ਆਕਲੈਂਡ ਦੇ ਮੈਨੁਰੇਵਾ ਇਲਾਕੇ ਵਿੱਚ ਸ਼ੁੱਕਰਵਾਰ ਰਾਤ ਤਿੰਨ ਵੱਖ-ਵੱਖ ਅੱਗ ਦੀਆਂ ਘਟਨਾਵਾਂ ਨੇ ਚਿੰਤਾ ਪੈਦਾ ਕਰ ਦਿੱਤੀ ਹੈ। ਫਾਇਰ ਜਾਂਚ ਅਧਿਕਾਰੀ ਹੁਣ ਇਨ੍ਹਾਂ ਮਾਮਲਿਆਂ ਦੀ ਜਾਂਚ ਕਰ ਰਹੇ ਹਨ। ਫਾਇਰ ਐਂਡ ਇਮਰਜੈਂਸੀ ਸੇਵਾ (FENZ) ਦੇ ਮੁਤਾਬਕ ਸਭ ਤੋਂ ਪਹਿਲਾਂ ਕਰੀਬ 8:30 ਵਜੇ ਰੱਸਲ ਰੋਡ ‘ਤੇ ਇਕ ਗੈਰਾਜ ਵਿੱਚ ਅੱਗ ਲੱਗਣ ਦੀ ਸੂਚਨਾ ਮਿਲੀ, ਜਿਸ ‘ਤੇ ਤੁਰੰਤ ਫਾਇਰ ਬ੍ਰਿਗੇਡ ਦੀਆਂ ਟੀਮਾਂ ਮੌਕੇ ‘ਤੇ ਪਹੁੰਚੀਆਂ। ਇਸਦੇ ਨਾਲ ਹੀ ਉਸੇ ਸਮੇਂ ਦੌਰਾਨ ਨੇੜਲੇ ਇਲਾਕੇ ਵਿੱਚ ਹੋਰ ਦੋ ਮਕਾਨਾਂ ਵਿੱਚ ਵੀ ਅੱਗ ਲੱਗਣ ਦੀਆਂ ਘਟਨਾਵਾਂ ਸਾਹਮਣੇ ਆਈਆਂ। FENZ ਅਨੁਸਾਰ, ਇਨ੍ਹਾਂ ਅੱਗ ਦੀਆਂ ਘਟਨਾਵਾਂ ਕਾਰਨ ਦੋ ਘਰਾਂ ਅਤੇ ਇਕ ਗੈਰਾਜ ਨੂੰ ਕਾਫੀ ਨੁਕਸਾਨ ਪਹੁੰਚਿਆ ਹੈ। ਹਾਲਾਂਕਿ ਅਜੇ ਤੱਕ ਇਹ ਸਪਸ਼ਟ ਨਹੀਂ ਹੋ ਸਕਿਆ ਕਿ ਇਹ ਤਿੰਨੋਂ ਅੱਗ ਦੀਆਂ ਘਟਨਾਵਾਂ ਆਪਸ ਵਿੱਚ ਜੁੜੀਆਂ ਹੋਈਆਂ ਹਨ ਜਾਂ ਨਹੀਂ। ਫਿਲਹਾਲ ਜਾਂਚ ਜਾਰੀ ਹੈ।
