ਹੈਸਟਿੰਗਜ਼ ਵਿੱਚ ਵੀਰਵਾਰ ਦੁਪਹਿਰ ਛੁਰੀਬਾਜ਼ੀ (ਚਾਕੂ ਮਾਰਨ ) ਦੀ ਇੱਕ ਘਟਨਾ ਵਿੱਚ ਦੋ ਲੋਕ ਜ਼ਖ਼ਮੀ ਹੋ ਗਏ ਹਨ, ਜਿਨ੍ਹਾਂ ਵਿੱਚੋਂ ਇੱਕ ਦੀ ਹਾਲਤ ਗੰਭੀਰ ਦੱਸੀ ਜਾ ਰਹੀ ਹੈ। ਪੁਲਿਸ ਮੁਤਾਬਿਕ ਦੁਪਹਿਰ ਕਰੀਬ 3 ਵਜੇ ਕੈਂਬਰਲੀ ਦੇ ਕੀਵੀ ਸਟ੍ਰੀਟ ‘ਤੇ ਛੁਰੀਬਾਜ਼ੀ ਦੀ ਸੂਚਨਾ ਪ੍ਰਾਪਤ ਹੋਈ। ਹਾਟੋ ਹੋਨੇ ਸੇਂਟ ਜੌਨ ਨੇ ਦੱਸਿਆ ਕਿ ਮੌਕੇ ‘ਤੇ ਦੋ ਐਂਬੂਲੈਂਸਾਂ ਅਤੇ ਇੱਕ ਓਪਰੇਸ਼ਨ ਮੈਨੇਜਰ ਭੇਜੇ ਗਏ ਸਨ।
ਸੇਂਟ ਜੌਨ ਦੇ ਪ੍ਰਵਕਤਾ ਨੇ ਕਿਹਾ, “ਸਾਡੇ ਐਂਬੂਲੈਂਸ ਸਟਾਫ ਨੇ ਮੌਕੇ ‘ਤੇ ਦੋ ਮਰੀਜ਼ਾਂ ਦਾ ਇਲਾਜ ਕੀਤਾ ਅਤੇ ਉਨ੍ਹਾਂ ਨੂੰ ਹਾਕਸ ਬੇ ਫਾਲਨ ਸੋਲਜਰਜ਼ ਮੇਮੋਰਿਅਲ ਹਸਪਤਾਲ ਭੇਜਿਆ ਗਿਆ। ਇੱਕ ਦੀ ਹਾਲਤ ਨਾਜ਼ੁਕ ਹੈ, ਜਦਕਿ ਦੂਜੇ ਦੀ ਹਾਲਤ ਦਰਮਿਆਨੀ ਹੈ।” ਇਸ ਮਾਮਲੇ ਵਿੱਚ ਇੱਕ ਵਿਅਕਤੀ ਨੂੰ ਹਿਰਾਸਤ ਵਿੱਚ ਲਿਆ ਗਿਆ ਹੈ।