ਨਿਊਜ਼ੀਲੈਂਡ ਦੇ ਵਾਈਕਾਟੋ ਖੇਤਰ ਦੇ ਇੱਕ ਵਿਅਕਤੀ ਨੂੰ ਆਪਣੇ ਆਪ ਨੂੰ ਪੁਲਿਸ ਜਾਸੂਸ ਦੱਸ ਕੇ ਕਿਸ਼ੋਰੀਆਂ ਅਤੇ ਆਮ ਲੋਕਾਂ ਦਾ ਭਰੋਸਾ ਜਿੱਤਣ ਦੇ ਮਾਮਲੇ ਵਿੱਚ 19 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਮਿਲੀ ਜਾਣਕਾਰੀ ਅਨੁਸਾਰ, ਚਾਰਲੀ ਟੈਰੀ ਸਿਮੋਂਸਨ-ਕੇਮਪ ਨੇ ਨਕਲੀ ਪੁਲਿਸ ਆਈਡੀ ਕਾਰਡ, ਜਾਲਸਾਜ਼ੀ ਵਾਲੇ ਦਸਤਾਵੇਜ਼ ਅਤੇ ਬਣਾਵਟੀ ਜਾਂਚ ਕਹਾਣੀਆਂ ਦੀ ਵਰਤੋਂ ਕਰਦੇ ਹੋਏ ਆਪਣੇ ਆਪ ਨੂੰ ਨਿਊਜ਼ੀਲੈਂਡ ਪੁਲਿਸ ਦਾ ਡਿਟੈਕਟਿਵ ਦੱਸਿਆ। ਅਦਾਲਤ ਵਿੱਚ ਦੱਸਿਆ ਗਿਆ ਕਿ ਉਹ ਸੋਸ਼ਲ ਮੀਡੀਆ ਰਾਹੀਂ ਕਿਸ਼ੋਰੀਆਂ ਨਾਲ ਸੰਪਰਕ ਕਰਦਾ ਸੀ ਅਤੇ ਨਕਲੀ ਪਹਿਚਾਣ ਦੇ ਜ਼ਰੀਏ ਉਹਨਾਂ ਦਾ ਭਰੋਸਾ ਹਾਸਿਲ ਕਰਦਾ ਸੀ।
ਅਧਿਕਾਰੀਆਂ ਮੁਤਾਬਿਕ ਉਸਦੀ ਇਹ ਧੋਖਾਧੜੀ ਸਿਰਫ਼ ਆਨਲਾਈਨ ਗੱਲਬਾਤ ਤੱਕ ਸੀਮਿਤ ਨਹੀਂ ਸੀ। ਉਹ ਨਕਲੀ ਆਈਡੀ ਕਾਰਡ ਨਾਲ ਪੁਲਿਸ ਸਟੇਸ਼ਨਾਂ ਤੱਕ ਵੀ ਜਾਂਦਾ ਸੀ ਅਤੇ ਆਪਣੇ ਆਪ ਨੂੰ ਅਧਿਕਾਰਿਕ ਜਾਂਚਾਂ ਅਤੇ ਐਮਰਜੈਂਸੀ ਕਾਰਵਾਈਆਂ ਨਾਲ ਜੁੜਿਆ ਹੋਇਆ ਦੱਸਦਾ ਸੀ। ਜਾਂਚ ਦੌਰਾਨ NZTA ਅਤੇ ਹੈਮਿਲਟਨ ਸਿਟੀ ਕੌਂਸਲ ਨਾਲ ਸੰਬੰਧਿਤ ਨਕਲੀ ਦਸਤਾਵੇਜ਼ ਵੀ ਬਰਾਮਦ ਕੀਤੇ ਗਏ। ਇਸ ਤੋਂ ਇਲਾਵਾ, ਉਸਦੇ ਕੋਲ ਗੈਰਕਾਨੂੰਨੀ ਤਰੀਕੇ ਨਾਲ ਪ੍ਰਾਪਤ ਕੀਤੀ ਗਈ ਡਰਾਈਵਰ ਲਾਇਸੈਂਸ ਜਾਣਕਾਰੀ ਵੀ ਮਿਲੀ।
ਸਜ਼ਾ ਸੁਣਾਉਣ ਸਮੇਂ ਬਚਾਅ ਪੱਖ ਦੇ ਵਕੀਲ ਅਫਿਤੂ ਵੀਆਤੂਪੂ ਨੇ ਅਦਾਲਤ ਤੋਂ ਬੇਨਤੀ ਕੀਤੀ ਕਿ ਸਜ਼ਾ 24 ਮਹੀਨੇ ਜਾਂ ਇਸ ਤੋਂ ਘੱਟ ਰੱਖੀ ਜਾਵੇ ਤਾਂ ਜੋ ਦੋਸ਼ੀ ਹੋਮ ਡਿਟੈਨਸ਼ਨ ਲਈ ਅਰਜ਼ੀ ਦੇ ਸਕੇ। ਜੱਜ ਸਿੰਘ ਨੇ ਇਹ ਬੇਨਤੀ ਮੰਨਦਿਆਂ ਉਸਨੂੰ 19 ਮਹੀਨੇ ਦੀ ਕੈਦ ਦੀ ਸਜ਼ਾ ਸੁਣਾਈ ਅਤੇ ਉਚਿਤ ਪਤਾ ਮਿਲਣ ’ਤੇ ਹੋਮ ਡਿਟੈਨਸ਼ਨ ਲਈ ਅਰਜ਼ੀ ਦੇਣ ਦੀ ਇਜਾਜ਼ਤ ਵੀ ਦਿੱਤੀ।
ਅਦਾਲਤ ਨੇ ਦੋਸ਼ੀ ਦੀ ਮਾਨਸਿਕ ਸਿਹਤ ਨਾਲ ਜੁੜੀ ਰਿਪੋਰਟ ਅਤੇ ਉਸ ਵੱਲੋਂ ਲਿਖੇ ਪਛਤਾਵੇ ਦੇ ਪੱਤਰ ਨੂੰ ਵੀ ਧਿਆਨ ਵਿੱਚ ਰੱਖਿਆ। ਹਾਲਾਂਕਿ, ਇਹ ਵੀ ਦੱਸਿਆ ਗਿਆ ਕਿ ਉਹ ਪਹਿਲਾਂ ਹੀ ਲਗਭਗ ਸਾਢੇ ਨੌਂ ਮਹੀਨੇ ਹਿਰਾਸਤ ਵਿੱਚ ਬਿਤਾ ਚੁੱਕਾ ਹੈ, ਜਿਸ ਕਾਰਨ ਉਹ ਕਰੀਬ 10 ਹਫ਼ਤਿਆਂ ਵਿੱਚ “ਟਾਈਮ ਸਰਵਡ” ਲਈ ਯੋਗ ਹੋ ਸਕਦਾ ਹੈ।