ਨਿਊਜ਼ੀਲੈਂਡ ਦੇ ਆਕਲੈਂਡ ਵਿੱਚ ਐਤਵਾਰ ਸਵੇਰੇ ਸੰਘਣੀ ਧੁੰਦ ਕਾਰਨ ਹਵਾਈ ਯਾਤਰਾ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹੋਈ। ਧੁੰਦ ਦੇ ਕਾਰਨ ਕਈ ਘੰਟਿਆਂ ਤੱਕ ਉਡਾਣਾਂ ਵਿੱਚ ਰੁਕਾਵਟ ਰਹੀ, ਪਰ ਬਾਅਦ ਵਿੱਚ ਹਾਲਾਤ ਸਧਾਰਨ ਹੋਣ ‘ਤੇ ਪਾਬੰਦੀਆਂ ਹਟਾ ਦਿੱਤੀਆਂ ਗਈਆਂ। Auckland Airport ਵੱਲੋਂ ਸਵੇਰੇ 11:10 ਵਜੇ ਦਿੱਤੇ ਅਪਡੇਟ ਮੁਤਾਬਕ ਧੁੰਦ ਕਾਰਨ ਲੱਗੀਆਂ ਰੋਕਾਂ ਹਟਾ ਦਿੱਤੀਆਂ ਗਈਆਂ ਹਨ। ਇਸ ਦੌਰਾਨ ਕੁੱਲ 24 ਆਉਣ ਵਾਲੀਆਂ ਅਤੇ 24 ਜਾਣ ਵਾਲੀਆਂ ਘਰੇਲੂ ਉਡਾਣਾਂ ਰੱਦ ਹੋਈਆਂ, ਜਦਕਿ ਕੁਝ ਹੋਰ ਉਡਾਣਾਂ ਵਿੱਚ ਦੇਰੀ ਵੀ ਦਰਜ ਕੀਤੀ ਗਈ।
ਹਾਲਾਂਕਿ ਅੰਤਰਰਾਸ਼ਟਰੀ ਉਡਾਣਾਂ ‘ਤੇ ਇਸਦਾ ਕੋਈ ਵੱਡਾ ਅਸਰ ਨਹੀਂ ਪਿਆ। ਇਸਦੇ ਨਾਲ ਹੀ ਸ਼ਹਿਰ ਦੀਆਂ ਮੁੱਖ ਸੜਕਾਂ ਅਤੇ ਮੋਟਰਵੇਅਜ਼ ‘ਤੇ ਵੀ ਧੁੰਦ ਦੀ ਮੋਟੀ ਪਰਤ ਦੇਖਣ ਨੂੰ ਮਿਲੀ। ਫੈਰੀ ਸੇਵਾਵਾਂ ਵੀ ਪ੍ਰਭਾਵਿਤ ਰਹੀਆਂ। Fullers360 ਨੇ ਚਿਤਾਵਨੀ ਦਿੱਤੀ ਕਿ ਆਕਲੈਂਡ ਅਤੇ ਵਾਈਹੇਕੇ ਆਈਲੈਂਡ ਦਰਮਿਆਨ ਸਵੇਰੇ ਦੀਆਂ ਕਈ ਸੇਵਾਵਾਂ ਵਿੱਚ ਦੇਰੀ ਹੋ ਸਕਦੀ ਹੈ।
ਇਸ ਦੌਰਾਨ ਸ਼ਹਿਰ ਦੇ ਕਈ ਹਿੱਸਿਆਂ ਵਿੱਚ ਲੋਕਾਂ ਨੇ ਫੌਗਹੌਰਨ ਦੀਆਂ ਆਵਾਜ਼ਾਂ ਸੁਣਨ ਦੀ ਵੀ ਜਾਣਕਾਰੀ ਦਿੱਤੀ। ਮੌਸਮ ਵਿਭਾਗ MetService ਦੇ ਮੁਤਾਬਕ ਇਹ ਧੁੰਦ “ਰੇਡੀਏਸ਼ਨ ਫੌਗ” ਸੀ, ਜੋ ਆਮ ਤੌਰ ‘ਤੇ ਠੰਢੇ ਅਤੇ ਸ਼ਾਂਤ ਮੌਸਮ ਵਿੱਚ ਬਣਦੀ ਹੈ। ਮਾਹਿਰਾਂ ਦਾ ਕਹਿਣਾ ਹੈ ਕਿ ਧੁੰਦ ਦੇ ਦੌਰਾਨ ਹਵਾਈ ਜਹਾਜ਼ਾਂ ਦੀ ਲੈਂਡਿੰਗ ਅਤੇ ਟੈਕਸੀ ਕਰਨਾ ਮੁਸ਼ਕਲ ਹੋ ਜਾਂਦਾ ਹੈ, ਜਿਸ ਕਾਰਨ ਉਡਾਣਾਂ ਦੀ ਗਿਣਤੀ ਘੱਟ ਕਰਨੀ ਪੈਂਦੀ ਹੈ। ਅਧਿਕਾਰੀਆਂ ਨੇ ਕਿਹਾ ਕਿ ਮੌਸਮ ਸਧਾਰਨ ਹੋਣ ਨਾਲ ਹੁਣ ਸੇਵਾਵਾਂ ਮੁੜ ਨਾਰਮਲ ਹੋ ਰਹੀਆਂ ਹਨ।