Auckland ਦੀ ਹਾਈ ਕੋਰਟ ਵਿੱਚ ਚੱਲ ਰਹੇ ਇੱਕ ਸੰਵੇਦਨਸ਼ੀਲ ਮਾਮਲੇ ਦੌਰਾਨ ਦਰਦਨਾਕ ਖੁਲਾਸੇ ਸਾਹਮਣੇ ਆਏ ਹਨ। ਭਾਰਤੀ ਮੂਲ ਦੇ ਇੱਕ ਵਿਅਕਤੀ ‘ਤੇ ਦੋਸ਼ ਹੈ ਕਿ ਉਸਨੇ ਆਪਣੀ ਪੰਜ ਸਾਲਾ ਧੀ ਦਾ ਸਾਹ ਰੋਕ ਕੇ ਕਤਲ ਕਰ ਦਿੱਤਾ। 38 ਸਾਲਾ ਮੁਕੇਸ਼ ਪ੍ਰਸ਼ਾਦ ਨੇ ਅਦਾਲਤ ਵਿੱਚ ਆਪਣੇ ਆਪ ਨੂੰ ਬੇਕਸੂਰ ਦੱਸਦੇ ਹੋਏ ਕਿਹਾ ਹੈ ਕਿ ਘਟਨਾ ਸਮੇਂ ਉਹ ਮਾਨਸਿਕ ਤੌਰ ‘ਤੇ ਅਸੰਤੁਲਿਤ ਸੀ। ਮ੍ਰਿਤਕ ਬੱਚੀ ਤੁਲਸੀ ਅਮੋਲਾ ਦੀ ਲਾਸ਼ ਪਿਛਲੇ ਸਾਲ ਜਨਵਰੀ ਮਹੀਨੇ ਵਿੱਚ ਮਨੁਕਾਉ ਪੁਲਿਸ ਸਟੇਸ਼ਨ ਦੇ ਬਾਹਰ ਖੜੀ ਕਾਰ ਵਿੱਚੋਂ ਮਿਲੀ ਸੀ। ਪ੍ਰੋਸੀਕਿਊਸ਼ਨ ਅਨੁਸਾਰ ਦੋਸ਼ੀ ਨੂੰ ਇਹ ਗਲਤਫਹਿਮੀ ਹੋ ਗਈ ਸੀ ਕਿ ਉਸਦੀ ਧੀ ਹਰਪੀਜ਼ ਵਾਇਰਸ ਨਾਲ ਸੰਕਰਮਿਤ ਹੈ। ਉਸਨੂੰ ਡਰ ਸੀ ਕਿ ਵੱਡੀ ਹੋਣ ‘ਤੇ ਬੱਚੀ ਨੂੰ ਸਮਾਜਿਕ ਤੌਰ ‘ਤੇ ਤਕਲੀਫਾਂ ਅਤੇ ਮਾਨਸਿਕ ਪੀੜਾ ਦਾ ਸਾਹਮਣਾ ਕਰਨਾ ਪਵੇਗਾ।
ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਕਰਿਸਮਸ ਤੋਂ ਬਾਅਦ ਪਰਿਵਾਰ Maraetai Beach ਗਿਆ ਸੀ, ਜਿੱਥੇ ਬੱਚੀ ਦੇ ਸਰੀਰ ‘ਤੇ ਕੁਝ ਨਿਸ਼ਾਨ ਵੇਖੇ ਗਏ। ਡਾਕਟਰਾਂ ਨੇ ਇਹਨਾਂ ਨੂੰ ਕੀੜਿਆਂ ਦੇ ਕਟਣ ਕਾਰਨ ਹੋਈ ਇਨਫੈਕਸ਼ਨ ਕਰਾਰ ਦਿੱਤਾ ਸੀ, ਪਰ ਦੋਸ਼ੀ ਇਸ ਗੱਲ ਨਾਲ ਸਹਿਮਤ ਨਹੀਂ ਸੀ ਅਤੇ ਉਹ ਹਰਪੀਜ਼ ਦੇ ਸ਼ੱਕ ਵਿੱਚ ਡੁੱਬਿਆ ਰਿਹਾ। ਬਾਅਦ ਵਿੱਚ ਪੋਸਟਮਾਰਟਮ ਰਿਪੋਰਟ ਵਿੱਚ ਸਪਸ਼ਟ ਹੋਇਆ ਕਿ ਬੱਚੀ ਨੂੰ ਹਰਪੀਜ਼ ਨਹੀਂ ਸੀ। ਸੁਣਵਾਈ ਦੌਰਾਨ ਜੂਰੀ ਨੂੰ ਦੱਸਿਆ ਗਿਆ ਕਿ ਘਟਨਾ ਵਾਲੀ ਰਾਤ ਪ੍ਰਸ਼ਾਦ ਆਪਣੀ ਧੀ ਨਾਲ ਸ਼ਹਿਰ ਵਿੱਚ ਘੁੰਮਦਾ ਰਿਹਾ ਅਤੇ ਫਿਰ East Tamaki ਦੇ ਇੱਕ ਸੁੰਨੇ ਸਥਾਨ ‘ਤੇ ਗੱਡੀ ਖੜੀ ਕਰਕੇ ਬੱਚੀ ਦਾ ਕਥਿਤ ਤੌਰ ‘ਤੇ ਸਾਹ ਰੋਕ ਕਤਲ ਕਰ ਦਿੱਤਾ।
ਪ੍ਰੋਸੀਕਿਊਟਰਾਂ ਨੇ ਅਦਾਲਤ ਨੂੰ ਇਹ ਵੀ ਦੱਸਿਆ ਕਿ ਬੱਚੀ ਆਪਣੇ ਆਖ਼ਰੀ ਪਲਾਂ ਵਿੱਚ ਪਿਤਾ ਨੂੰ ਰੋਕਣ ਲਈ ਬੇਨਤੀ ਕਰਦੀ ਰਹੀ, ਜਿਸ ਨਾਲ ਅਦਾਲਤ ਦਾ ਮਾਹੌਲ ਭਾਵੁਕ ਹੋ ਗਿਆ। ਮਾਮਲੇ ਵਿੱਚ ਇਹ ਵੀ ਸਾਹਮਣੇ ਆਇਆ ਕਿ ਦੋਸ਼ੀ ਹਾਲ ਹੀ ਵਿੱਚ Melbourne ਤੋਂ ਨਿਊਜ਼ੀਲੈਂਡ ਵਾਪਸ ਆਇਆ ਸੀ, ਜਿੱਥੇ ਉਹ ਕੰਮ ਕਰ ਰਿਹਾ ਸੀ। ਉਸਦੀ ਪਤਨੀ ਅਤੇ ਧੀ ਆਕਲੈਂਡ ਵਿੱਚ ਰਹਿ ਰਹੇ ਸਨ। ਪ੍ਰੋਸੀਕਿਊਸ਼ਨ ਦਾ ਕਹਿਣਾ ਹੈ ਕਿ ਉਸਨੂੰ ਲੱਗਦਾ ਸੀ ਕਿ ਉਸਨੂੰ ਆਸਟ੍ਰੇਲੀਆ ਵਿੱਚ ਰਹਿੰਦੇ ਸਮੇਂ ਹਰਪੀਜ਼ ਹੋਇਆ ਸੀ ਅਤੇ ਇਸੇ ਡਰ ਅਤੇ ਪਸ਼ਚਾਤਾਪ ਨੇ ਉਸਦੀ ਮਾਨਸਿਕ ਹਾਲਤ ‘ਤੇ ਅਸਰ ਪਾਇਆ।
ਬੱਚੀ ਦੀ ਮੌਤ ਤੋਂ ਬਾਅਦ ਪ੍ਰਸ਼ਾਦ ਨੇ ਖੁਦਕੁਸ਼ੀ ਦੀ ਕੋਸ਼ਿਸ਼ ਵੀ ਕੀਤੀ, ਪਰ ਉਹ ਬਚ ਗਿਆ। ਇਸ ਤੋਂ ਬਾਅਦ ਉਹ ਮਨੁਕਾਉ ਪੁਲਿਸ ਸਟੇਸ਼ਨ ਪਹੁੰਚਿਆ ਅਤੇ ਪੁਲਿਸ ਨੂੰ ਖੁਦ ਆਪਣੀ ਧੀ ਦੇ ਕਤਲ ਬਾਰੇ ਜਾਣਕਾਰੀ ਦਿੱਤੀ। ਮਾਮਲੇ ਦੀ ਸੁਣਵਾਈ ਹਾਲੇ ਵੀ Auckland High Court ਵਿੱਚ ਜਾਰੀ ਹੈ।