ਨਿਊਜ਼ੀਲੈਂਡ ਵਿੱਚ ਪੜ੍ਹਾਈ ਲਈ ਜਾਣ ਦੇ ਇੱਛੁਕ ਭਾਰਤੀ ਵਿਦਿਆਰਥੀਆਂ ਨੂੰ ਸਟੂਡੈਂਟ ਵੀਜ਼ਾ ਪ੍ਰਕਿਰਿਆ ਦੌਰਾਨ ਲੰਬੇ ਇੰਤਜ਼ਾਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। Immigration New Zealand ਦੇ ਨਵੇਂ ਅੰਕੜਿਆਂ ਅਨੁਸਾਰ ਭਾਰਤ ਤੋਂ ਆਉਣ ਵਾਲੀਆਂ ਵੀਜ਼ਾ ਅਰਜ਼ੀਆਂ ਦੇ ਫੈਸਲੇ ਵਿੱਚ ਚੀਨੀ ਵਿਦਿਆਰਥੀਆਂ ਨਾਲੋਂ ਕਾਫੀ ਵੱਧ ਸਮਾਂ ਲੱਗ ਰਿਹਾ ਹੈ। 1 ਜਨਵਰੀ ਤੋਂ 21 ਅਪ੍ਰੈਲ 2026 ਤੱਕ ਭਾਰਤੀ ਵਿਦਿਆਰਥੀਆਂ ਦੀਆਂ ਅਰਜ਼ੀਆਂ ਨੂੰ ਪ੍ਰੋਸੈਸ ਕਰਨ ਲਈ ਔਸਤ 30 ਵਰਕਿੰਗ ਦਿਨ ਲੱਗੇ, ਜਦਕਿ ਚੀਨ ਤੋਂ ਆਈਆਂ ਅਰਜ਼ੀਆਂ ਲਈ ਇਹ ਸਮਾਂ ਸਿਰਫ 16 ਦਿਨ ਰਿਹਾ। ਪਿਛਲੇ ਸਾਲ ਇਸੇ ਅਰਸੇ ਦੌਰਾਨ ਭਾਰਤੀ ਅਰਜ਼ੀਆਂ ਲਈ ਔਸਤ ਸਮਾਂ 19 ਦਿਨ ਸੀ, ਜਿਸ ਨਾਲ ਇਸ ਸਾਲ ਦੇ ਵਾਧੇ ਨੇ ਚਿੰਤਾ ਵਧਾ ਦਿੱਤੀ ਹੈ।
Immigration New Zealand ਦੀ ਡਾਇਰੈਕਟਰ ਵੀਜ਼ਾ Celia Coombes ਨੇ ਕਿਹਾ ਕਿ ਹਰ ਦੇਸ਼ ਤੋਂ ਆਉਣ ਵਾਲੀਆਂ ਅਰਜ਼ੀਆਂ ਦੀ ਗਿਣਤੀ ਅਤੇ ਉਨ੍ਹਾਂ ਦੀ ਜਟਿਲਤਾ ਵੱਖਰੀ ਹੁੰਦੀ ਹੈ, ਜਿਸ ਕਰਕੇ ਪ੍ਰੋਸੈਸਿੰਗ ਸਮੇਂ ਵਿੱਚ ਫਰਕ ਆ ਜਾਂਦਾ ਹੈ। ਉਨ੍ਹਾਂ ਨੇ ਦੱਸਿਆ ਕਿ 2026 ਵਿੱਚ ਵੀਜ਼ਾ ਅਰਜ਼ੀਆਂ ਦੀ ਗਿਣਤੀ ਵਿੱਚ 11 ਫੀਸਦੀ ਵਾਧਾ ਦਰਜ ਕੀਤਾ ਗਿਆ ਹੈ।
ਦੂਜੇ ਪਾਸੇ ਭਾਰਤੀ ਵਿਦਿਆਰਥੀਆਂ ਲਈ ਇੱਕ ਸਕਾਰਾਤਮਕ ਪੱਖ ਵੀ ਸਾਹਮਣੇ ਆਇਆ ਹੈ। ਵੀਜ਼ਾ ਮਨਜ਼ੂਰੀ ਦਰ ਵਿੱਚ ਸੁਧਾਰ ਹੋਇਆ ਹੈ ਅਤੇ ਰਿਜੈਕਸ਼ਨ ਰੇਟ ਘਟਿਆ ਹੈ। 2024 ਵਿੱਚ ਜਿੱਥੇ ਵੱਡੀ ਗਿਣਤੀ ਵਿੱਚ ਅਰਜ਼ੀਆਂ ਰੱਦ ਹੋ ਰਹੀਆਂ ਸਨ, ਉੱਥੇ 2025 ਵਿੱਚ 75.4 ਫੀਸਦੀ ਅਰਜ਼ੀਆਂ ਨੂੰ ਮਨਜ਼ੂਰੀ ਮਿਲੀ। ਇਸ ਸਾਲ 21 ਅਪ੍ਰੈਲ ਤੱਕ ਰਿਜੈਕਸ਼ਨ ਰੇਟ ਘਟ ਕੇ 21.5 ਫੀਸਦੀ ਤੱਕ ਆ ਗਿਆ ਹੈ।
ਇਮੀਗ੍ਰੇਸ਼ਨ ਮਾਹਿਰਾਂ ਦਾ ਮੰਨਣਾ ਹੈ ਕਿ ਭਾਰਤ ਨਿਊਜ਼ੀਲੈਂਡ ਲਈ ਇੱਕ ਮਹੱਤਵਪੂਰਨ ਵਿਦਿਆਰਥੀ ਬਾਜ਼ਾਰ ਹੈ, ਪਰ ਲੰਬੇ ਸਮੇਂ ਤੱਕ ਫਾਈਲਾਂ ਪੈਂਡਿੰਗ ਰਹਿਣ ਕਾਰਨ ਵਿਦਿਆਰਥੀਆਂ ਅਤੇ ਐਡਵਾਈਜ਼ਰਾਂ ਨੂੰ ਵੱਡੀਆਂ ਦਿਕ਼ਤਾਂ ਆ ਰਹੀਆਂ ਹਨ। ਕਈ ਯੋਗ ਉਮੀਦਵਾਰ ਵੀ ਦੇਰੀ ਕਾਰਨ ਦਾਖਲੇ ਦੇ ਮੌਕੇ ਗਵਾ ਰਹੇ ਹਨ, ਜਿਸ ਨਾਲ ਨਿਊਜ਼ੀਲੈਂਡ ਦੀ ਸਿੱਖਿਆ ਪ੍ਰਣਾਲੀ ਦੀ ਸਾਖ ‘ਤੇ ਵੀ ਅਸਰ ਪੈ ਸਕਦਾ ਹੈ।
Education New Zealand ਦੇ ਅੰਕੜਿਆਂ ਮੁਤਾਬਕ 2024/2025 ਦੌਰਾਨ ਦੇਸ਼ ਵਿੱਚ ਲਗਭਗ 84 ਹਜ਼ਾਰ ਅੰਤਰਰਾਸ਼ਟਰੀ ਵਿਦਿਆਰਥੀ ਰਹੇ, ਜਿਨ੍ਹਾਂ ਨੇ ਨਿਊਜ਼ੀਲੈਂਡ ਦੀ ਅਰਥਵਿਵਸਥਾ ਵਿੱਚ ਕਰੀਬ 4.6 ਬਿਲੀਅਨ ਡਾਲਰ ਦਾ ਯੋਗਦਾਨ ਦਿੱਤਾ।