਧਾਰ ਉਦੋਂ ਹੀ ਸੰਭਵ ਹੈ ਜਦੋਂ ਅਰਥਵਿਵਸਥਾ ਹੋਰ ਮਜ਼ਬੂਤ ਹੋਵੇਗੀ ਅਤੇ ਕਾਰੋਬਾਰ ਨਵੀਆਂ ਭਰਤੀਆਂ ਲਈ ਦੁਬਾਰਾ ਭਰੋਸੇ ਨਾਲ ਅੱਗੇ ਵਧਣਗੇ।