ਨਿਊਜ਼ੀਲੈਂਡ ਦੀ ਰੀਜਨਲ ਏਅਰਲਾਈਨ Originair ਨੇ ਸਰਕਾਰ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਜੇ ਜਲਦ ਵਿੱਤੀ ਸਹਾਇਤਾ ਨਾ ਮਿਲੀ ਤਾਂ Westport–Wellington ਹਵਾਈ ਸੇਵਾ ਬੰਦ ਕਰਨੀ ਪੈ ਸਕਦੀ ਹੈ। ਕੰਪਨੀ ਦੇ ਮੈਨੇਜਿੰਗ ਡਾਇਰੈਕਟਰ Robert Inglis ਮੁਤਾਬਕ, ਜੇ 27 ਮਾਰਚ ਤੱਕ ਕੋਈ ਹੱਲ ਨਹੀਂ ਨਿਕਲਦਾ ਤਾਂ ਇਹ ਰੂਟ 1 ਮਈ 2026 ਤੋਂ ਬਾਅਦ ਚਲਾਇਆ ਨਹੀਂ ਜਾਵੇਗਾ। ਉਨ੍ਹਾਂ ਦੱਸਿਆ ਕਿ ਇਸ ਵੇਲੇ ਇਹ ਸੇਵਾ ਹਰ ਸਾਲ ਕਰੀਬ $250,000 ਦਾ ਨੁਕਸਾਨ ਝੱਲ ਰਹੀ ਹੈ, ਜੋ ਜੈੱਟ ਫਿਊਲ ਦੀਆਂ ਵਧ ਰਹੀਆਂ ਕੀਮਤਾਂ ਕਰਕੇ ਹੋਰ ਵੱਧ ਸਕਦਾ ਹੈ।
Originair ਨੇ ਇਹ ਰੂਟ ਉਸ ਸਮੇਂ ਸੰਭਾਲਿਆ ਸੀ ਜਦੋਂ Sounds Air ਨੇ 2024 ਵਿੱਚ ਇਸਨੂੰ ਛੱਡ ਦਿੱਤਾ ਸੀ। ਇਸ ਸੇਵਾ ਦਾ ਲਾਭ ਹਰ ਸਾਲ ਲਗਭਗ 4,000 ਯਾਤਰੀ ਲੈਂਦੇ ਹਨ। ਕੰਪਨੀ ਨੇ ਕਿਹਾ ਹੈ ਕਿ ਜੇ ਉਡਾਣ ਬੰਦ ਹੋ ਜਾਂਦੀ ਹੈ ਤਾਂ ਯਾਤਰੀਆਂ ਨੂੰ Westport ਤੋਂ Wellington ਤੱਕ ਲੰਮਾ ਸਫ਼ਰ ਕਰਨਾ ਪਵੇਗਾ, ਜੋ ਕਰੀਬ 8 ਘੰਟਿਆਂ ਦਾ ਹੋ ਸਕਦਾ ਹੈ ਅਤੇ ਇਸ ਵਿੱਚ ਫੈਰੀ ਯਾਤਰਾ ਵੀ ਸ਼ਾਮਿਲ ਹੋਵੇਗੀ।
Originair ਨੇ ਸਰਕਾਰ ਦੇ Regional Airline Support Package ਲਈ ਅਰਜ਼ੀ ਵੀ ਦਿੱਤੀ ਹੈ, ਪਰ ਕੰਪਨੀ ਦਾ ਕਹਿਣਾ ਹੈ ਕਿ ਇਹ ਯੋਜਨਾ ਦੇ ਮਾਪਦੰਡਾਂ ‘ਤੇ ਪੂਰੀ ਨਹੀਂ ਉਤਰਦੀ, ਕਿਉਂਕਿ ਇਹ ਸਹਾਇਤਾ ਮੁੱਖ ਤੌਰ ‘ਤੇ ਕਰਜ਼ੇ ਦੀ ਰੀਸਟਰੱਕਚਰਿੰਗ ਜਾਂ ਨਵੇਂ ਜਹਾਜ਼ਾਂ ਵਿੱਚ ਨਿਵੇਸ਼ ਲਈ ਹੈ।
ਰਾਬਰਟ ਇੰਗਲਿਸ ਨੇ ਇਹ ਵੀ ਸਪਸ਼ਟ ਕੀਤਾ ਕਿ ਟਿਕਟਾਂ ਦੀ ਕੀਮਤ ਵਧਾਉਣਾ ਕੋਈ ਹੱਲ ਨਹੀਂ, ਕਿਉਂਕਿ ਪਹਿਲਾਂ ਕੀਤੇ ਵਾਧੇ ਨਾਲ ਯਾਤਰੀਆਂ ਦੀ ਗਿਣਤੀ ਘੱਟ ਹੋ ਚੁੱਕੀ ਹੈ। ਕੰਪਨੀ ਦੇ ਅਨੁਸਾਰ, ਇਸ ਸੇਵਾ ਨੂੰ ਜਾਰੀ ਰੱਖਣ ਲਈ ਲਗਭਗ $500,000 ਸਾਲਾਨਾ ਮਦਦ ਦੀ ਲੋੜ ਹੈ।