ਨਿਊਜ਼ੀਲੈਂਡ ਦੇ ਵਾਇਕਾਟੋ ਖੇਤਰ ਵਿੱਚ ਇੱਕ ਸਾਬਕਾ ਪੁਲਿਸ ਅਧਿਕਾਰੀ ਨੂੰ ਬਜ਼ੁਰਗ ਮਹਿਲਾ ਨਾਲ ਧੋਖਾਧੜੀ ਕਰਕੇ ਹਜ਼ਾਰਾਂ ਡਾਲਰ ਹੜਪਣ ਦੇ ਮਾਮਲੇ ਵਿੱਚ ਅਦਾਲਤ ਵੱਲੋਂ ਸਜ਼ਾ ਸੁਣਾਈ ਗਈ ਹੈ। ਮਾਮਲੇ ਅਨੁਸਾਰ ਅਧਿਕਾਰੀ ਨੇ ਲਗਭਗ 68,000 ਡਾਲਰ ਦੀ ਠੱਗੀ ਮਾਰੀ ਗਈ ਸੀ। ਜਾਣਕਾਰੀ ਮੁਤਾਬਕ 70 ਸਾਲ ਤੋਂ ਵੱਧ ਉਮਰ ਦੀ ਮਹਿਲਾ ਦੇ ਬੈਂਕ ਕਾਰਡਾਂ ਤੋਂ ਪਹਿਲਾਂ ਹੀ ਕਰੀਬ 14,000 ਡਾਲਰ ਚੋਰੀ ਹੋ ਚੁੱਕੇ ਸਨ। ਇਸ ਘਟਨਾ ਤੋਂ ਬਾਅਦ ਮਹਿਲਾ ਦੀ ਮਦਦ ਲਈ ਇੱਕ ਪੁਲਿਸ ਅਧਿਕਾਰੀ ਨੂੰ ਤਾਇਨਾਤ ਕੀਤਾ ਗਿਆ ਸੀ, ਪਰ ਉਸ ਨੇ ਹੀ ਆਪਣੀ ਪੋਜ਼ੀਸ਼ਨ ਦਾ ਗਲਤ ਫਾਇਦਾ ਚੁੱਕਦਿਆਂ ਮਹਿਲਾ ਨੂੰ ਠੱਗ ਲਿਆ।
ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਅਧਿਕਾਰੀ ਨੇ ਡਿਊਟੀ ਦੌਰਾਨ ਅਤੇ ਪੁਲਿਸ ਵਰਦੀ ਵਿੱਚ ਮਹਿਲਾ ਨੂੰ ਆਪਣੇ ਸਥਾਨਕ ਬੈਂਕ ਤੋਂ ਨਕਦ ਰਕਮ ਕਢਵਾਉਣ ਲਈ ਕਿਹਾ। ਉਹ ਖੁਦ ਪੁਲਿਸ ਪੈਟਰੋਲ ਕਾਰ ਵਿੱਚ ਬੈਂਕ ਦੇ ਕਾਰ ਪਾਰਕ ਵਿੱਚ ਉਡੀਕ ਕਰਦਾ ਰਿਹਾ। ਕੁਝ ਸਮੇਂ ਬਾਅਦ ਮਹਿਲਾ ਨੂੰ ਪਤਾ ਲੱਗਿਆ ਕਿ ਉਸ ਨਾਲ ਧੋਖਾ ਹੋਇਆ ਹੈ ਅਤੇ ਉਸ ਨੇ ਇਸ ਬਾਰੇ ਆਪਣੇ ਬੈਂਕ ਨੂੰ ਸੂਚਿਤ ਕੀਤਾ, ਜਿਸ ਤੋਂ ਬਾਅਦ ਮਾਮਲਾ ਪੁਲਿਸ ਤੱਕ ਪਹੁੰਚਿਆ।
ਇਸ ਦੌਰਾਨ ਦੋ ਵਾਰ ਅਧਿਕਾਰੀ ਮਹਿਲਾ ਦੇ ਘਰ ਵੀ ਗਿਆ, ਪਰ ਡਰੀ ਹੋਈ ਮਹਿਲਾ ਨੇ ਦਰਵਾਜ਼ਾ ਨਹੀਂ ਖੋਲ੍ਹਿਆ ਅਤੇ ਘਰ ਅੰਦਰ ਹੀ ਰਹੀ। ਮਾਮਲੇ ਦੀ ਸੁਣਵਾਈ ਦੌਰਾਨ Hamilton District Court ਵਿੱਚ ਅਦਾਲਤ ਨੇ ਅਧਿਕਾਰੀ ਨੂੰ ਧੋਖੇ ਨਾਲ ਪੈਸੇ ਹਾਸਲ ਕਰਨ ਅਤੇ ਕੰਪਿਊਟਰ ਸਿਸਟਮ ਦਾ ਗਲਤ ਇਸਤੇਮਾਲ ਕਰਨ ਦੇ ਦੋਸ਼ਾਂ ‘ਚ ਦੋਸ਼ੀ ਕਰਾਰ ਦਿੱਤਾ।
ਵਾਇਕਾਟੋ ਪੁਲਿਸ ਦੇ ਸੁਪਰਿੰਟੈਂਡੈਂਟ Scott Gemmell ਨੇ ਕਿਹਾ ਕਿ ਇਹ ਘਟਨਾ ਬਹੁਤ ਨਿਰਾਸ਼ਾਜਨਕ ਹੈ। ਉਨ੍ਹਾਂ ਦੱਸਿਆ ਕਿ ਸ਼ਿਕਾਇਤ ਮਿਲਣ ਤੋਂ ਬਾਅਦ 24 ਘੰਟਿਆਂ ਦੇ ਅੰਦਰ ਜਾਂਚ ਸ਼ੁਰੂ ਕਰ ਦਿੱਤੀ ਗਈ ਸੀ ਅਤੇ ਮਾਮਲਾ ਅਦਾਲਤ ਤੱਕ ਪਹੁੰਚਾਇਆ ਗਿਆ। ਉਨ੍ਹਾਂ ਕਿਹਾ ਕਿ ਲੋਕਾਂ ਦਾ ਪੁਲਿਸ ‘ਤੇ ਭਰੋਸਾ ਕਾਇਮ ਰਹਿਣਾ ਬਹੁਤ ਜ਼ਰੂਰੀ ਹੈ।