ਮੱਧ ਪੂਰਬ ਵਿੱਚ ਜਾਰੀ ਟਕਰਾਅ ਅਤੇ ਦੁਨੀਆ ਭਰ ਵਿੱਚ ਤੇਲ ਦੀ ਸਪਲਾਈ ਨੂੰ ਲੈ ਕੇ ਬਣ ਰਹੀ ਅਣਿਸ਼ਚਿਤਤਾ ਦੇ ਮੱਦੇਨਜ਼ਰ ਨਿਊਜ਼ੀਲੈਂਡ ਸਰਕਾਰ ਸੰਭਾਵਿਤ ਫਿਊਲ ਸੰਕਟ ਲਈ ਪਹਿਲਾਂ ਤੋਂ ਤਿਆਰੀ ਕਰ ਰਹੀ ਹੈ। ਸਰਕਾਰੀ ਅਧਿਕਾਰੀਆਂ ਵੱਲੋਂ ਮੰਤਰੀਆਂ ਨੂੰ ਇਹ ਸੁਝਾਅ ਦਿੱਤਾ ਗਿਆ ਹੈ ਕਿ ਜੇ ਭਵਿੱਖ ਵਿੱਚ ਦੇਸ਼ ਵਿੱਚ ਪੈਟਰੋਲ ਦੀ ਸਪਲਾਈ ਘੱਟ ਹੋ ਜਾਂਦੀ ਹੈ ਤਾਂ ਲੋਕਾਂ ਵੱਲੋਂ ਖਰੀਦੇ ਜਾਣ ਵਾਲੇ ਪੈਟਰੋਲ ਦੀ ਮਾਤਰਾ ‘ਤੇ ਸੀਮਾ ਲਗਾਈ ਜਾ ਸਕਦੀ ਹੈ। ਰਿਪੋਰਟਾਂ ਮੁਤਾਬਕ ਇਕ ਹੋਰ ਸੰਭਾਵਨਾ ਇਹ ਵੀ ਵਿਚਾਰੀ ਜਾ ਰਹੀ ਹੈ ਕਿ ਪੈਟਰੋਲ ਪੰਪ ਹਰ ਰੋਜ਼ ਖੁੱਲ੍ਹੇ ਰਹਿਣ ਦੀ ਬਜਾਇ ਵੱਖ-ਵੱਖ ਦਿਨਾਂ ‘ਤੇ ਖੋਲ੍ਹੇ ਜਾਣ, ਤਾਂ ਜੋ ਫਿਊਲ ਦੀ ਖਪਤ ਨੂੰ ਕੰਟਰੋਲ ਕੀਤਾ ਜਾ ਸਕੇ ਅਤੇ ਸਟਾਕ ਲੰਮੇ ਸਮੇਂ ਤੱਕ ਚੱਲ ਸਕੇ।
ਸਰਕਾਰ ਦਾ ਕਹਿਣਾ ਹੈ ਕਿ ਇਸ ਸਮੇਂ ਨਿਊਜ਼ੀਲੈਂਡ ਕੋਲ ਲਗਭਗ 50 ਦਿਨਾਂ ਲਈ ਫਿਊਲ ਦਾ ਜਖੀਰਾ ਮੌਜੂਦ ਹੈ। ਪਰ ਜੇ ਵਿਸ਼ਵ ਪੱਧਰ ‘ਤੇ ਸਪਲਾਈ ਚੇਨ ਵਿੱਚ ਕੋਈ ਵੱਡੀ ਰੁਕਾਵਟ ਆਉਂਦੀ ਹੈ ਤਾਂ ਲੋਕਾਂ ਦੀ ਖਪਤ ਘਟਾਉਣ ਲਈ ਐਮਰਜੈਂਸੀ ਕਦਮ ਲੈਣੇ ਪੈ ਸਕਦੇ ਹਨ। ਮਾਹਿਰਾਂ ਦੇ ਅਨੁਸਾਰ ਜੇ ਹਾਲਾਤ ਗੰਭੀਰ ਬਣਦੇ ਹਨ ਤਾਂ ਸਰਕਾਰ ਲੋਕਾਂ ਨੂੰ ਘੱਟ ਯਾਤਰਾ ਕਰਨ, ਸੰਭਵ ਹੋਵੇ ਤਾਂ ਪਬਲਿਕ ਟਰਾਂਸਪੋਰਟ ਦੀ ਵਰਤੋਂ ਕਰਨ ਅਤੇ ਫਿਊਲ ਦੀ ਬਚਤ ਕਰਨ ਲਈ ਵੀ ਅਪੀਲ ਕਰ ਸਕਦੀ ਹੈ। ਹਾਲਾਂਕਿ ਅਧਿਕਾਰੀਆਂ ਨੇ ਸਪਸ਼ਟ ਕੀਤਾ ਹੈ ਕਿ ਫਿਲਹਾਲ ਇਹ ਸਿਰਫ਼ ਸੰਭਾਵਿਤ ਹਾਲਾਤਾਂ ਲਈ ਤਿਆਰੀ ਅਤੇ ਯੋਜਨਾ ਬਣਾਉਣ ਦਾ ਹਿੱਸਾ ਹੈ। ਇਸ ਵੇਲੇ ਤੁਰੰਤ ਕੋਈ ਪਾਬੰਦੀ ਲਗਾਉਣ ਦਾ ਫੈਸਲਾ ਨਹੀਂ ਕੀਤਾ ਗਿਆ।