ਨਿਊਜ਼ੀਲੈਂਡ ਦੇ ਲੋਅਰ ਨੌਰਥ ਆਈਲੈਂਡ ਵਿੱਚ ਅੱਜ ਸਵੇਰੇ ਅਚਾਨਕ ਆਏ ਭੂਚਾਲ ਨੇ ਲੋਕਾਂ ਵਿੱਚ ਦਹਿਸ਼ਤ ਪੈਦਾ ਕਰ ਦਿੱਤੀ। ਪੈਰਾਪੈਰਾਮੂ (Paraparaumu) ਨੇੜੇ ਆਏ ਇਸ ਭੂਚਾਲ ਦੇ ਝਟਕੇ ਕਾਫ਼ੀ ਦੂਰ ਤੱਕ ਮਹਿਸੂਸ ਕੀਤੇ ਗਏ।
ਭੂਚਾਲ ਦੀ ਤੀਬਰਤਾ 4.9 ਮੈਗਨੀਟਿਊਡ ਦਰਜ ਕੀਤੀ ਗਈ। ਇਹ ਭੂਚਾਲ ਪੈਰਾਪੈਰਾਮੂ ਤੋਂ ਲਗਭਗ 30 ਕਿਲੋਮੀਟਰ ਉੱਤਰ-ਪੱਛਮ ਵੱਲ ਅਤੇ 26 ਕਿਲੋਮੀਟਰ ਦੀ ਗਹਿਰਾਈ ਵਿੱਚ ਆਇਆ।
GNS Science ਦੇ GeoNet ਮੁਤਾਬਕ ਭੂਚਾਲ ਦੀ ਕੰਪਨ “ਮੱਧਮ” ਦਰਜੇ ਦੀ ਸੀ ਅਤੇ ਹੁਣ ਤੱਕ 20,000 ਤੋਂ ਵੱਧ ਲੋਕਾਂ ਨੇ ਇਸ ਦੇ ਝਟਕੇ ਮਹਿਸੂਸ ਹੋਣ ਦੀ ਰਿਪੋਰਟ ਕੀਤੀ ਹੈ।
ਵੈਲਿੰਗਟਨ ਵਿੱਚ ਛੁੱਟੀਆਂ ਮਨਾਉਣ ਆਏ ਇੱਕ ਵਿਅਕਤੀ ਨੇ ਆਪਣਾ ਤਜਰਬਾ ਸਾਂਝਾ ਕਰਦਿਆਂ ਦੱਸਿਆ, “ਪੂਰਾ ਕਮਰਾ ਕੁਝ ਪਲਾਂ ਲਈ ਹਿੱਲ ਰਿਹਾ ਸੀ। ਸ਼ਾਇਦ ਲਗਭਗ ਦੋ ਸਕਿੰਟ ਤੱਕ।”
ਉਸ ਨੇ ਕਿਹਾ ਕਿ ਪਹਿਲਾਂ ਉਸ ਨੂੰ ਸਮਝ ਹੀ ਨਹੀਂ ਆਈ ਕਿ ਇਹ ਭੂਚਾਲ ਸੀ।
“ਮੈਨੂੰ ਇਹ ਅਹਿਸਾਸ ਦੋ ਸਕਿੰਟ ਬਾਅਦ ਲੱਗਿਆ ਕਿ ਭੂਚਾਲ ਆਇਆ ਸੀ। ਪਹਿਲਾਂ ਤਾਂ ਮੈਨੂੰ ਲੱਗਿਆ ਕਿ ਉੱਪਰ ਕਿਸੇ ਨੇ ਰੂਮ ਸਰਵਿਸ ਵਾਲੀ ਵੱਡੀ ਟਰੌਲੀ ਸੁੱਟ ਦਿੱਤੀ ਹੈ।”
ਅਚਾਨਕ ਆਏ ਇਨ੍ਹਾਂ ਝਟਕਿਆਂ ਨੇ ਸਵੇਰੇ-ਸਵੇਰੇ ਲੋਕਾਂ ਨੂੰ ਹੈਰਾਨ ਕਰ ਦਿੱਤਾ ਅਤੇ ਕਈ ਲੋਕ ਨੀਂਦ ਤੋਂ ਜਾਗ ਪਏ।