ਨਿਊਜ਼ੀਲੈਂਡ ਦੇ ਨੈਲਸਨ ਵਿੱਚ ਇੱਕ ਖਤਰਨਾਕ ਡਰਾਈਵਿੰਗ ਦਾ ਮਾਮਲਾ ਸਾਹਮਣੇ ਆਇਆ ਹੈ, ਜਿੱਥੇ ਇੱਕ ਨੌਜਵਾਨ ਡਰਾਈਵਰ ਨੂੰ ਬਹੁਤ ਜ਼ਿਆਦਾ ਨਸ਼ੇ ਦੀ ਹਾਲਤ ਵਿੱਚ ਗੱਡੀ ਚਲਾਉਂਦੇ ਕਾਬੂ ਕੀਤਾ ਗਿਆ। ਪੁਲਿਸ ਮੁਤਾਬਕ, ਵੀਰਵਾਰ ਸ਼ਾਮ ਕਰੀਬ 6:45 ਵਜੇ ਇੱਕ ਸਥਾਨਕ ਵਿਅਕਤੀ ਨੇ Tahunanui Drive ‘ਤੇ ਇੱਕ ਕਾਰ ਨੂੰ ਬੇਤੁਕਾ ਤਰੀਕੇ ਨਾਲ ਚੱਲਦੇ ਦੇਖ ਕੇ ਸੂਚਨਾ ਦਿੱਤੀ। ਉਸ ਨੇ ਕਾਰ ਦਾ ਪਿੱਛਾ ਕਰਦੇ ਹੋਏ ਪੁਲਿਸ ਨੂੰ ਲਗਾਤਾਰ ਜਾਣਕਾਰੀ ਦਿੱਤੀ, ਜਿਸ ਨਾਲ ਕਾਰ ਨੂੰ ਲੱਭਣ ਵਿੱਚ ਮਦਦ ਮਿਲੀ। ਪੁਲਿਸ ਨੇ ਵਾਹਨ ਨੂੰ Bishopdale Avenue ‘ਤੇ ਰੋਕਿਆ। ਇਸ ਦੌਰਾਨ ਇੱਕ ਹੋਰ ਡਰਾਈਵਰ ਨੇ ਵੀ ਆ ਕੇ ਪੁਲਿਸ ਨੂੰ ਦੱਸਿਆ ਕਿ ਇਹ ਵਿਅਕਤੀ ਗੱਡੀ ਚਲਾਉਣ ਦੇ ਕਾਬਿਲ ਨਹੀਂ ਹੈ।
ਸਰਜੈਂਟ Mike Thom ਨੇ ਦੱਸਿਆ ਕਿ ਡਰਾਈਵਰ ਦੀ ਬ੍ਰੇਥ ਟੈਸਟ ਵਿੱਚ ਸ਼ਰਾਬ ਦੀ ਮਾਤਰਾ ਕਾਨੂੰਨੀ ਹੱਦ ਤੋਂ ਲਗਭਗ ਪੰਜ ਗੁਣਾ ਵੱਧ ਪਾਈ ਗਈ, ਜਿਸਨੂੰ ਉਨ੍ਹਾਂ ਨੇ “ਬਹੁਤ ਹੀ ਖਤਰਨਾਕ” ਕਰਾਰ ਦਿੱਤਾ। ਹੈਰਾਨੀ ਦੀ ਗੱਲ ਇਹ ਰਹੀ ਕਿ ਡਰਾਈਵਰ ਨੇ ਸ਼ਰਾਬ ਪੀਣ ਤੋਂ ਇਨਕਾਰ ਕੀਤਾ, ਪਰ ਟੈਸਟ ਦੇ ਨਤੀਜੇ ਇਸ ਦੇ ਉਲਟ ਸਾਬਤ ਹੋਏ। ਪੁਲਿਸ ਮੁਤਾਬਕ ਇਸ ਤਰ੍ਹਾਂ ਦੀ ਡਰਾਈਵਿੰਗ ਨਾਲ ਨਾ ਸਿਰਫ਼ ਉਸਦੀ ਆਪਣੀ ਜਾਨ, ਸਗੋਂ ਹੋਰ ਲੋਕਾਂ ਦੀ ਜਾਨ ਵੀ ਖਤਰੇ ਵਿੱਚ ਸੀ।
ਪੁਲਿਸ ਨੇ 25 ਸਾਲਾ ਨੌਜਵਾਨ ਨੂੰ ਗ੍ਰਿਫ਼ਤਾਰ ਕਰਕੇ ਵੱਧ ਸ਼ਰਾਬ ਪੀ ਕੇ ਡਰਾਈਵ ਕਰਨ ਦੇ ਦੋਸ਼ ਲਗਾਏ ਹਨ ਅਤੇ ਉਸਦਾ ਲਾਇਸੈਂਸ 28 ਦਿਨਾਂ ਲਈ ਸਸਪੈਂਡ ਕਰ ਦਿੱਤਾ ਗਿਆ ਹੈ। ਉਹ 30 ਅਪ੍ਰੈਲ ਨੂੰ ਨੈਲਸਨ ਡਿਸਟ੍ਰਿਕਟ ਕੋਰਟ ਵਿੱਚ ਪੇਸ਼ ਹੋਵੇਗਾ। ਪੁਲਿਸ ਨੇ ਜਾਣਕਾਰੀ ਦੇਣ ਵਾਲੇ ਨਾਗਰਿਕ ਦੀ ਪ੍ਰਸ਼ੰਸਾ ਕਰਦਿਆਂ ਕਿਹਾ ਕਿ ਉਸ ਦੀ ਸੂਚਨਾ ਨਾਲ ਸੰਭਵ ਤੌਰ ‘ਤੇ ਵੱਡਾ ਹਾਦਸਾ ਟਲ ਗਿਆ।
Shockingly high alcohol reading from swerving Nelson driver