ਗਾਹਕਾਂ ਅਤੇ ਕਰਮਚਾਰੀਆਂ ਦੀ ਸੁਰੱਖਿਆ ਨੂੰ ਹੋਰ ਮਜ਼ਬੂਤ ਬਣਾਉਣ ਦੇ ਉਦੇਸ਼ ਨਾਲ ਕ੍ਰਾਇਸਟਚਰਚ ਦੇ ਕਈ ਸੁਪਰਮਾਰਕੀਟਾਂ ਵਿੱਚ Facial Recognition Technology ਨੂੰ ਸਥਾਈ ਤੌਰ ‘ਤੇ ਲਾਗੂ ਕਰ ਦਿੱਤਾ ਗਿਆ ਹੈ। ਇਹ ਫੈਸਲਾ ਤਿੰਨ ਮਹੀਨਿਆਂ ਦੇ ਸਫਲ ਟ੍ਰਾਇਲ ਤੋਂ ਬਾਅਦ ਲਿਆ ਗਿਆ ਹੈ। Foodstuffs South Island ਵੱਲੋਂ ਜਾਰੀ ਜਾਣਕਾਰੀ ਅਨੁਸਾਰ New World St Martins, Pak’nSave Papanui ਅਤੇ Pak’nSave Moorhouse ਵਿੱਚ ਚੱਲ ਰਹੀ ਇਹ ਤਕਨਾਲੋਜੀ ਹੁਣ ਜਾਰੀ ਰਹੇਗੀ। ਇਸ ਦੇ ਨਾਲ New World Stanmore ਨੂੰ ਵੀ ਇਸ ਪ੍ਰਣਾਲੀ ਨਾਲ ਜੋੜਿਆ ਜਾ ਰਿਹਾ ਹੈ।
ਅਕਤੂਬਰ 2025 ਤੋਂ ਜਨਵਰੀ 2026 ਤੱਕ ਚੱਲੇ ਟ੍ਰਾਇਲ ਦਾ ਮਕਸਦ ਸਟੋਰਾਂ ਵਿੱਚ ਪਹਿਲਾਂ ਗੰਭੀਰ ਅਪਰਾਧ ਜਾਂ ਹਾਨੀਕਾਰਕ ਵਿਹਾਰ ਕਰ ਚੁੱਕੇ ਵਿਅਕਤੀਆਂ ਦੀ ਪਛਾਣ ਕਰਨਾ ਸੀ। ਕੰਪਨੀ ਦੇ ਰਿਟੇਲ ਮੁਖੀ ਕੈਂਟ ਮਾਹੋਨ ਨੇ ਕਿਹਾ ਕਿ ਟ੍ਰਾਇਲ ਨੇ ਸਾਬਤ ਕੀਤਾ ਹੈ ਕਿ ਇਹ ਸਿਸਟਮ ਉੱਚ ਪੱਧਰ ਦੀ ਸਹੀ ਪਛਾਣ ਦੇ ਨਾਲ ਗਾਹਕਾਂ ਦੀ ਨਿੱਜਤਾ ਦੀ ਰੱਖਿਆ ਵੀ ਕਰਦਾ ਹੈ।
