ਗੋਰ: ਨਿਊਜ਼ੀਲੈਂਡ ਦੇ ਗੋਰ ‘ਚ 1000 ਲੀਟਰ ਰਸਾਇਣਕ ਪਦਾਰਥ ਦੇ ਲੀਕ ਹੋਣ ਤੋਂ ਬਾਅਦ ਆਸ-ਪਾਸ ਦੀਆਂ ਸੜਕਾਂ ਬੰਦ ਕਰ ਦਿੱਤੀਆਂ ਗਈਆਂ ਅਤੇ ਨੇੜਲੀਆਂ ਇਮਾਰਤਾਂ ਨੂੰ ਸਾਵਧਾਨੀ ਵਜੋਂ ਖਾਲੀ ਕਰਵਾਇਆ ਗਿਆ ਹੈ। ਐਮਰਜੈਂਸੀ ਸੇਵਾਵਾਂ ਨੂੰ ਦੁਪਹਿਰ ਕਰੀਬ 2:05 ਵਜੇ ਓਲਡਹੈਮ ਸਟ੍ਰੀਟ ਸਥਿਤ ਮੇਨਫ੍ਰੇਟ (Mainfreight) ਦੇ premises ਵਿੱਚ ਹੋਏ ਰਸਾਇਣਕ ਰਿਸਾਅ ਦੀ ਸੂਚਨਾ ਮਿਲੀ ਸੀ। ਪੁਲਿਸ ਨੇ ਦੱਸਿਆ ਕਿ ਸਾਵਧਾਨੀ ਵੱਜੋਂ ਆਸ-ਪਾਸ ਦੇ ਕਾਰੋਬਾਰੀ ਅਦਾਰਿਆਂ ਨੂੰ ਖਾਲੀ ਕਰਵਾਇਆ ਗਿਆ ਹੈ।
ਫਾਇਰ ਐਂਡ ਐਮਰਜੈਂਸੀ ਨਿਊਜ਼ੀਲੈਂਡ (FENZ) ਮੁਤਾਬਕ ਗੋਰ ਤੋਂ ਦੋ ਫਾਇਰ ਕਰੂ, ਜਦਕਿ ਇਨਵਰਕਾਰਗਿਲ ਤੋਂ ਹਾਜ਼ਮੈਟ ਯੂਨਿਟ ਅਤੇ ਵਿਸ਼ੇਸ਼ ਵਾਹਨ ਨੂੰ ਮੌਕੇ ‘ਤੇ ਭੇਜਿਆ ਗਿਆ ਸੀ। ਸ਼ਾਮ ਨੂੰ ਜਾਰੀ ਕੀਤੇ ਅਪਡੇਟ ਵਿੱਚ ਫਾਇਰ ਐਂਡ ਐਮਰਜੈਂਸੀ ਨੇ ਦੱਸਿਆ ਕਿ ਰਸਾਇਣਕ ਪਦਾਰਥ ਮੇਨਫ੍ਰੇਟ ਦੇ premises ਵਿੱਚ ਖੜ੍ਹੇ ਇੱਕ ਟਰੱਕ ਤੋਂ ਲੀਕ ਹੋਇਆ ਸੀ।
ਅਧਿਕਾਰੀਆਂ ਮੁਤਾਬਿਕ ਤਰਲ ਪਦਾਰਥ ਨੂੰ ਪਤਲਾ ਕਰਨ ਦੀ ਪ੍ਰਕਿਰਿਆ ਲਗਭਗ 75 ਫੀਸਦੀ ਪੂਰੀ ਹੋ ਚੁੱਕੀ ਹੈ। ਇਸ ਦੀ ਕਾਸਟਿਕ (ਖਾਰਾ ਅਤੇ ਜਲਣ ਪੈਦਾ ਕਰਨ ਵਾਲੀ) ਪ੍ਰਕਿਰਤੀ ਕਾਰਨ ਇਹ ਕੰਮ ਸਾਵਧਾਨੀ ਨਾਲ ਕੀਤਾ ਜਾ ਰਿਹਾ ਹੈ।
ਫਾਇਰ ਐਂਡ ਐਮਰਜੈਂਸੀ ਨੇ ਕਿਹਾ ਕਿ ਲੋਕਾਂ ਲਈ ਕੋਈ ਖਤਰਾ ਨਹੀਂ ਹੈ, ਹਾਲਾਂਕਿ ਇਲਾਕੇ ਦੇ ਕਾਰੋਬਾਰਾਂ ਨੂੰ ਸੁਰੱਖਿਆ ਦੇ ਮੱਦੇਨਜ਼ਰ ਖਾਲੀ ਕਰਵਾਇਆ ਗਿਆ।
ਪੁਲਿਸ ਨੇ ਓਲਡਹੈਮ ਸਟ੍ਰੀਟ ਅਤੇ ਗੋਰਟਨ ਸਟ੍ਰੀਟ ਨੂੰ ਬੰਦ ਕਰ ਦਿੱਤਾ ਹੈ ਅਤੇ ਆਮ ਲੋਕਾਂ ਨੂੰ ਇਲਾਕੇ ਤੋਂ ਦੂਰ ਰਹਿਣ ਦੀ ਅਪੀਲ ਕੀਤੀ ਗਈ ਹੈ।