ਨਿਊਜ਼ੀਲੈਂਡ ਦੀ 2026 ਜਨਰਲ ਚੋਣ ਨੂੰ ਲੈ ਕੇ ਸਿਆਸੀ ਸਰਗਰਮੀਆਂ ਤੇਜ਼ ਹੋਣ ਲੱਗੀਆਂ ਹਨ ਅਤੇ ਇਸ ਵਾਰ ਪਾਰਟੀਆਂ ਨੌਜਵਾਨ ਚਿਹਰਿਆਂ ‘ਤੇ ਖਾਸ ਦਾਅ ਲਗਾ ਰਹੀਆਂ ਹਨ। Labour Party ਨੇ Hawke’s Bay ਦੀ ਅਹਿਮ Tukituki ਸੀਟ ਤੋਂ 22 ਸਾਲਾ ਮੌਸਮ ਵਿਗਿਆਨੀ Dan Scott ਨੂੰ ਆਪਣਾ ਉਮੀਦਵਾਰ ਬਣਾਇਆ ਹੈ। Napier ਨਾਲ ਸਬੰਧਿਤ Dan Scott ਇਸ ਵੇਲੇ Wellington ਵਿੱਚ ਮੌਸਮ ਵਿਗਿਆਨੀ ਵਜੋਂ ਸੇਵਾ ਨਿਭਾ ਰਹੇ ਹਨ। ਉਹ ਵੱਡੀਆਂ ਸਿਆਸੀ ਪਾਰਟੀਆਂ ਵੱਲੋਂ ਚੋਣ ਮੈਦਾਨ ਵਿੱਚ ਉਤਾਰੇ ਗਏ ਸਭ ਤੋਂ ਨੌਜਵਾਨ ਉਮੀਦਵਾਰਾਂ ਵਿੱਚੋਂ ਇੱਕ ਮੰਨੇ ਜਾ ਰਹੇ ਹਨ।
Labour Party ਦਾ ਕਹਿਣਾ ਹੈ ਕਿ Scott ਲੋਕਾਂ ਨਾਲ ਸਿੱਧੇ ਜੁੜੇ ਮੁੱਦਿਆਂ ‘ਤੇ ਆਪਣੀ ਚੋਣ ਮੁਹਿੰਮ ਚਲਾਉਣਗੇ। ਪਾਰਟੀ ਨੇ ਮਹਿੰਗਾਈ, ਘਰਾਂ ਦੀ ਵਧਦੀ ਕੀਮਤ, ਸਿਹਤ ਸੇਵਾਵਾਂ ‘ਤੇ ਦਬਾਅ ਅਤੇ ਮੌਸਮੀ ਤਬਦੀਲੀ ਨੂੰ ਮੁੱਖ ਚੋਣੀ ਮੁੱਦੇ ਵਜੋਂ ਉਭਾਰਿਆ ਹੈ। Dan Scott ਨੇ ਆਪਣੀ ਪੜ੍ਹਾਈ Hawke’s Bay ਵਿੱਚ ਪੂਰੀ ਕੀਤੀ ਅਤੇ ਬਾਅਦ ਵਿੱਚ ਮੌਸਮ ਵਿਗਿਆਨ ਵਿੱਚ ਉੱਚ ਸਿੱਖਿਆ ਹਾਸਲ ਕੀਤੀ। ਆਪਣੇ ਪੇਸ਼ੇ ਨਾਲ ਨਾਲ ਉਹ climate change ਅਤੇ environment ਨਾਲ ਜੁੜੇ ਮੁੱਦਿਆਂ ‘ਤੇ ਵੀ ਸਰਗਰਮ ਰਹੇ ਹਨ।
Tukituki ਸੀਟ ਨੂੰ ਨਿਊਜ਼ੀਲੈਂਡ ਦੀਆਂ ਅਹਿਮ ਸਿਆਸੀ ਸੀਟਾਂ ਵਿੱਚ ਗਿਣਿਆ ਜਾਂਦਾ ਹੈ, ਜਿੱਥੇ ਪਿਛਲੀਆਂ ਚੋਣਾਂ ਦੌਰਾਨ Labour ਅਤੇ National ਵਿਚਾਲੇ ਕਾਫੀ ਕਰੀਬੀ ਮੁਕਾਬਲੇ ਵੇਖਣ ਨੂੰ ਮਿਲੇ ਸਨ। Labour ਨੂੰ ਉਮੀਦ ਹੈ ਕਿ Scott ਦੀ ਨੌਜਵਾਨ ਛਵੀ ਅਤੇ ਸਥਾਨਕ ਪਛਾਣ ਪਾਰਟੀ ਲਈ ਫਾਇਦੇਮੰਦ ਸਾਬਿਤ ਹੋਵੇਗੀ। ਇਸੇ ਦੌਰਾਨ ਹੋਰ ਪਾਰਟੀਆਂ ਵੀ ਨਵੇਂ ਅਤੇ ਵੱਖਰੇ ਪਿਛੋਕੜ ਵਾਲੇ ਉਮੀਦਵਾਰਾਂ ਨੂੰ ਅੱਗੇ ਲਿਆ ਰਹੀਆਂ ਹਨ। ਰਾਜਨੀਤਿਕ ਮਾਹਿਰਾਂ ਦਾ ਮੰਨਣਾ ਹੈ ਕਿ ਨਿਊਜ਼ੀਲੈਂਡ ਦੀ ਰਾਜਨੀਤੀ ਵਿੱਚ ਹੁਣ ਹੌਲੀ-ਹੌਲੀ ਨਵੀਂ ਪੀੜ੍ਹੀ ਨੂੰ ਵੱਡੀ ਜਗ੍ਹਾ ਮਿਲ ਰਹੀ ਹੈ।
ਵਿਸ਼ਲੇਸ਼ਕਾਂ ਅਨੁਸਾਰ ਨੌਜਵਾਨ ਵੋਟਰ ਹੁਣ ਘਰਾਂ ਦੀ ਪਹੁੰਚ, ਰੋਜ਼ਗਾਰ, ਸਿੱਖਿਆ, ਤਨਖਾਹਾਂ ਅਤੇ ਭਵਿੱਖੀ ਸੁਰੱਖਿਆ ਵਰਗੇ ਮੁੱਦਿਆਂ ਨੂੰ ਤਰਜੀਹ ਦੇ ਰਹੇ ਹਨ। ਇਸ ਕਾਰਨ ਪਾਰਟੀਆਂ ਅਜਿਹੇ ਉਮੀਦਵਾਰ ਮੈਦਾਨ ਵਿੱਚ ਲਿਆ ਰਹੀਆਂ ਹਨ ਜੋ ਨੌਜਵਾਨਾਂ ਨਾਲ ਸਿੱਧਾ ਸੰਬੰਧ ਜੋੜ ਸਕਣ।