ਤਕਨਾਲੋਜੀ ਰਾਹੀਂ ਸਟੋਰ ਵਿੱਚ ਦਾਖਲ ਹੋਣ ਵਾਲੇ ਵਿਅਕਤੀਆਂ ਦੀ ਤਸਵੀਰ ਨੂੰ ਪਹਿਲਾਂ ਤੋਂ ਤਿਆਰ ਕੀਤੀ ਗਈ ਵਾਚਲਿਸਟ ਨਾਲ ਮਿਲਾਇਆ ਜਾਂਦਾ ਹੈ। ਕਿਸੇ ਸੰਭਾਵਿਤ ਮੇਲ ਦੀ ਸਥਿਤੀ ਵਿੱਚ ਦੋ ਤਰਬੀਅਤਯਾਫਤਾ ਕਰਮਚਾਰੀ ਉਸ ਦੀ ਪੁਸ਼ਟੀ ਕਰਦੇ ਹਨ ਅਤੇ ਲੋੜ ਪੈਣ ‘ਤੇ ਉਚਿਤ ਕਾਰਵਾਈ ਕੀਤੀ ਜਾਂਦੀ ਹੈ। ਵਾਚਲਿਸਟ ਵਿੱਚ ਨਾ ਹੋਣ ਵਾਲੇ ਲੋਕਾਂ ਦੀਆਂ ਤਸਵੀਰਾਂ ਤੁਰੰਤ ਮਿਟਾ ਦਿੱਤੀਆਂ ਜਾਂਦੀਆਂ ਹਨ।
ਟ੍ਰਾਇਲ ਦੌਰਾਨ 531 ਪੁਸ਼ਟੀਸ਼ੁਦਾ ਮੇਲ ਦਰਜ ਕੀਤੇ ਗਏ ਅਤੇ ਕੋਈ ਵੀ ਗਲਤ ਪਛਾਣ ਸਾਹਮਣੇ ਨਹੀਂ ਆਈ। ਕੰਪਨੀ ਮੁਤਾਬਕ ਇਸ ਨਾਲ ਦੁਬਾਰਾ ਅਪਰਾਧ ਕਰਨ ਵਾਲੇ ਵਿਅਕਤੀਆਂ ਦੀਆਂ ਗਤੀਵਿਧੀਆਂ ਘਟੀਆਂ ਹਨ ਅਤੇ ਧਮਕੀ ਭਰੀਆਂ ਘਟਨਾਵਾਂ ਵਿੱਚ ਵੀ ਕਮੀ ਦਰਜ ਕੀਤੀ ਗਈ ਹੈ।
Foodstuffs South Island ਨੇ ਦੱਸਿਆ ਕਿ ਹੋਰ ਸਟੋਰਾਂ ਵੱਲੋਂ ਵੀ ਇਸ ਤਕਨਾਲੋਜੀ ਵਿੱਚ ਰੁਚੀ ਦਿਖਾਈ ਗਈ ਹੈ। ਹਾਲਾਂਕਿ ਕਿਸੇ ਨਵੇਂ ਸਟੋਰ ਵਿੱਚ ਇਸ ਦੀ ਸਥਾਪਨਾ ਤੋਂ ਪਹਿਲਾਂ ਨਿੱਜਤਾ, ਕਾਨੂੰਨੀ ਅਤੇ ਜੋਖਮ ਸੰਬੰਧੀ ਸਾਰੇ ਮੁਲਾਂਕਣ ਕੀਤੇ ਜਾਣਗੇ। ਗਾਹਕਾਂ ਨੂੰ ਜਾਣਕਾਰੀ ਦੇਣ ਲਈ ਸਪੱਸ਼ਟ ਸੂਚਨਾ ਬੋਰਡ ਵੀ ਲਗਾਏ ਜਾਣਗੇ।
ਕੰਪਨੀ ਨੇ ਕਿਹਾ ਹੈ ਕਿ ਸਿਸਟਮ ਦੀ ਕਾਰਗੁਜ਼ਾਰੀ ‘ਤੇ ਲਗਾਤਾਰ ਨਿਗਰਾਨੀ ਰੱਖੀ ਜਾਵੇਗੀ ਅਤੇ ਇਸ ਤਕਨਾਲੋਜੀ ਦੀ ਵਰਤੋਂ ਕਰਨ ਵਾਲੇ ਸਟੋਰਾਂ ਦੀ ਅਪਡੇਟ ਸੂਚੀ ਸਮੇਂ-ਸਮੇਂ ‘ਤੇ ਜਾਰੀ ਕੀਤੀ ਜਾਵੇਗੀ।